كل ما تريد معرفته عن الكليات وأقسامها في الجامعات المصرية

قبل كل عام دراسي جديد يبدأ طلاب الثانوية العامة في التفكير في وجهتهم الدراسية بعد انقضاء فترة التعليم الثانوي، فيبحثون عن معلومات حول الكليات المختلفة في الجامعات المصرية.

 وفي خدمة من "أخبار التعليم اليوم" لجميع الطلاب المقبلين على فترة التعليم الجامعي، نستعرض مجموعة من التقارير التي تقدم معلومات تفصيلية عن الكليات باختلاف مجالاتهما العلمية، وكيفية التقديم، والأقسام والتخصصات، والجامعات التي تتواجد بها، وفرص العمل بعد التخرج.

 --------------------

 #كلية_الهندسة
◾أصعب كلية في مصر معايا ؟🤔
- أيوه اتفضل حضرتك 📏📐
◾اعرف منين إذا كنت مناسب ليكي ولالا؟
- لو انت بتحب الرياضة والفيزيا 😁فحط هندسة رغبة أولى
ولو بتحب التفكير و الإبداعي خصوصا بردو حط هندسة رغبة أولى أما بقى لو بتحب الفيزيا والرياضة والكيميا شوية فبردو تعمل ايه؟ تحط هندسة رغبة أولى
◾هندسة من الكليات ال بتتطلب مذاكرة ومجهود كبير لأنها بتعتمد على حل المشكلات
*نظام الدراسة:
5 سنين دراسية.. أول سنة إعدادي و 4 سنين تخصص.
◾في إعدادي بتدرس نفس مواد ثانوي مع بعض الإضافات طبعا في كل مرة ما أنت بقيت مهندس أد الدنيا✌
- هتدرس فيزيا وميكانيكا ورياضة ودول مواد أساسي معاك
- هتدرس رسم هندسي وهتتعلم إزاي تستخدم 《T》📏 في الأول هتحس إنه صعب لكن بالوقت بتتعود
- هتدرس مادة برمجة وهتتعرف فيها على حاجات جديدة زي السي ++ أو الماتلاب
- هتدرس مادة إنتاج ودي مادة نظري ولكن بتنزل فيها ورش وبتشوف ماكينات لأول مرة في حياتك🤓
◾في آخر إعدادي بتحدد القسم ال نفسك تكمل فيه وطبعا تقديرك في إعدادي هو ال بيحدد إذا كنت هتقبل في القسم ده ولالا، ومش معنى أن القسم تقديره عالي يبقى هو صعب، لا خالص هو الإعتماد بيبقى على عدد ال عايزين يدخلوا القسم والعدد ال القسم بيستوعبه من الأساس ✅
◾بعد كده التخصص بيبدأ من تاني سنة، وفي السنة التالتة بقى بيحصل عملية التشعيب وهى اختيار شعبة أو فرع جوا القسم ال أنت اختارته قبل كده
مثال : 《طالب هندسة إختار في سنة أولى قسم كهربا وفي سنة تانية قرر إنه هيدخل إتصالات وهي شعبة من كهربا 》
◾وفي جامعات بيكون التخصص في القسم في سنة اولى 《مثال أولي كهربا باور》 زي هندسة المنصورة.
◾طبعا تقسيمة الأقسام والشعب او التفريعات بتختلف من جامعة لجامعة بس إحنا بنتكلم هنا عن الأصل والأساس
*أقسام هندسة مش كلها موجودة في كل الجامعات
لكن فيه 4 أقسام مشتركين تقريبا بين كل الجامعات، وهما:
《عمارة- مدني- ميكانيكا- كهرباء.》
◾قسم مدني :
الهندسة المدنية قسم شهير من اوائل اقسام الهندسة، بيتشعب وبيتفرع ل :
هندسة طرق وكبارى، انشاءات وتشييد، خرسانة ،هندسة صحية، هندسة الرى المساحه، هندسة المواد.
 المواد الاساسية《 الرسم الهندسى، ماده اسمها Structure》 ، ومن كل قسم بتدرس مادة ..لكن المواد الاساسية اللى هتكمل فى كل السنين تقريبا المادتين دول.
المهندس المدنى هو اللى بيقوم بتصميم وتنفيذ المنشآت، المهندس المدنى يقدر يشتغل حر او فى مكتب انشاءات او التوظيف فى شركات المقاولات.
◾قسم عمارة :
 قسم بيربط بين الهندسة والفن 😋
عمل المهندس المعمارى عملية إبداعيه ازاى تطوع كل القدرات الهندسية اللى عندك عشان تطلع نتيجة جميلة، هو مكمل لعمل المهندس المدنى، 《وناس كتير بيحصل عندها خلط بين الاتنين رغم إنهم مختلفين عن بعض جدا》كمان المهندسين المعماريين بيهتموا بترميم المبانى التراثية.
◾قسم كهربا :
بيعتمد على الفيزياء  يعنى عشان تدخل كهربا لازم تكون متميز وبتحب الفيزياء والرياضيات لأنهم أساس الدراسة فى القسم.
فروع أو شعب الهندسة الكهربية :
1-الاتصالات .
2-التحكم.
3-القدرة.
4-حاسبات.
◾قسم ميكانيكيا :
يعتبر من أجمل الأقسام في هندسة  الا انه من الأقسام اللي محتاجه جهد وجدية في العمل ومذكرة كتير أكتر من الأقسام التانية ومحتاج إن دماغك تبقى شغالة طول الوقت
- ميكانيكا فيها فروع: باور، إنتاج، سيارات، ميكاترونكس.
(ميكاترونكس يعتبر قسم خاص، والميكاترونيكس بيربط بين عدة علوم وتخصصات فى فرع واحد وهى الميكانيكا والكهربا والالكترونيات البرمجة وهندسة التحكم والتصميم) يعني 6×1 😎
◾بعض الجامعات بتبقى الفروع دي أقسام منفصلة، يعني التخصص على طول بيبقي حاسبات، من غير كهرباء زي القاهرة مثلا زي ما قولنا قبل كده كل جامعة بتطبق نظامها الخاص بيها
◾فيه أقسام تانية مش موجودة في كل الجامعات زي:
تعدين وبترول《ليهم كلية لوحدهم ده غير إن ليهم قسم لوحدهم كمان 》
 وكيمياء وأجهزة طبية وطيران وفضاء وغزل ونسيج.
- بعد إعدادي بتعرف كل التفاصيل عن الأقسام.
◾كلية هندسة كلية ممتعة جدا ل ال دماغه فيها، الكلية مش صعبة ومش سهلة.. الكلية محتاجة مجهود عالي، لو مش داخلها عن رغبة قوية منك هتتعب فيها جامد.
- بنسمع كتير ناس بتقول إنت بتدخل هندسة متعرفش هتخرج منها ولالا😭 الكلام هيبقى حقيقي لو مذاكرتش ومنظمتش وقتك ومبذلتش المجهود ال الكلية تستحقه وعموما الكلية بتفيدك في حياتك بعد كده بتعرفك إزاي تنظم وقتك وحياتك وده كله هتكتشفه بالممارسة👌
◾ وعلفكرة سهل تجيب فيها تقدير، وسهل تخلصها في خمس سنين بالظبط، وتتخرج منها سليم 😃 لكن الرغبة والإرداة ليهم عامل كبير في كده.
في النهاية دي أصعب كلية في مصر يا عم أنت بتقول إيه؟🤣

==================

#كلية_هندسة_البترول

ازيكم يا شباب خلاص الثانويه خلصت بكل مغامرتها سواء الحلوه أو الوحشه و دلوقتى هتبدا مرحلة جديد في حياتكم مرحلة اختيار وتحديد الطريق اللي هتكملوا فيه بقية حياتكم
النهاردة هنتكلم عن كلية هندسة بترول و التعدين
الكلية موجوده فى السويس ، و موجوده فى القاهرة كقسم من أقسام كلية الهندسة وبتاخد من مجموع بيتراوح ما بين 403 و 406

بالنسبة لاقسام الكلية فى السويس عبارة عن 5 اقسام
1 - قسم حفر ده مرتبط بحفر آبار البترول وبعدين استخراج البترول نفسه و بيشتغل فى شركات البترول اللى هيا اما بتكون شركات " مالكة " ودى الشركات المالكة للآبار او بيشتغل فى شركات " خدمات "و دى هى اللى المسؤولة عن الحفر و استخراج البترول

2 - قسم تكرير هو المسؤول عن البترول بعد استخراجه ، يعنى مسئول انه ياخد البترول يعمله معالجة أولية بعد استخراجه علطول ومعالجة الغاز الطبيعى
وبعدين يوديه لشركات تحول البترول الخام ده لمنتجات زى السولار بقى والبنزين وكدا
القسم برضو بيشتغل فى مجال البيتروكيماويات ، و هو المجال اللى بيخص صناعة المنتجات من مشتقات البترول ، و المنتجات دى زى المنظفات الصناعية و الاسمدة و الملابس و المواسير وموجود ليها شركات كتير فى مصر
ومهندس التكرير ممكن يشتغل فى شركة تكرير بترول او شركة غاز او شركة بتروكيميا ،، ولأنه بيدرس عمليات وكيميا برضو فبيكون متاح ليه يشتغل فى شركات الأدوية ممكن او الأسمدة كمان

3 - قسم جيولوجيا وده بيهتم بتحديد اماكن وجود البترول وأماكن الآبار اللى ممكن نلاقى فيها بترول وخصائص البترول الموجود ده ومجال شغلهم فى شركات حفر الآبار

4 - قسم فلزات وده دراسته كلها مهتمة بالمعادن والسبائك والعمليات اللى بتتم عليهم ومهندس فلزات ممكن يشتغل فى شركات التكرير و يكون مسئول عن فحص الأنابيب والشغل الخاص بيها
او بيشتغل فى شركات الحديد والصلب او اى شئ ليه علاقة بالمعادن والمجال ده واسع وفيه شركات كتير

5 - قسم مناجم بيختص باستخراج المعادن من المناجم زى مناجم الذهب اللى بنسمع عنها زى منجم السكرى مثلا ،

6 - هندسة استكشاف و ده قسم مميز بيدرس مواد مشتركة من كذا قسم ، يعنى حاجات من حفر على جيولوجيا وهكذا
وده قسم بفلوس .. بحوالى 5000 ف الترم ، ومجال شغله زى خريجى قسم حفر

* دخول أى قسم من الاقسام الخمسة بيكون برغبات وتنسيق برضو ،، يعنى بيتم ترتيب الاقسام على حسب سوق العمل
وحاليا حفر بياخد من اعلى تقدير يعنى من امتياز واحيانا شوية من جيد جدا
وبعدين تكرير وبعدين فلزات وبعدين جيولوجيا وبعدين مناجم و ده مبنى على التقدير اللى بتجيبه ف اول سنة كلية "" اللى هى اعدادى ""
بالنسبة للبنات مش مسموح ليهم انهم يدخلوا قسم جيولوجيا او مناجم ، و بيدخلوا حفر او تكرير لو جابوا تقديرهم ، او بيدخلوا فلزات لو تقديرهم اققل

