لازم تفهم يا بطل إن النحو عندنا اسمه أساليب وتراكيب، يعني الكلام متركب مع بعضه علشان يعمل جمل، وممكن كلمة تأثر في اللي بعضها، فعلشان تعرب صح ، مش هتبص بس على الكلمة اللي هتعربها ولكن على اللي قبلها أيضًا .
واللي هنقوله ده، ثابت عندنا في رابعة وخامسة؛ أما في سادس بعض هذا الكلام سيتغير منه أشياء
ــــــــــــــــــــــــــــــ
طيب ازاي نطبق الكلام ده؟
شوف يا بطل ، الكلمة اللي هتعربها هتكون نوع من ثلاثة.
أول حاجة فعل، وده هتعربه كالتالي من غير ما تبص على اللي قبله.
لو فعل ماضي، يبقى إعرابه: فعل ماضي مبني على الفتح.
لو فعل مضارع؛ يبقى إعرابه: فعل مضارع مرفوع وعلامة رفعه الضمة.
لو فعل أمر؛ يبقى إعرابه: فعل أمر مبني على السكون.
ــــــــــــــــــــــ
لو حرف ودا قليل لما بيجي إعراب
المهم هتقول نوعه؛ حرف جر ، أو هيكون : حرف عطف.
ــــــــــــــــــــــ
لو اسم ودا بقى ركز معي أكثر، ركز تاني معلش.
لو اسم خد بعضك كدا خطوة ورا وبص على اللي قبله.
لو وجدته مفيش قبله وهو أول كلمة في الجملة يبقى إعرابه: مبتدأ مرفوع وعلامة رفعه ............. ( حسب نوع الكلمة ، ودا خاص بخامسة) أما رابعة عندكم علامة الرفع الضمة بس.
ولو هو أول الجملة وقبله بس حرف عطف ، متخفش الحرف العطف مش هيأثر فيه؛ فإعرابه أيضًا مبتدأ.
لو لقيت قبله اسم مبتدأ وهو مكمل معنى الجملة: يبقى إعرابه: خبر مرفوع وعلامة رفعه ............ (حسب نوع الكلمة ، ودا خاص بخامسة) أما رابعة عندكم علامة الرفع الضمة بس
ولو قبله حرف جر: يبقى إعرابه : اسم مجرور وعلامة جره ........ ( حسب نوع الكلمة، ودا خاص بخامسة ) أما رابعة عندكم علامة الجر الكسرة بس
مثال: ( القرية أهلها طيبون ، والشوارع نظيفة وجميلة ) إعرب الشوارع: قبلها حرف عطف، مش هيأثر في الإعراب، لو أخدنا بالنا الشوارع هي أول الجملة الاسمية ، يبقى إعرابها: مبتدأ مرفوع وعلامة رفعه الضمة.
طيب إعراب (نظيفة) هي اسم ، طيب نشوف اللي قبلها ، اللي قبلها مبتدأ، وهي كملت معنى الجملة؛ يبقى إعرابها: خبر مرفوع وعلامة رفعه الضمة.
ـــــــــــــــــــــــ
لو اسم وقبله فعل، هنا بقى ركز معي أكثر
هنشوف الفعل ده ، مين اللي عمله، ومين اللي اتعمل فيه الفعل ، وشوف بقى الكلمة التي بتعربها، لو هي اللي عملت الفعل، يبقى إعرابها : فاعل مرفوع وعلامة رفعه ............ (حسب نوع الكلمة ، ودا خاص بخامسة) أما رابعة عندكم علامة الرفع الضمة بس؟
أما لو وجدت الكلمة اللي بتعربها، هي اللي اتعملت فيها الفعل، يبقى إعرابها؛ مفعول به منصوب وعلامة نصبه ............ (حسب نوع الكلمة ، ودا خاص بخامسة) أما رابعة عندكم علامة النصب الفتحة بس
ــــــــــــــــــــ
أو ممكن تلاقيها هي بنفسها تدل على ظرف، يبقى تعربها حسب ظرفها؛ لو تدل على مكان وقوع الفعل؛ تبقى: ظرف مكان. لو تدل على زمن حدوث الفعل؛ تبقى: ظرف زمان.
ـــــــــــــــــــــ
لحظة وحدة قبل ما تمشي
لو في مرة بصيت على الكلمة اللي قبلها ومفهمتش منها إعراب، يبقى غالبًا تروح للي قبل قبلها ، زي كدا
( يزور السائحون مصر ) عايز اعرب مصر، نروح للي قبلها السائحون ، مفهمتش حاجة صح؟! يبقى نروح للي قبل قبلها يزور : فعل. إذن يا بطل فكر ، مين بيزور ؟ السائحون. تبقى فاعل؛ لأنها عملت الفعل. يزوروا ايه؟ مصر . تمام مصر قام عليها عمل الفاعل تبقى مفعول به.
ملاحظة : لم أتحدث في البوست عن باقي المفاعيل أو المضاف إليه ، نأخره لبوست آخر إن شاء الله إن قدر الله لن البقاء واللقاء.
ملاحظة أخرى: ( حسب نوع الكلمة أقصد بها: مفرد ـ مثنى ـ جمع تكسير ـ جمع مذكر سالم ـ جمع مؤنث سالم ) ولكل نوع علامات إعراب خاصة به ، وقد درستها في الترم الأول.
اكتب تعليقك اذا كان لديك اى تسائل عن الموضوع ، وسنجيبك فور مشاهدة تعليقك