بالنسبة للفرق بين القاهرة و السويس :
علشان تدخل بترول القاهرة لازم تدخل هندسة القاهرة عموما ، وبعد اعدادى بتختار قسم بترول
فى قسم بترول تقدر تختار شعبة من الشعب التلاتة اللى هى ( حفر أو فلزات أو مناجم )
و كمان القاهرة مفهاش قسم تكرير و بتروكيماويات لكن فيها قسم كيميا ، و ده مش موجود فى السويس و تقدر من خلاله تشتغل فى مجالات كتير جدا سواء فى شركات البترول او البتروكيماويات و مصانع الادوية و منتجات الاغذية وغيره
بالنسبة لاختلاف الدكاترة و مواد الدراسة فمفيش اختلاف كبير ، ناس هتقولك ان السويس دكاترتها احسن وناس هتقولك القاهرة احسن ، وهتسمع ان فيه شركات بتاخد خريجين القاهرة بس وشركات بتاخد خريجين السويس بس ، لكن فى الاخر متقدرش تحدد ايه الاحسن بالظبط لان فيه تنوع كبير من الدكاتره فى كل الكليات و فرص الشغل بتختلف من شخص للتانى

بالنسبة لسكن الطلبة بيبقي السكن في الأغلب وحش لأنك مقيد في وقت مذكرتك و في كل حاجه و ممكن ميكونش في خصوصية ليك فأحيانا السكن الخارجي بيكون افضل و الأكل بيبقى كميات قليلة و مش كويس اغلب الوقت

و دلوقتي اكيد طلاب المعادلة مش هننساكم في نوعين من الطلبة اللي واخدين الثانوية من بره مصر و دول نظامهم بيبقى شبه اللي واخدين ثانوية مصريه عادي
بس هم يختلفوا في التنسيق و نتيجه التنسيق و اسامي الطلاب بتنزل متأخر اوي بعد الميد ترم فأنت مفروض تحضر عادي و تختار السكاشن اللي عايز تاخدها و لما اسمك ينزل قدم ورقك
النوع الثاني من الطلبه اللي هما طلبه صنايع أو معهد و علشان يدخلوا هندسه
لازم تجيب 70 % لو صنايع 3 سنين و تجيب 50% لو صنايع 5 سنين أو معهد فوق متوسط و بتقدم في مسابقة تبع اللجنة المركزية لهندسه القاهرة و بتمتحن في فيزياء و ميكانيكا و رياضة عامة وخاصة
اخيرا لازم قبل ما تقرر الكليه اللي انت عايزه تشوف هي من اهتماماتك شايف نفسك فيه و لا لا ويبقي قرارك بناء على رغبتك انت و بس 😉😉
لو قررت انك هتدخل هندسة بترول فخليك عارف انك هتوجه مشاكل كتير و منها أن فرصه الشغل صعبه شويه بس الشغل مش مضمون في أي كليه بس انت لازم تجتهد 💪💪 و لازم لما تقرر الكلية تكون بتستحمل الغربة و السفر و هتتعب كتير لحد ما توصل
ربنا يوفقكم و اختاروا اللي تحبوه، ويارب نكون ساعدناكم

==================

#كلية_الطب_النظام_الجديد
- كلية بتدخلها مبتخرجش منها؟🤔
- كلية بتدخلها طالب بتطلع منها طالب بردو ؟😲
- ده كان زمان دلوقتي نظام الكلية اتغير خالص وهنقدر نعيش حياتنا بقى😎
◾فى البوست دا هنتكلم عن نظام مختلف لكلية الطب
نظام الـproblem based learning وهو إنك تعرف المشكلة وحلها وتحلها في نفس الوقت ، ده متطبق في كلية طب جامعة قناة السويس و طب بورسعيد وطب السويس وبعض الكليات الخاصة وموجود في كليات تانيه بس كل كلية بتطبقه من منظورها الخاص
◾ في basic السنة بتتقسم لبلوكات فب الأغلب بيبقوا 6 وتقسيمتهم بتبقى مختلفة من جامعة لجامعة ممكن جامعة تدرس 3 في ترم و 3 في ترم تاني وممكن 4 و2 حسب يعني متغير
- إيه هو البلوك أو الموديول ده بقى؟
- البلوك هو مجموعة تعيلمية بتاخد فيها كل ما له علاقة بجزء معين من جسم الإنسان مثلا المعدة ،هتاخد كل ما يتعلق بالمعدة في كل المواد لحد ما تدرسها كلها وتبقى مُلم بكل أجزائها بعدين تنتقل على جزء تاني وهكذا
 البلوك بقى متقسم لمجموعة من المشاكل 3 ل 5 مشكلات ، كل مشكلة بتاخد أسبوع مثلا ممكن تاخد أكتر أو أقل حساب نظام الجامعة
- إيه هيا المشكلة بقى ؟
- هقولك يا سيدى ،  الكلية بتنزل مع بداية كل أسبوع مشكلة problem ، بتتناقش أنت وزمايلك في المشكلة و تتطلعوا في الاخر بمجموعة من التساؤلات عشان تفهموا طبيعة المشكلة و حلها وهو ده الهدف إن انتوا تكتشفوا وتفهموا طبيعة الجهاز أو الجزء ده بنفسكم وتقدروا تتعاملوا مع مشاكله وتشخصوها.
◾  التساؤلات ديه بنسميها أهداف ، بعد كده و لمدة أسبوع بتكون المحاضرات و المعامل متعلقة بالمشكلة دي
 في اخر الأسبوع بتجتمع بزمايلك و تقدموا حل للمشكلة في ضوء دراستكم طول الأسبوع
 مع نهاية الترم ( المكون من 3 بلوكات غالبا ) بيكون الإمتحان
◾ الإمتحان مبيكونش كل مادة لوحدها ، هتمتحن 3 امتحانات كل امتحان على بلوك لوحده
◾من مميزات النظام ان المواد بتكون مرتبطة ببعض يعني البلوك الواحد لو فيه 3 مواد مثلا فال 3 هيبقوا بيتكلموا عن نفس الجزء وده هيسهل عليك في المذاكرة ، كمان درجة النجاح في الامتحان بتتحسب بالبلوك كله مش بعدد المواد يعني لو البلوك فيه 3 مواد وأنت ذاكرت 2 بس هتنجح
《بس خد بالك وذاكر كويس عشان تعالجنا متموتناش")) 》
◾من عيوبه ان فى كليات امتحان البلوك الواحد كل سؤال بيجي على مادة ، فلو عرفت تحل السؤال هتاخد درجة المادة ، معرفتش تحله يبقي كده المادة راحت عليك غالبا
🗯 النظام ده بيعتمد على التعلييم الذاتى self learning ف بعض الكليات يعني مفيش كتب بتنزل فى الكلية ، انت اللى بتدور وبتشوف المصادر و المراجع المناسبة وتذاكر منها ،لكن في كليات بتنزل ليها كتب خاصة بيها عادي
《والحقيقة مش معروف هل دي نقطة إيجابية ولا سلبية؟》
◾اخيرا بالنسبة للتكليف و الامتياز فهو نفس النظام اللى اتكلمنا عنه فى بوست كلية الطب ال traditional
- طيب سمعنا عن ان هيكون فى تغيير هيحصل ونظام جديد لكل كليات الطب فى مصر ؟
- دا حقيقى ، فى قرار نزل بإن كلية الطب هتبقى 5 سنين و سنتين امتياز ( او اسمهم تدريب اكلينيكى ) ، وهتبقى بنظام الساعات المعتمدة ، وغالبا هيطبق فيها نظام الـproblem based learning اللى اتكلمنا عنه فى البوست ودا بيختلف تطبيقه من كلية للتانية وبالفعل النظام ده بدء تنفيذه من السنة الفاتت
◾فى النظام الجديد هتنزل المستشفى وتشتغل عمليا من اول سنة فى الكلية ودا برضو ف بعض الكليات ولكن ف النظام ككل الطلبة بتنزل المستشفيات بدري عن النظام القديم يعني بتمارس ال بتدرسه وده الصح✅
◾و هيكون فيه برنامج جديد اسمه البورد المصرى ، هيكون إلزامي على كل الاطباء إنهم يجتازوا اختبار البورد المصرى اللى هيكون موحد على كل كليات مصر ، ودا شرط اساسي لمزاولة المهنة
《عشان نتأكد بردو إنك كدكتور هتعالجنا واحنا غلابة🤓》
◾النظام مختلف عن نظام التدريس العادي  traditional ال اتكلمنا عنه فى البوست اللى فات ( هتلاقى لينك البوست فى اول كومنت ) أكيد لاحظت ده مش كده ⁉️
◾اخيرا النظام لسه متطبقش كامل ، وبالتالى لسه مش واضح تماما كل تفاصيله ، لكن ان شاء الله هيكون افضل لطلبة الطب 

--------------------

كلية الطب نظام قديم
مقالنا هيتكلم عن طب ونظام الدراسة فيها وغيره..
(آه هو مقال 😂 وتفتكر لو مش هتصبر ع مقال خمس دقايق قراءة هتصبر ع 7 سنين دراسة؟ 🤔)
ودا أول تحدي ف كلية طب إنها عدد سنينها طويلة شوية 😁
وبما إنه مقال فممكن تكسلوا تقروه للآخر، بس دا كويس عشان فعلًا المقال ده للمهتمين فقط. 👌
عشان مينفعش تدخل الكلية دي بالذات (أو غيرها) من غير شغف، من غير إهتمام، مينفعش تضيع سنين ومجهود من عمرك وإنت أصلًا داخل عشان ماما وبابا عايزين كده وإنت أحسن من ابن خالتك الدكتور وبلا بلا، مينفعش إطلاقًا.
نبدأ بسم الله ^^
📍التنسيق:
كلية طب عمرها ما قلت عن 97,5% أيًا كانت الجامعة، وأقل مجموع بيبقى للقاهرة واسكندرية عشان مساحتهم أكبر وبيستوعبوا عدد طلبة أكبر وكل ما بقت الكلية أصغر زي المنصورة وطنطا مجموعها بيعلى، ودا عامل أساسي ف التنسيق 😃
وبالتالي طب محتاجة مجهود قبل وبعد وأثناء دراستها، فتلاقي طلبة طب مستحيل يقتنعوا بجملة " اتعب دلوقتي عشان ترتاح بعدين" 🤷‍♀️
📍نظام الكلية ودراستها:
الكلية في مصر 7 سنين: 6 دراسة، وسنة امتياز
(سنة امتياز = سنة تدريب عملي إجباري بتطبق فيها كل ال درسته ال6 سنين، وبيكون في مستشفيات الجامعة، وهنتكلم عنها بالتفصيل تحت).
أما عن ال6 سنين دراسة فابيتقسموا علي مرحلتين:
- المرحلة الأكاديمية.
- المرحلة الإكلنيكية.
- المرحلة الأكاديمية:
هي أول 3 سنين، وبتكون دراسة أكاديمية بتدرس فيهم مواد نظري زي الأناتومي (علم التشريح)، فسيولوجي (علم وظائف الأعضاء)، هستولوجي (علم الأنسجة)، فارماكولوجي (علم الأدوية)، بيوكيمستري (كيمياء عضوية)، جينتكيس او الامبريولوجي (علم الوراثة)، باثولوجي (علم الامراض)، باراسيتولوجي (علم الطفيليات)، ميكروبيولوجي (علم الكائنات الدقيقة).
والمواد في ال٣ سنين دول مش أقل من 4 مواد وف بعض الجامعات بيبقوا 6 .
- المرحلة الإكلينيكية:
تاني 3 سنين، بتكون دراسة إكلينيكية clinical، ومن معناها بتتعامل فيهم مع المريض بنفسك وبتدرسهم عمليًا وبتدرس فيهم المواد اللي هتتخصص فيها بعد الكلية زي الأطفال و الباطنة والجراحة والرمد و ونسا وتوليد وطب المجتمع وهكذا.
📍الامتحانات:
معظم الجامعات في مصر ماشية بنظام السنة الواحدة يعني مفيش امتحانات فاينال بعد نهاية الترم الاول لا، المنهج بيكمل معاك وبتمتحن مرة واحدة آخر السنة زي القصر العيني والمنصورة وطنطا وشبين الكوم، لكن في جامعات ودي عددها أقل بتمتحن فاينال بعد كل ترم زي بنها.
أما جامعة اسكندرية فيها نظام (الموديول)، يعني إيه؟
يعني بناخد جهاز في جسم الانسان وبندرس كل مواده مرة واحدة وتمتحن علي كل جهاز.
مثال: هتيجي تدرس القلب هتدرس المواد النظري كلها مرة واحدة للجزء اللي يخص القلب وبعدين تمتحن على المواد دي في آخر الترم، وبعدين الجهاز العصبي مثلا تاخد كل ال يخصه وتمتحن وهكذا.
خلصتوا إمتحانات سنة سادسة على خير؟ 🎉
بعدها بكام شهر تظهر نتيجتها ومتاح التظلمات 🤝
وبعدها هتطلع نتيجة المجموع التراكمي (مجموع درجاتك في ال6 سنين)
بعد المجموع التراكمي عندنا حاجتين مترتبين عليه:
1. الترتيب العام للدفعة (الأول ع الدفعة والتاني وهكذا)
2. التقدير العام: امتياز، جيد جدًا، جيد، مقبول.
⚠️ممكن تسمع لفظ "تقديرك(وليكن امتياز) مع مرتبة الشرف" معناها إن مفيش ولا سنة من ال6 سنين تقديرك قل عن امتياز، وهكذا.
المجموع والترتيب ده بقى هيفرق معاك في كل حاجة تقريبا جاية في طريقك بعد كده، فلازم تركز وتذاكر من الاول 😀
📍سنة الامتياز:
زي ما قولنا هي سنة تدريب إجبارية، وهي شرط عشان يبقي معاك شهادة معتمدة سواء جوا مصر أو براها 😅
بمعنى انك دلوقتي خلصت ال 6 سنين بيكون معاك "شهادة تخرّج مــؤقـــتة" لحد ما تاخد الامتياز بتاعك ويبقي معاك شهادة رسمية 👌
سنة الامتياز بتبقي 12 شهر بالتمام والكمال بتبدأ غالبًا في 1 مارس بعد النتيجه ما تظهر، وبتشتغل طبيب إمتياز في مستشفيات الجامعة الرئيسي وبتتعامل مع المرضى في عنابر وعيادات المستشفي وبتكون مسئول عنهم وعن متابعة علاجهم ونباطشيات نهار وليل وكده.
ممكن تقضي جزء من سنة الامتياز في مستشفيات جامعة تانية أو في مستشفيات وزارة الصحة في أي محافظة تانية عادي، وممكن تقضي كذا شهر منه في دولة تانية خالص بس بتتدرب على تخصص معين على حسابك.
⚠️كل ده له شروط وإجراءات وقواعد بتعرفها بعد كده
بعد ما خلصت الامتياز علي خير مبروك انت اخيرًا معاك بكالريوس الطب والجراحة وفعليا اتخرجت وبيعملولك حفلة التخرج الرسمية، وهتنضم بعدها لنقابة الأطباء وتعمل "ترخيص مزاولة المهنة" ومهنتك "طبيب بشري - ممارس عام" مبروووك 🎉🎉🎊
بس لا البوست مخلصش لا 😁
وافتكر ان انت اللي دُست "قراءة المزيد" و أنت ال اخترت تكمل اوكيه؟ 🤭😂
📍 التكليف
هو فترة عمل إجبارية لأي طبيب عاوز يشتغل ويكمل في وزارة الصحة، أنت بتتوزع فيها على الوحدات الصحية ومراكز طب الأسرة ومكاتب الصحة.
وفيه نوعين رئيسيين:
1. إما بتتوزع على وحدة داخل المدينة
2. أو بتتوزع على المناطق النائية زي المحافظات الحدودية (مطروح وسينا والبحر الأحمر وأسوان وغيره، أو بعض المناطق الصحراوية)، وال غالبا بتبقي باختيارك.
طيب ليه واحد هيروح باختياره الأماكن دي؟ 🤔
بيقي ليها مزايا مالية وإدارية ومزايا ليها علاقة بالنيابات هتعرفها بعدين.
طيب التكليف بيحصل إزاي؟
في آخر شهرين في الامتياز (الي هما يناير وفبراير) كل الدكاترة ال اتخرَّجوا من نفس الدفعة على مستوى الجمهورية بيسجلوا رغبات التكليف على النت في مكان وموقع واحد، والرغبات ليها قيود.
📍خلصنا 6 سنين دراسة وسنة امتياز وتكليف، نروح للتخصص بقي 😁
التخصص هو آخر حاجة ف طب، ومنطقي جدا تبقي فاهم فكل التخصصات عشان لو جالك مريض تعرف تشخصه صح، وكمان لو هو مش تخصصك تعرف توجهه للتخصص الصح 👌
📍وبعدين مرحلة النيابات ال فيها التخصص الفعلي وال بيكون من خلال إنك تحضر ماجيستير في التخصص اللي إنت عايزه.
وبكدا تكون خلصت رحلتك الأكاديمية، وبتبدأ عالم الشغل وممارسة الطب

================

#الطب_البيطري 😍
لما عمو بيسألنا هتدخل ايه ي حبببي
طب بيطري يا عمو
خيال عمو: 🦓🐄 🐸
ودا للأسف حال معظم الناس في مصر لأننا معندناش الوعي الكافي ولا مدركين أهمية الكلية ومجال زي ده ودا دورنا في غرناطة اننا نقولكم على كل المجالات وفرص شغلها وأهميتها
ومتاكدين انكم بعد م تكملوا البوست هنغيرلكم الفكرة دي خالص عشان لما عمو يسالكم بعد كدا تردوا عليه وبقوة😎
الكلية ترتيبها الخامس في مصر بعد البشري واسنان والصيدلة وعلاج وبتاخد من رنج ٩٥ ل ٩٧
مدة الدراسة فيها 5 سنين بتتخرج بعدها ببكالوريوس الطب البيطري.
-بالنسبة للمواد :
بتكون زي أي كلية طبية وطبعا مش محتاجين نقول إنه الدراسه كلها انجلش بتدرس في أول سنة تشريح وفسيولوجي وهستولوجي وكمياء حيوية وبيولوجي ووراثة وسلوك حيوان .
-والتشريح في أولي مثلًا بيكون تشريح عضم ومن أول سنة تانية بنبدأ نشرح الجسم كله organsو brain .
-سنة تانية وتالتة بنكمل المواد الأكاديمية (باقي الهستولوجي والفسيولوجي والكمياء ) و التغذية والتربية والإنتاج الحيواني ، تربية وإنتاج الأسماك🐟 ، والفارما والبكتيريا والدواجن ... الخ .
-أما بقى ياسيدي من سنة رابعة هتبدأ الشغل الجد الممتع 😍
و هو بيبقي طب شرعي وباطنة وجراحة وتوليد وإنتاج ألبان والرقابة الصحية ع اللحوم وهكذا .
-والكلية طبعًا بيكون فيها عملي كتير مش كله نظري و ابسط ياعم سنة أولي كلها بتكون في المشرحة يعني مفيش تعامل حقيقي مع الحيوان وهو حي..
-نيجي لمجالات الشغل :
الشغل مش مقتصر بس على التشخيص لا مجالات شغل الطبيب البيطري كتييييرة جدا حدث ولا حرج 😁
الطبيب البيطري بتاع كله (هو طبيب بشري وأسنان وصيدلة ف شخص واحد ) شخص واحد بيشخص ويحدد ويعالج ويوصف الدوا ويوفره ويحس بكائن حي خلقه ربنا بيحس وبيتألم ولكنه لا يستطيع وصف ما يشعر به وهنا يتجلي دور طبيب الإنسانية 😍.
-إنت ممكن تفتح صيدلية بيطرية و يكون مشروع حلو جدًا ..
أو ممكن عمومًا تشتغل في أي صيدلية بيطري.
-ممكن تشتغل كمان في مزارع دواجن أو سمك أو خيل أو إنتاج حلاب أو إنتاج لحوم ، فيه كمان مزارع الجيش.
- أو عيادة بيطري سواء تفتح عياده لنفسك أو تبدأ في الأول مع حد ودي بيكون فيها التشخيص والعلاج . 😃
وممكن لو مش حابب تتعامل مع الحيوانات الكبيرة زي الحصان والبقر وكده تفتح عيادة pets بس وتتعامل مع الققط والكلاب بس🐱🐶 .
- قدامك كمان الشغل في المستشفيات البيطري وممكن كمان تشتغل في معمل تحليل أو تفتح معمل تحاليل بنفسك بس لازم بعد ما بتاخد دبلومة تخصص 💉.
-وعندك كمان مجال الجودة و المراقبة الغذائية ودي بتكون مشرف على المستشفيات و مدن جامعية وموانيء ومطارات وأماكن سياحية والجمارك والمطاعم والمصانع والشركات زي جهينه والمراعي .
-أو ممكن تشتغل في صناعة الادوية أو تجارتها أو في شركات أدويه عمومًا أو ال (medical rip ) اللي هي دعاية للأدوية وده كويس جدًا .
-أو سهل إنك تعمل أي مشروع مع أصحابك لتربية حيوانات، ده غير مديريات الزراعة والوحدات الييطرية والحاجات ديه .
-اما الولاد فأنت ممكن بعد م تخلص تاخد ٦ شهور ظباط متخصصين ومنها تخرج تشرف في مزارع الجيش
-وبالنسبة للخمسة الأوائل فممكن تتعينوا في الكلية أو معهد البحوث أو تتعين في وحدات بيطرية.
-اما بالنسبة للتخصصات والأقسام :
فعمومًا الكلية مبتتخصصش فيها غير لو هتعمل ماجستير و دكتوراه ، ووقتها ببتاخد تخصص معين وبتحضّر فيه دراستك.
-غير كده مفيش غير جامعة بنها هيا الي بيكون فيها قسمين : يا قسم فارما يعني أدويه وكده , أو فود كونترول اللي هو جودة ومراقبة أغذية , وبتختار من أول سنة وقبل ما تدخل هتاخد أنهي قسم عشان على أساسه بتحدد المواد اللي هتدرسها.
في النهايه احنا حابين نعرفك إن الطب البيطري طب وقائي رقابي علاجي .. وهو خط الدفاع الأول عن صحة الإنسان (غير دوره طبعا ف تحسين صحة الحيوان ) لأنه بيمنع انتقال أكتر من 200 مرض مشترك من الحيوان للإنسان واللي ممكن تسبب الوفاة وبكدا نقولك ان الطب البيطري بيلعب دور مهم جدا في حياتنا ك بشر مش بس حيوانات..
-وفي الأول والآخر إنت بتنقذ روح كائن بيتألم , واللي من غير الروح ديه دايرة حياتنا مش هتكمل , فخليك فخور باللي إنت بتعمله وهتدرسه وكل واحد ليه دوره الي اتخلق عشانه.. 😉
=================

#كلية_العلوم
النهارده هكلمكم عن الجنـدى اللى ميعرفهوش ناس كتير واللى بالإجماع من اصعب الكلـيات اللى موجودة .. علشان لما تيجى متتفاجئش 😉
كليــة الدحيحة والناس اللى دماغهم بتلسع منهم، الكليه الام لكليات الطب والصيدلة .. بطل الحلقة وكل حلقة.. #كلية_العلوم 🔥
الكلية اربع سنين وبتقبل علمي علوم ورياضه لكن التنسيق بيختلف وموجوده في معظم جامعات مصر وحالياً بتدرس بنظام الساعات المعتمدة كمان الدراسة بالإنجلش وطبعا اول م بتقرأ دا بتتخض بس متقلقش😂
كلنا حصلنا نفس اللي حصلك دا وحاليا لو ذاكرنا بالعربي نتلخبط
 بس فيه نقطة مهمه جدا وهي إن علوم بتختلف من جامعه ل جامعه في التخصصات والأقسام يعني ممكن تلاقي قسم هنا متلاقيهوش هناك وهكذا
نيجي بقا لطبيعة الدراسة في الكلية.
كلية علوم من الكليات العملية والنظرية في نفس الوقت وعلى حسب تخصصك وقسمك يعني القسم الي انت فيه عملي اكتر ولا نظري والكليه مش صعبه ومعقده علي اد ما هيا تقيله ومودها دسمه
في اول سنة عندك نظامين
١.يا تدرس كل المواد بتاعت كل الاقسام بس فيه مواد اساسيه لازم تاخدهم ( رياضه – كيميا «عضوية وغير عضوية» – فيزيا - جيولوجيا - مواد أدبية زي حقوق إنسان) وباقي المواد بتختلف من جامعه للتانيه والتخصص بيبقى حسب تقديرك في أولى
٢.يا تتخصص من أول سنة زي نظام جامعه قناه السويس وبيبقى نظام اختيار القسم حسب المجموع في الثانوية العامة وماشيين بنظام المجموع الاعتباري ودا بيتغير كل سنة
ندخل بقا في الأقسام .. وبكرر عليك الاقسام دي هتلاقيها في جامعه وعادي متلقيهاش في التانيه ..
وفيه اقسام لازم تدخلها لو انت علمي رياضه بس او لو انت علمي علوم بس ..
وفيه اقسام مشتركه ممكن تدخلها لو انت علوم او رياضه ..
وفيه اقسام اي حد يقدر يدخلها عادي يعني بيختلف حسب القسم وحسب نظام الجامعه
فبص يا سيدي اللي هعمله اني هذكرلك اغلب الاقسام اللي موجودة في الجامعات وانت بدورك هتدخل على موقع الجامعه بتاعك وتشوف اللايحه بتاعتهم وتشوف الأقسام ايه وكل التفاصيل. تمام؟
تمام.🤝
(1) أقسام بتقبل القسمين "علوم ورياضة" :
١.قسم الكيميا
٢.قسم الكيميا الحيوية "بايوكيمستري"
٣.قسم الكيميا الحيوية والحشرات
٤.قسم الجيولوجيا
٥.قسم الجيو فيزيا
٦.قسم الجيولوجيا والكيميا
(2) أقسام بتقبل علمي علوم "فقط" :
١.قسم الميكروبيولوجي
٢.قسم الكيميا الحيوية
٣.قسم البايوتكنولوجي
٤.قسم نبات وكيميا
٥.قسم حيوان وكيميا
٦.قسم الميكروبيولوجي والكيميا
(3) أقسام بتقبل علمي رياضه "فقط" :
١.علوم حاسب " computer science "
٢.بايو فيزيكس
٣.الالكترونيات والكيمياء التطبيقية
٤.الرياضة البحتة والاحصاء
٥.الكيميا البيئية
٦.قسم علوم البحار
وفيه جامعات بتدمج الاقسام مع بعض يعني مثلا
١.فيزيا وعلوم حاسب
٢.فيزيا ورياضه
٣.رياضه وعلوم حاسب
٤.فيزيا وفلك
وهكذا ..
طبعا انت متنح دلوقتي ولا فاهم اي حاجه من اللي بقولها دي😂
متقلقش انا هديلك نبذة عن بعض التخصصات اللي ذكرتهم فوق دول واللي اغلبهم هتلاقيه في معظم الجامعات بس صحصح معايا كدا 💪
• علوم حاسب : بتتعلم البرمجة والسوفت وير والهارد وير و رغم ان حاسبات و معلومات فيها سوفت وير و هارد وير بس في علوم حاسب لغات البرمجه فيها بتبقى عتيقه و دماغك بتبقى اعلى بس المشكله في المواد نفسها لكن لو خدت كورسات بره بتبقى اعلي من بتاع حاسبات ومعلومات بكتير
وبعد الكليه ممكن تشتغل في البرمجه وفي اي شركه وتعمل سيرڤر والمواقع بتاعتها وممكن كمان تشتغل في موضوع الsecurity من الهاكرز.
•رياضة : لو بتحب الرياضه حب جنوني ادخله يا كبير لكن لو كويس فيها بس أو مش بتحبها يبقي انساها خالص و شغلها في مصر للاسف قليل
ممكن تشتغل في معامل الابحاث او  دكتور في الجامعه او تاخد سنتين تربيه و تبقي مدرس.
•علوم فضاء : هتدرس كل حاجة خاصة بالاتصالات و الأقمار الصناعية و مركبات الفضاء و الميكانيكا السماوية والهندسية وهتعرف منه شكل و تركيب الأقمار الصناعية
فرص الشغل زى المرصد - هيئة الأرصاد الجوية - البحث العلمى - المركز القومى للبحوث - مراكز مراقبة الطقس - المراكز البحثية الفلكية - الاستطلاعات فى الجيش و المخابرات العامة.
•الفيزيا : قسم اعتبره للعباقره فقط وعاوز واحد بيعشق فيزيا جدا
بيدرس فيزيا كهربيه و حراريه و شغله في معامل الابحاث او  دكتور في الجامعه او تاخد سنتين تربيه و تبقي مدرس وفي مصانع الاجهزه الكهربيه وشركات الكهربا  
•كيميا حيويه : بيدرس العمليات الحيويه في جسم الانسان زي البروتين و الفيتامينات و الكربوهيدرات و الاحماض النوويه و الانزيمات و الهرمونات و الاورام كمان بيدرس البيولوجي بتاع الخليه و علم الوراثه و المناعه
شغله بيقى في معامل التحاليل ولو عاوز تفتح معمل بأسمك لازم تاخد دبلومه تحاليل طبيه و طبعا شغله موجود في شركات كتير زي الادويه وهكذا
•كيميا ميكروبيولوجي : بيدرس الفسيولوجي بتاعت الكائنات الدقيقة (بكتريا وفيروسات و....)  وحياتها وكل حاجه و تأثير الميكروبيولوجي على الانسان والامراض اللي بيسببها و الانزيمات و السموم الميكروبيه و الهرمونات النباتيه  و شغلها موجود برضه في التحاليل و شركات الادويه و شركات الكيماويات  
•قسم جيولوجيا : شغله موجود في شركات البترول و شركات المياه و جهاز شئون البيئه و قطاع الاثارو ممكن يشتغل اوبيريشن (عمليات يعني ) في المكتب وده اللي بيعمل الخرايط مش الجغرافيه لأ خرايط تانيه هتعرفوها قدام شويه 😃 و مش كده بس ده كمان بيدرس كيميا و بيشتغل بيها و شغل الكيميا بقي في معامل التحاليل و شركات الادويه و الاسمده و ..... قولناها كتير بقا نقول تاني؟😂
•قسم حيوان : بتدرس فيه البيولوجي بتاع الحيوان و الفيسيولوجي والفقاريات واللافقاريات وعلم الوراثه والانسجه و الاجنه و المناعه
وشغله في معامل التحاليل و شركات الادويه برضه و شركات كتير زي ما قولنا الكيميائين بيشتغلوا في كل حته 💪😎
•قسم نبات : بتدرس فيه البيولوجي بتاع النبات و شويه فيسيولوجي للنبات و تصنيفاته و العوامل البيئيه اللي بتأثر فيه و التلوث و الانزيمات و الطحالب و تشريح النبات و شويه في علم الوراثه و شغله بقي في معامل الابحاث و التحاليل و شركات الادويه
•قسم حشرات : بتدرء في القسم ده البيولوجي بتاع الحشرات و تشريح انسجه الحشرات و المورفولوجي بتاع الحشرات و تصنيفات و تقسيمات الحشرات و علم بيئه الحشرات وعلم الطفيليات والوبائيات والتحاليل الطفيليه و الفيسيولوجي بتاع الحشرات ومكافحه الافات والسيطره عليها و المناعه و الميكروبيولوجي و الباثولوجي للحشرات و علم السموم
وشغله في معامل البحوث الزراعيه و معامل التحاليل و الشركات زي الادويه
•قسم كيميا : الكيميا بقي انتو عارفنها عضويه و حراريه و كهربيه و تحليليه و حاجات كتييييييييييير هتدرسوا كيميا لحد ما تحلموا بيها و انتو نايمين 😃 و شغل القسم ده في كل شركات مصر مفيش شركه من غير كيميائي من ادويه و اسمده و مستحضرات التجميل و الشيبسي و البيبسي و كل حاجه لازم يدخل  فيها كيميائي و طبعا ممكن يشتغل في معامل التحاليل
•قسم بحار : بيدرس علوم البحار بكل تفاصيها وبيأهلك انك تشتغل في مجال البحوث الاساسيه والتطبيقه في مجال علوم البحار وبتدرس فيه الكوارث الطبيعيه البحريه والظواهر المختلفه وبتدرس الشواطيء المرجانيه والرسوبيات وقاع البحر وازاي تدور عن مصادر للثروه المعدنيه
وعندك اكتر من مجال ومكان تشتغل فيه بعد ما تتخرج زي المحميات الطبيعيه وشركات البترول ومراكز الغوص وشركات أعالي البحار و محطات المياه والتحليه ومصانع الأدويه والمنظفات والمزارع السمكيه وشركات تصدير المنتجات البحريه وشركات تصنيع الأسماك والمركز القومي للبحوث وزارة شئون البيئه
•قسم جيوفيزيا : الجيوفيزيا هي تطبيق لقوانين الفيزيا على الجيولوجيا اللي هي علوم الارض يعني و هي بقا في شغله تعتبر تنقيب اولي قبل ما احفر عشان اطلع الحاجه اللي انا عاوزها من تحت الارض ( بترول - مياه - معادن - ......... )
بتشتغل شغل الجيوفيزيكس اللي هي زي الاستجابه الكهربيه او المغناطيسيه للارض و استخدم موجات السزميك و الجرافيتي عشان اعرف فين المكان الغريب اللي في استجابه مختلفه عن اللي حوليه فاكيد المكان ده هو اللي فيه الحاجه الغريبه اللي انا عاوزها ( البترول و غيره )
وطبعا مطلوب في الشغل في شركات البترول و شركات المياه و تبع الاثار كمان بس البترول هو الاكثر شيوعا
•قسم بيوفيزياء : ودا هتلاقيه في جامعه القاهره وبيستوعب حوالي ٥٠ طالب والبيوفيزيا هي علم قائم بذاته وتم اعتماد أربع تخصصات رئيسية وهى : البيوفيزياء الجزيئية و البيوفيزياء الطبية و البيوفيزياء النظريه و البيوفيزياء البيئية..
وقدامك اماكن كتير ممكن خريج قسم بيوفيزياء يشتغل فيها زى المعهد القومى للأورام و مستشفى القصر العينى والمعهد القومى لعلوم الليزر والمركز القومى للبحوث و معهد بحوث امراض العيون والوكالة الدولية للطاقة الذرية و مركز البحوث النووية ..
وممكن كمان تشتغل اخصائى التصوير الإشعاعى و العلاج الإشعاعى فى كذا مكان زى مستشفى القوات المسلحة ومستشفى 57357 و كايروسكان و ألفاسكان و اى مستشفى تانى و كمان ممكن تشتغل فى الطاقة النووية و الذرية.
لو انت مكمل قراءة لحد دلوقتي فأنا حابب اقولك نقطة مهمه جدا وهي أن كلية علوم من امتع الكليات اللي ممكن تدخلها وبتعلمك حاجات كتير كويسة بتعلمك تركز في كل حاجه حواليك وبتعلمك الإصرار والصبر زي البوست دا بالظبط كدا 😉
نكمل؟
نكمل.🤝😇
جينا لنقطة مهمه جدا واغلبكم مستنيها وهي التخصصات الخاصة اللي بيدفعلها فلوس أو تحديدا قسم البايوتكنولوجي🔥
بص يا سيدي
•قسم بيوتكنولوجي: قسم جديد و مش موجود في اي جامعه حكوميه في مصر غير القاهره وهتلاقيه في الجامعات الخاصه ك كلية زي (جامعة مصر للعلوم والتكنولوجيا)
فرص شغله موجوده في الشركات زي الادويه والشركات الصناعيه زي الالبان و المأكولات وكذلك في المستشفيات لعلاج الامراض الوراثيه وبرضه عندك استخدام تطبيقات البيوتكنولوجي في الصناعه و الزراعه و التحاليل الطبيه و في تطبيقات كتير موجوده..
طبعا القسم خاص المصاريف بتاعته 9 آلاف جنيه تقريباً في السنه + 10% زياده كل سنه و لما تنسيقك يجيب علوم و عاوز تخش القسم ده و انت بتقدم بتقول للشئون و انت بتسلمهم ورق التقديم انك عاوز تخشه لأنك هتخشه من سنه اولي علي طول و بيبقي فيه انترفيو بسيط كده
خلصنا الاقسام الخاصه؟
تؤتؤ فيه اقسام تانيه كويسة جدا زي
•قسم علوم البترول : ودا هتلاقيه في علوم اسكندريه والسويس وعين شمس
ودا مش مهندس بترول زي ما الناس فكره لأ بيبقى جيولوجي برضه و الفرق بينه و بين اقسام جيولوجيا العاديه الموجوده في الكليه ان قسم علوم بترول متخصص في دراسه علوم البترول بس لكن الجيولوجيا بترول و مياه و معادن
وفيه شركات زي شركه شلمبر جير ( من اكبر شركات السيرفيس كومباني ) الشركه المفروض انها بترعاك و بتوفرلك رحلات (بس الرحلات برضه بيطلعها اقسام جيولوجيا) و بتوفرلك فرص تدريب كتير (لأن اقسام جيولوجيا العاديه بتوفر فرص تدريب بس في تالته بس) ده توفير منهم لكن لو اي حد يقدر يجيب فرص تدريب لنفسه في اي وقت عادي و الشركه كمان بتوفر فرص شغل للاوائل
والمصاريف بتاعته 8 آلاف جنيه في السنه او ١٦ الاف بيختلف من جامعه التانيه عموما + 10% زياده كل سنه
• IMAK ميكرو وكيميا من ناحيه صناعيه
ودمتاح لعلمي علوم فقط
• Sim بتدرس سوفت وير والبرمجه
ملحوظة مهمه 🔥
فيه كليه اسمها علوم بنات مش موجودة غير في عين شمس واكييد واضح انها للبنات وبس عشان الفيمينست وكداهو😉😂
بس فيها حاجه كمان مختلفه عن الباقيين غير انها للبنات بس وان فيها قسم مش موجود الا في علوم بنات الي هو قسم التغذية وهو قسم مزدوج كيميا حيوي وتغذية وقسم كيميا حيوي ده من اعلي الاقسام في علوم وبتطلع منه اخصائي تغذيه
اخيرا والحمدلله وصلنا للنهاية
وزي ما انتو شوفتوا الكليه اد ايه واسعه ومتشعبه وكل قسم ليه فرص شغل واتنين وتلاته
والكلية مهيش رجل المستحيل وكلام الاحباط الي حواليها ده ملوش اي لزمة لان لا هتلاقي كليه سهله ولا هتلاقي كليه وبيططبوا عليك فيها ودا ساري ع جميع الكليات
===================
#كلية_علاج_طبيعي
◾دايما أول ما بتسمع علاج طبيعي بتتقفل كده لإن أول صورة بتيجي في دماغك هو إن علاج طبيعي = massage  مع إن في أقسام تانية كتير خلونا نبدء ونتعرف عليهم وعلى الكلية بشكل أوضح 👌
《علاج طبيعى 》
 نتمنى متزهقوش عمومًا 😴
◾كلية العلاج الطبيعى هى كلية طبية بتتقسم ل :
- 5 سنين دراسة
- سنة إمتياز
- سنتين تكليف
◾خريجين الكلية ليهم نقابة اسمها نقابة العلاج الطبيعى
◾الكلية دي في4 جامعات حكومية بس هما القاهرة وبنى سويف وكفر الشيخ وجنوب الوادي والسنة دي هتفتح كلية علاج طبيعي في جامعة بنها 👌
- القاهرة وبني سويف بيتوزع عليهم الطلبة ال في وجه قبلي وكفر الشيخ الطلبة ال في وجه بحري وغالباً هتبقى معاها بنها
◾طيب كل ده كلام عادى جدًا المهم دلوقتي أنا هعمل إيه في الكلية دي؟
- وعشان تعرف هتعمل إيه في الكلية دي لازم نفهم الأول يعنى إيه علاج طبيعى، وإيه وظيفته🤔
◾أول لما بتحصل مشكلة في جسم الإنسان ناس كتير بتتجه للعلاج الكيميائي رغم إن الجسم بيبقى محتاج العلاج الطبيعي من أول الإصابات الخفيفة لحد أكبر مشكلة بتمنع الإنسان من الحركة ووقتها بيلجأوا للمعالج الطبيعي
- ده غير الأضرار ال بتحصل نتيجه مشاكل 《الجهاز العصبى، المفاصل، العضلات، المشاكل ال بعد الجراحة، والاصابات الرياضية وكمان المشاكل ال بتحصل نتيجة إن السن بيتقدم زى خشونة الركبة والليلة دي.》
◾أكيد أخدت بالك كلمة مشاكل اتكررت كام مرة✍
أنت ال هتحل كل المشاكل دي بقى كلها، دورك إنك تحاول قدر المستطاع تحل المشاكل دي وترجع حركة العظام نفسها لطبيعتها 🤸‍♂️
◾وعشان تقدر تعمل ده فانتَ بتدرس أول سنتين مواد أساسية زى الأناتومى《 هو علم التشريح 》وعلم الانسجة وكيمياء حيوية وتمارين علاجية وهكذا
◾تانى سنتين بتبدأ تاخد مواد أو أقسام علمية
بتبدأ تدخل يعني في صميم المجال وتتعرف على مواد من أقسام مختلفة
زي《 قسم الباطنة والنسا وإصابات ملاعب وفيه حروق وقلب وباطنة وأعصاب وأطفال.》👨‍⚕️👩‍⚕️
- بس كل ده طبعًا من وجهة نظر العلاج الطبيعى والجزء الخاص بشغلك مش بتدرس تفاصيل كل ده زى بتاع بشري
◾وبتدرس التخصصات والاقسام كلها بس مش معنى كده إنك بتتخصص في حاجة فيهم، انت بتاخدهم عشان تتعلم وتبقي مجمع كله ومش بتتخصص غير لو حبيت تكمل دراسات عليا فساعتها بتختار قسم واحد بس تحضر فيه دراستك وماجستير ودكتوراه وكده.📚
◾وأكيد الدراسة بتكون بالانجليزي بس انجليزي علمي يعني مصطلحات ومفاهيم والكلية طبعا بتجمع بين الجزء النظري والعملي 🤓
◾الدراسة بتعتمد بشكل أكبر على الجزء العملي يعني ال بتدرسه في محاضرات بتطبق عليه في سكاشن وبتبدء ممارسة فعلية من سنة تانية وطول مدة الدراسة أنت بتجرب وبتمارس بنفسك وده يمكن بيميز الكلية دي عن غيرها من الكليات🏛
◾ومن أول تالتة لو أخدت الموضوع في الكلية جد واجتهدت ممكن تنزل تشتغل وتدرب في مراكز علاج طبيعي أو مستشفيات وبتبقي أكتر الحالات ال بتيجي ألم الضهر وشلل الأطفال و خشونة الركبة
◾كده الحمد لله خلصنا ال4 سنين كلية وداخلين على الإمتياز أهو وقربنا نتخرج😀
◾سنة الامتياز دي عبارة عن ايه؟
- الامتياز بيكون 12 شهر بتلف فيها على الرواندات حسب ما بيوزعوك يعني كل شهرين بتاخد راوند في قسم معين، يعنى بتاخد عظام شهرين وبعدين نسا شهرين وهكذا علي كل الاقسام وبتيجي في آخر شهرين بيبقي راوند بتختار هتاخد فيه إيه بنفسك على حسب أكتر قسم انت حابه يعني لو حابب مثلًا أعصاب فبتختاره 🙏
◾الإمتياز بيكون عادة حسب موقعك الجغرافي بس كمان تقدر تقرر بنفسك تروح فين سواء القاهرة أو الأقاليم وممكن لو تعرف دكتور شاطر أو مركز علاجي معين كمان تروح تاخد الإمتياز من عنده ✅
◾خلصنا 4 سنين الدراسة وسنة الامتياز  ها إيه كمان؟!
- فيه كمان سنتين تكليف
- وإيه الفرق بين الامتياز والتكليف⁉️
- الفرق إنك في امتياز بتتعلم وبتتدرب كأنك في الكلية لسه  بس بتتعلم بشكل عملي مش نظري بس في التكليف بتبقي زي دكتور حر بيشتغل بنفسه من غير ما يكون حد لسه بيعلمك ويدربك.😅
◾التكليف في معظم الأحيان بيعتمد على تقديراتك وعشان تضمن إن يجيلك تكليف في مكان قريب بالنسبالك ومريح ذاكر كويس😎
◾الموضوع بيتم من خلال التوزيع الجغرافي وفيه استئناءات بتحصل طبعًا منها مثلًا استثاءات للبنات المتزوجة
◾خلصت تكليف ؟!
- الحمد لله دلوقت انت بعد ما بتخلص التكليف والامتياز بيبقي اسمك ممارس عام 🥣
- وبعد ما يبقى معاك ماجيستير ودكتوراه في التخصص ال انت بتختار تعمل فيه دراسات عليا، بتكون أخصائى علاج طبيعي ومن حقك تفتح مركز العلاج الطبيعي الخاص بيك
◾طبيعة الشغل إنه بيتحولك الحالة من دكتور بشري عظام أو أعصاب و انت بتعمل التشخيص من جديد عشان لو التشخيص غلط المريض هيضيع بعد أما نوصل للتشخيص السليم، وبتحط الخطة العلاجية للمريض 📋
◾طيب سؤال بيلح على كتير منكم هل الكلية صعبة؟
- مفيش كلية سهلة وكلية صعبة كله فيه الصعب والسهل ولو انت عاوز تثبت نفسك متحاولش تدور على السهولة أو الصعوبة دور على ال هتلاقي فيه نفسك واجتهد وأسعى دايما للأفضل👌
◾وبلاش كل تفكيرك يكون إن تنسيقك رماك في الكلية ودي ال موجودة قدامك وخلاص بشكل عام مجال العلاج الطبيعى يعتبر جديد ومطلوب جدًا غير إن عدد خريجينه قليل نسبيًا بسبب قلة كليات العلاج الطبيعى في مصر، غير إنه مطلوب في الدول العربية وفي أوروبا بشكل كبير والعلاج الطبيعي عموما آمن أكتر لأنه ملهوش side effects لذلك ناس كتير بتفضله😀
◾ بشكل عام بتطلع من الكلية دي دكتور واخصائي علاج طبيعي
- ممكن تشتغل في اي مستشفي او تفتح عيادة ليك او تشتغل في عيادة مع حد تاني، أو تشتغل في الأعمال الاستشارية في مجال العلاج الطبيعي أو وحدات علاج الروماتيزم و المراكز العلاجية طبعا
- ده غير مجال الأبحاث والسلك التدرسي
◾مجال العلاج الطبيعي مش مفاصل وتغذية وأعصاب بس، في نسا وجلدية.
-والتخصص الواحد جواه أفكار إبداعية كتير لأنه كمجال مُستحدَث ومُطوَر على طول.
- الشغل بعد الكلية موجود وأكتره بيبقى شغل علاج طبيعي للعظام والأطفال والأعصاب دول اكتر حاجات مطلوبة 🤝
◾نصيحة أخيرة إذا ربنا قدرلكم الكلية دى ف زمايلكم ال أكبر منكم بيقولولكم عندكم مادة اسمها أناتومى《 Anatomy 》
مهمة جدًا ذاكروها كويس واتأسسوا فيها صح عشان هتنفعكم بعد كده في شغلكم 👀
بالتوفيق يا دكاترة 🌸
=====================
#كلية_الصيدلة
◾خلال عمرك كله أكيد مرت عليك خناقة قوية جدا وهي هل الصيدلي بياع ولالا؟🤔
- تعالوا نشوف يعني إيه صيدلي ويعني إيه كلية صيدلة وهنسيبلكم انتوا القرار يلا بينا 🤓
◾لو حابب تدرس تكوين الأدوية وازاي تقدر تتعامل مع كل حالة مرضية بنوع علاج مختلف يبقى ده مكانك👌
◾ ناس كتير هتقولك إنت فاكر يعني إنك أنت ال هتخترع الدوا ده إنت يدوب بس بتعرف المكونات
- طب السؤال هنا حضرتك ما أنا لما هعرف المكونات وهعرف إيه ال بينفع مع كل حالة مش ممكن أطور دوا يزيد فعالية تأثيره؟
◾كلية صيدلة بتجمع بين 3 كليات في كلية واحدة لأنك فيها بتدرس مواد من علوم زي 《الكيميا العضوية والغير عضوية والتحليلية والفيزيا وغيرهم》
وبتدرس كمان مواد من طب زي 《أناتومي وهيستولوجي وفيسيولوجي》
ده غير مواد كلية صيدلة نفسها اصلا
◾كلية صيدلة في منها أنواع كتير بس المتعارف عليه في مصر هي الصيدلة ال general ومؤخرا ظهر قسم جديد في مصر هو ال clinical
◾طيّب إيه قسم clinical ده ؟ 👀
- كلينيكال :💉
يُعتبر قسم خاص في الكلية بيتدفعله مصاريف كل سنة والمصاريف بتختلف من جامعة لجامعة ومن سنة لسنة
- بالنسبة للدراسة فأنت في القسم ده بتدرس مواد قسم جينيرال عادي + مواد من طب متقسمة على 3 سنين لمواد جينيرال + 2 سنة مواد من طب
- أما الشغل بقى ففي الأغلب بيبقى في مستشفيات والصيدلي الكلينيكال كمان بيدخل غرفة العمليات مع الدكتور البشري بحيث إن الدكتور البشري يشخص الحالة والصيدلي الكلينيكال يكتب الدواء ويتابع حالة المريض ويحدد الجرعات كمان 🏣
- بتدخلها بمجموع صيدلة العادي وبعدها بتبدء تحدد إنك عايز قسم كلينيكال وده بردو بيتوقف على الجامعة هل ليها شروط ومعايير مختلفة في قبول طلاب القسم ده ولالا
《ده بتعرفه لما بتروح تقدم في الكلية نفسها》🏛
◾مواد كلية صيدلة : 💊
- أول سنتين بتدرس مواد عامة وأساسيات كمان بتدرس مواد ممكن تساعدك في إدارة صيدلية او شركة أدوية كمان لو فكرت تفتح بيزنيس خاص بيك بجانب أساسيات في الكيمياء وغيرها من المواد
- في سنة 3 بتبدء دراسة صيدلة حقيقي فبتبدء تجرب الأدوية والجرعات وفاعليتها على عينات حية وحقيقية زي الضفادع والفئران🐸
◾طب نظام الدراسة بيبقى عامل إزاي؟!🤔
- نظام الدراسة في صيدلة زي أغلب كليات مصر للاسف مش بتديك المعلومات الكافية ال تقدر تواجه بيها سوق العمل فيما بعد و طبعا بتنقسم لجانب عملي وجانب نظري والجانب النظري محتاج فهم أكيد بس محتاج حفظ بردو 👇
- لذلك مَتتخيلش إنك هتدخل تستريح في صيدلة، الكلية من أكتر الكليات ال محتاجة مجهود .
- انتَ بتمتحن كتير على كل حاجة كويزات على النظري العملي وشيتات وشفوي وامتحانات بتستمر لغاية الفاينال، طول السنة امتحانات
- الفاينال هوَّ الأهم وعليه أكبر نسبة، إنما انتَ كل امتحان بتمتحنه بيكون عليه نسبة من التقدير الكلي.
◾صيدلة أساسها العملي لذلك هي كلية عملية من الدرجة الأولى، بتتعامل فيها مع معامل وعينات وأدوية ولازم تحضرهم عشان تقدر تفهم ده غير إن حضورك عليه درجات
كمان امتحانات الشفوي مهمة لأن الدكتور لازم يتأكد إنك بتعرف تتكلم وتتعامل مع الحالة لإن شغلك كله هيبقى مباشر مع المرضى
《عشان كده بنقولك ذاكر وأحضر السكاشن عشان تعرف تدينا دواء صح لما نتعب🙏》
◾المواد ال بتدرسها هتفيدك كأساسيات لشغلك بعد كده، لكن لوحدها مش كفاية زي ما قولنا فوق بنقولك تاني دور واقرأ وابحث عن مصادر بنفسك👍
◾بعد التخرج انتَ متاح ليك شغل كتير مش بس تقف في صيدلية لا انتَ ممكن كمان تشتغل في شركة أدوية سواء كان في الرقابة على الدواء أو كمندوب مبيعات للدواء و وممكن تشتغل في مصنع أدوية أو في مستشفى
- كمان الشغل في مجال التدريس في الجامعة متاح أكيد وأنت وشطارتك
- لو حبيت تشتغل شغل كلينيكال كمان تقدر تعمل دبلومة بعد التخرج
◾يُقال إنه ممكن من صيدلة تشتغل شغل بايوتيكنولوجي باعتبارهم في نفس محيط المجال بس الحقيقة إحنا معندناش معلومة أكيدة عن ده بس ممكن تبحث عنها لو حابب 📖
◾ممكن أي حد يشتغل في صيدلية ويتعامل مع مرضى ويديك الدواء ال الدكتور بيكتبهولك في الروشتة بس مش أي حد يقدر يعرف الدوا ده بيشتغل جوا جسمك ازاي ولا ممكن تبقى خطورته وال side effects بتاعته إيه
وإيه الأدوية ال مينفعش تاخدهم في نفس الوقت كل دي معلومات ميعرفهاش غير الصيدلي👨‍⚕️👩‍⚕️
◾صيدلة كلية ليها أهميتها ومحدش يقدر يستهين بيها لو بتحبها ومقتنع بدراستها فهي بترحب بيك جدا وبتتمنالك التوفيق والتقدم🌸
ها دلوقتي تقدر تقولنا الصيدلي بياع ولالا؟👀
===================
#كلية_طب_الأسنان.
أسنان من الكليات الممتعة ف دراستها وشغلها، وعشان كدا عدد مش قليل أبدا بيدخلها وهو حاببها فعلا، حتى لو جايب مجموع طب بشري.
ف خلينا نأكد ع فكرة إن الكلية ال إنت هتدخلها أيا كان مجموعها، لازم يكون ليك شغف واهتمام تجاهها، مش داخلها بهدف التفاخر أو عشان حد عايزك تدخل الكلية الفلانية 😅💔.
نبدأ مع طب الأسنان ونعرف عن دراستها، والعملي وكمان نظام الشغل بعد التخرج إن شاء الله 👏.
📍نظام الدراسة:
- أسنان 5 سنين + سنة امتياز في كل الجامعات بس تقسيمهم بيختلف..
بمعنى أن في جامعات:
1️⃣ بتعتبر أول سنة اعدادي وبيدرسوا فيها مواد من علوم زي كيميا وفيزيا وحيوان وأوقات تشريح ضفادع (زي اسكندرية وطنطا والمنصورة وسينا)
2️⃣ من أول سنة بيدرسوا مواد أسنان عادي من غير مواد علوم.
- وأيا كان تصنيف جامعتك من الاتنين، ف بتاخدوا مادة او اتنين من طب بشري بشكل بسيط مش بتوسع، زي التشريح، ولكنه خاص بالأسنان ف مادة اسمها "Dental Anatomy" ودي بتدرس فيها بالتفصيل تركيب كل سِنَّة.
-في السنين اللي بعد كده بتكون دراستك متخصصة أكتر ممكن تدرس مواد من بشري بس المعظم من أسنان زي في تانية وتالتة، وفي رابعة وخامسة بتدرس الجراحة والتقويم والجذور واللثة.
📍العملي:
- العملي معاك في السكاشن من أول سنة:
▪️لو عندك اعدادي بيكون تجارب فيزيا وكيميا وتشريح ضفادع.
▪️عملي أسنان في أول سنة شغل (أو لعب🥳) بالشمع وتسييح وتعمل مودلز للسنان كلها بمقاساتها وحاجة لعب ومتعة للصبح يعني 🥳
⚠️بس ممكن يبوظ منك ف الآخر وتعيده تاني 🤭😂💔
- تاني وتالت سنة العملي فيها بأدوات تانية بتعمل تركيبات وشكل الفك كله بأيدك.
- من رابع سنة بتبدأ تشتغل مع الpatients عملي في الكلية وتنزل عيادات، تعملهم حشو وتركيبات وغيره..
-بعد ما بتخلص بيكون عندك امتياز بتشتغل فيه ف الكلية، وبعد كدا ممكن تبدأ شغل خاص بيك في عيادات مثلاً تحت رقابة وزارة الصحة.
📍الشغل بعد التخرج:
بعد ما بتتخرج تقدر تشتغل ف عيادات طب الأسنان المتعارف عليها، من خلع وتركيب وغيره، بس في مجالات متوسعة أكتر تقدر تشتغل فيها، زي:
- ممكن تتخصص في مجال من مجالات طب الأسنان زي: جراحة الوجة والفكين، طب أسنان الأطفال وتقويم الأسنان والفكين وغيره.. (سواء هتشتغل ف عيادة مع دكتور تاني، أو هتفتح عيادتك الخاصة)
⬅️ عن طريق تحضير ماجستير وتكمل دراسات عليا.
- تقدر تتخصص في تجميل الفم والأسنان (التبييض والتركيب وغيره)
⬅️ عن طريق إنك بتاخد كورسات تجميل وتشتغل ف مراكز تجميل الأسنان dental care centers.
- عيادات طب الاسنان للأطفال بما إنهم بيخافوا جدا فبتكون دي عيادات مخصصة ليهم بيكون فيها حاجات بتجذب الأطفال زي شاشات عرض كارتون أو تشجعهم بهدايا أو بتستخدم معجون سنان بنكهات، أدواتك بتبقي مخصصة للأطفال بأشكال متخوفهمش. (عشان دكاترة الأسنان بيخوِّفوا معروفة 😂🙊)
وزي ما دراسة طب الأسنان ممتعة ف أنت شغلك فيها ممتع جدا كمان وإنت بتشوف نتيجة تعبك، وإن المريض بتاعك مبسوط بشغلك معاه وبقت أسنانه مريحاه وبيبتسم وهي مستريح 😁
======================
#كلية_حاسبات_ومعلومات
◾ دايما لما بتبقى قاعد في البيت وسط عيلتك ماسك التليفون ومش مركز معاهم بيبتدوا يتعصبوا منك ويقولولك سيب الزفت من إيدك😂
- طب إيه رأيك يبقى ليك مبرر تمسكه ولو حد قالك سيبه من إيدك ترد بكل ثقة وتقول أنا بشتغل😎
《حاسبات ومعلومات》
◾حاسبات ومعلومات كلية هندسية بتختص أكتر بالفرع الإلكتروني من حياتنا ولازم عشان تدخلها تبقى متأكد 100% إنك بتحب التصميم والبرمجة
◾لازم تبقى مهتم بالمواقع وال platforms المختلفة زي فيس بوك وانستجرام وجوجل مثلا
- طب ليه لازم تبقى مهتم؟
- ببساطة لأنك مستقبلاً أنت ال هتصمم مواقع زي دي فلازم تعرف المواقع دي بتتعمل إزاي وبتُستخدم إزاي
《أنت أملنا ركز وذاكر عشان مارك ميقولش علينا حاجة》
◾كلية بتخدم المجتمع بشكل كبير وبتسهل حياتنا جدا بشكل يومي ومش بس كده دي بتساعدك توصل لمرحلة من الرفاهية زي إنك تبقى قاعد في البيت وعارف أخبار العالم كله مجرد ما تفتح موقع أو أبليكيشن
◾ نيجي بقى لطبيعة الكلية و دراستها،
الكلية أربع سنين ، بتدرس فيها مباديء البرمجة والكمبيوتر و بتتعرف على ال Algorithm أو الخوارزميات وهي طريقة الحل وليه اسمها كده؟
- نسبة للخوارزمي عالم الرياضيات المعروف
◾الكلية مهمة أكيد وبقت من أحدث المجالات يعني
انت لو دخلت على《 جوجل》 وكتبت أفضل شغل في العالم دايما هتلاقي المبرمج مكتسح متعرفش عشان هما كدة فعلا ولا عشان هم الي بيعملو المواقع دي :'D
◾الكلية زي أي كلية في مصر لو اعتمدت عليها لوحدها مش هتعرف تواجه الحياة العملية بعد كده لازم تجتهد مع نفسك وتسعى إنك تتطور بما يعادل سوق العمل ومتعتمدش على أساسيات الكلية وبس
والمجال ده في كورسات مجانية كتير أشهرهم هيبقوا موجودين على يوديمي وكورسيرا لأنه واسع وممكن تتعلم لغات جديدة وتتقنها زي الjava و الp.h.p و غيره.
◾نبدأ نتكلم عن اقسام الكلية
اولا فى اقسام بتكون موجوده فى كل الجامعات الموجوده فيها الكليه فى مصر زى مثلا :    
《أ 》- اول حاجه قسم Computer Sciences الي معروف ب CS :
القسم ده من اجمل الاقسام في كلية حاسبات و معلومات
و ده لأنك هتاخد فيه لغات برمجة كتير من الموجودة في الكمبيوتر يعني مثلاً زي《 السي و السي بلس و السي بلس بلس و الاسيمبلي و السي شارب وغيره 》
- القسم ده علم الرياضة فيه مهم جدا فلو انت شاطر في الرياضة ادخل من غير تردد واعمل حسابك هتغرق في الأكواد "))
- المواد بتاعته بتختلف من جامعة لجامعة , لكن عموماً المواد  بتعلمك ازاي تترجم لغات البرامج و ازاي تدرس البنية التحتية للبرمجيات , لانك هتبقى مصمم برمجيات
كذلك بتاخد مقتطفات عن برمجة الشبكات ومواقع الانترنت
لكن دراستك في القسم ده بتنصب على برمجة اكتر
وطبعاً لقبك في مصر بيبقى مبرمج او مطور و رسمياً اسمك اخصائي برمجة
 بره مصر : مهندس برمجيات
المستقبل في القسم ده مشرق جداً , و بره المجال ده بيبقى له اهتمام اكبر و مجالات شغله اكتر بكتير من مصر ومحتاجة واحد ذكي وقادر يطور نفسه أول بأول
《ب》- تاني قسم هو نظم المعلومات Information Systems Department = IS :
قسم نظم المعلومات قسم كويس جدا وطبعاً نظم المعلومات بتدرس برمجة و شوية من شبكات الانترنت و الاتصالات و شوية من مواد التسويق وادارة الاعمال وده أكيد هيفيدك لو حبيت تشتغل في حاجة بعيداً عن البرمجة شوية
- طبعاً البرمجة هنا نقصد بيها برمجة قواعد البيانات S.Q.L
إلا انه برضه بتاخد شوية لغات من البرمجة مش كلها
بس دراسته بتقوم على قواعد البيانات
- المواد باختصار بتتكلم عن التجارة الالكترونية , وبرمجة قواعد البيانات و هندسة المعلومات , و كمان بتتكلم عن نظم المعلومات الادارية و الجغرافية , و تطوير العمل المكتبي
 فيما معناه ازاي تتعلم تصمم برامج لإدارة الشركات و البنوك  و ازاي تخزن بيانات الشركة كلها على برنامج واحد او على موقع انترنت واحد
لقبك جوه مصر بيبقي : اخصائي نظم او مطور او مبرمج
بره مصر بقي: مهندس معلومات , او مهندس معلوماتية
◾كل الخريجين من القسم ده بيشتغلوا في البنوك و في الشركات الكبيرة , بل ان بعض كليات الحاسبات بتهتم بالقسم ده اكتر من غيره, لان الشغل هنا بيبقى احسن كمان ومعظم بيانات العملاء في اي شركة القسم ده هو الي بينظمها.
وشغله كله بيانات يعني حاجة كدة زي السجل المدني اعوذ بالله ايه التشبيه السيء ده ما علينا ندخل في اخر قسم :'D
《ت》- تالت وهو قسم تكنولوجيا المعلومات Information Technology Department = IT :
و هنا بتتعلم ازاي تبرمج شبكات الانترنت و تعرف ايه هو الانترنت اساساً و ليه اتعمل و مين عمله و تتعلم بردو ازاي تبرمج مواقع الانترنت الكبيرة و هتاخد لغات برمجة خاصة بالمجال ده زي《 الفي بي سكريبت و الروبي و البايثون و الجافا طبعاً 》
- دراسته ممتعة جداً
المواد بتتعلم فيها ازاي تبرمج الشبكات وازاي تبرمج مواقع الانترنت الكبيرة , و فيها مواد اتصالات بردو
وبيقي اسمك في مصر : مبرمج او مطور
بره مصر : بيبقي اسمك مهندس شبكات
القسم ده طبعاً موجود في اغلبية كليات الحاسبات و المعلومات بس مش كلها
◾اقسام بقى موجوده فى بعض الكليات زى :
1-قسم نظم الحاسبات
2-قسم الحسابات العلمية
3-قسم العلوم الأساسية
4-قسم نظم المعلومات الحيوية 《 بايو انفورماتيكس》
5-قسم نظم المعلومات الجغرافية
6-قسم هندسة البرمجيات
7-قسم بحوث العمليات ودعم اتخاذ القرار
8_قسم الوسائط المتعددة
◾عايزين نتكلم تحديداً عن قسم نظم المعلومات الحيوية
《بايوانفورماتيكس》:
- القسم ده تحديدا بيقبل من علمي علوم
يعنى ايه Bioinformatics معلوماتية حيوية ؟
*Bioinformatics = life science + computer science  *
يعنى ده مجال بيدمج بين علوم البايولوجى و علم الكمبيوتر
-طب هندرس فيه اى ؟
هتدرس فيه biology و organic chemistry و bio chemistry و molecular biology و احصا و فيزيا و رياضة و مواد computer science زى مقدمة فى علوم الحاسب و برمجة و هياكل بيانات و مواد تانية مش هتفهمها دلوقتى (دى المواد العامة ال هتاخدها فى السنين الاولى) بعد كدا بيتم الدمج .
Medical informatics
المعلوماتية الطبيه
الفرق باختصار هيا نوع الداتا اللى داخله لكل منهم
يعنى Medical informatics خاصة بcases لمرض الانسان يعنى يهمه صحة الانسان يعنى بيتعامل مع داتا تخص المريض و العلاج بتاعه و كدا
لكنbioinformatics بيهتم بالداتا الحيوية DNA او RNA او بروتين و كدا و بتعمل تطبيقات تساعد المجال الطبى بردو و الزراعى و الصناعى و البيئى بردو
و حاجات تانية كتير بس ده الفرق البسيط
◾في النهاية عايزين نقولك شوية حاجات ممكن تساعدك :
1 -اعتمد على نفسك مش على الجامعة
2- شركة مايكروسوفت بتعمل كل سنة مسابقة على مستوى كليات الحاسبات اللي في الجمهورية كلها المسابقة دي عبارة عن انهم بيختاروا افضل مشروع تخرج و اسمها Imagine Cup
الفايز فيها بيضمن شغله في الشركة نفسها
《المسابقة كانت بتتم السنين الفاتت بس منعرفش مؤخراً لسه قائمة ولالا》
3 - في مسابقة عالمية اسمها ACM لو كسبت وطلعت من اول 3 مراكز في المسابقة مع فريقك فأنت وفريقك هتتخطفوا من شركة جوجل لأنهم بيحبوا الناس المتميزة وغالبا هم ال بيكسبو المسابقة دي
《اختار تيمك كويس بقى》
4 - الدراسة في اي كلية حاسبات بتبقي بالإنجليزي ما عدا متطلبات الجامعة 《ال هي حقوق الانسان و جودة وغيرها》
5- ممكن طالب الحاسبات ياخد كورسات هاردوير , بس طبعاً مش بقوة مهندس الحاسبات
6- فقط عليك في الكلية دي انك تجتهد وتبحث عن مصادر لنفسك بنفسك وتدور على كورسات تفيدك في مجالك وده هيساعدك أكتر توصل لأهدافك
7- كل طريق في أوله صعب لذلك متزهقش بسرعة خلي نفسك طويل وشد حيلك وأبدء

=====================
#كلية_التمريض
◾ تمريض من مرّض يعني داوَى
تخيل لما مهنتك تبقى إنك بتداوي الناس وبتساعدهم يتخلصوا من الوجع ، يبقى تستاهل ولا متستاهلش؟😅
◾《كلية تمريض》
- كلية مهدور حقها وسط الكليات كلها
- ودايما المقارنه بينها وبين طب مش بتبقى عادلة😕 مع إن لو حسبنا الامور بشكل صح بعيد عن العادات والتقاليد والمجموع والتنسيق فهتلاقي إن كلية زي دي من غيرها مكنش هيبقى في مستشفي ولا دكاترة بردو😀
◾مبدأيا كده كلية تمريض موجودة في معظم المحافطات تقريبا زي  (القاهرة واسكندرية وطنطا والمنصورة وعين شمس و اسيوط والمنيا وبني سويف وسوهاج والفيوم وقناة السويس وغيره)
◾نظام الكلية بيخنلف من جامعة للتانيه يعني عندك جامعات ماشين بنظام الساعات المعتمده وال اكيد ليه مميزاته وعيوبه
-  وفيه كليات تانيه ماشيه زي اي كلام من غير النظام ده 🤓
◾وفي التنسيق غالبا كلية تمريض بتكون فوق ال90% لطلبة علمي علوم بس اكييد 👌
◾الكلية 5 سنين
 4 سنين دراسه وسنه امتياز
واغلبها بتبقي عمليه، يعني مطلوب منك حضور كل يوم 😣 وبتنزل المستشفي وبتشوف حالات وبتتعامل معاها
◾كلية تمريض المواد فيها بتتقسم قسمين : مواد تمريض 《يعني في صميم المجال》
و مواد غير تمريض 《يعني المواد الي معظم الكليات الطبيه بتاخدها》
◾فمواد تمريض في مادة اسمها أساسيات تمريض معاك كل سنة و لو شلتها بتشيل السنة كلها يا حلو حتى لو مش شايل مواد غيرها ودا من العيوب طبعا 👀
◾والمواد ال مش تبع تمريض بتبقي تقريبا زي مواد صيدله ال هما 《فارما وبايو》ومواد علاج طبيعي وطب بشري 《وفسيولوجي وتشريح وهستولوجي وميكرو》وغيرهم  كتير
◾وبتدرس طول الاربع سنين التخصصات والاقسام الي بتلاقيها بعد كده لما تيجي تشتغل 《زي باطنة وجراحه و نساء وتوليد وطوارئ وطب شرعي واطفال وعظام ورمد》🏥
◾خامس سنة بقا بتبقي سنة الامتياز مش بتكون دراسة دي بتكون تدريب عملي في المستشفي علي كل حاجة أخدتها في الكلية وبيقي ليك مرتب تحت اسم  "مكافأة"
◾وممكن تستلم الامتياز علي طول بعد ما النتيجه تظهر او ممكن تأجله وساعتها لو اجلته تقدر تشتغل في اي مستشفي خاصه والمرتب فيها بيقي حلو وجدا وطلبة الامتياز بيقوا مطلوبين 😎
◾وبعد الامتياز على طول هيبقي ليك تكليف او بيجيلك جواب تعيين بمعني اصح في المستشفيات الحكومي وده بيقي شغلك الاساسي بعد كده وبتتثبت في المستشفى كأخصائي تمريض وممكن تشتغل اخصائي في اي قسم مش شرط قسم معين 🙏
◾والكلية عموما بتتطلع منها بمؤهل عالي "بكالوريوس تمريض" والتعيين والتكليف بيجيلك كأخصائي تمريض مش ممرض بمعنى انك بتكون مشرف على طقم التمريض في قسم من أقسام المستشفى اي قسم بقى من ال كنت بتدرسهم طول الاربع سنين 《زي باطنة او جراحة او اطفال او اي حاجه》فانت بتبقي مشرف علي الطقم الممرضين الي في القسم ده الي بيبقوا متخرجين من معهد او مدرسه او اكاديميه تمريض
◾والفرق عموما بين التمريض والطب ✍
- إن الدكتور بيشخص الحالة وبيوصف العلاج بس اخصائي التمريض بيراجع العلاج والتشخيص وبيقي مسؤول عن كل طقم الممرضين عشان كده لازم يبقي فاهم في كل تفصيله في شغل الممرضين عشان لو فيه غلط يقدر يلحقه ويحاسب عليه الممرض😀
- يعني عندك مثال👀
 اخصائي التمريض في العمليات والتعقيم بيقي نوعين النوع الأول ده بيساعد الدكتور أثناء العملية ليس إلا والنوع التاني مسؤول عن تجهيز اوضه العمليات وتعقيمها وتعقيم الأدوات الي فيها وتجهيز المريض يعني بيتعب شوية في شغله
◾وزي ما قلنا ان التمريض بيدرس نفس مواد طب بس على اصغر شويه ومش بتعمق زي طب زي ما بالظبط بتوع طب بيدوسوا مواد تمريض على اصغر شويه 🤝
◾الكلية مستقبلها كويس جدًا لانك بتتخرج و تشتغل علي طول وتتثبت في شغل تبع الحكومه دا غير انك ممكن تنزل تشتغل او تتدرب وانت بتدرس عادي في اي مستشفي خاصه 💉
◾طيب نيجي لبعد التخرج وبعد التكليف
- هنلاقي ناس بتقف لحد هنا وتقولك انا شغال وبقبض وفيه ناس مش هتكتفي بكدا وهتكمل
والناس ال بتكمل ديه بيقي قدامها مليون سكه والتانيه تكمل فيها
◾أول حاجة هيا دبلومة تمريض عسكري وبتبقي بعد الامتياز وعباره عن ٦ شهور .. وبيقي قدامك عموما الجيش او الشرطه علي حسب ما تحب .. وبعدها بتشتغل في مستشفيات الجيش او الشرطه .. والموضوع ده حلو جدا وفلوسه حلوة "حاجة فُل أهي "✔
◾وفيه غير كده كمان دبلومة تحاليل طبيه وبعدها تقدر مع نفسك تفتح معمل تحاليل✔
◾ وعندك سكة الماجستير وبتبقي ٣ سنين  بتدرس فيه فرع من فروع التمريض وبيديك فرصه انك تدرس في الكلية  ويزودلك في مكانتك ومرتبك لو فكرت تسافر✔
◾ الزمالة : و دي دراسة بتعملها لما تخلص الكلية:
- زي زماله المعهد البريطاني وديه مرتباتها كويسة جدا💸
- وفيه زمالة مكافحة العدوى بتبقي مدتها 3 سنين وبعدها بتكون استشاري مكافحة عدوى وبيكون ليك وضعك في المستشفي و مرتب كويس كمان  
- وعندك زمالة المعلوماتية الصحية وبتبقي سنتين و بتتخرج منها أخصائي معلوماتية صحية و بيكون مجالك في الكمبيوتر
information technology جوه في المستشفي
- وفيه زمالة الإرواء قلبي و دي  بتتخرج منها أخصائي إرواء القلب ودا بيقي موجود في عمليات القلب المفتوح لما بيوقفوا القلب بيشغل جهاز القلب الصناعي .. ومهمته بتبقي تقيله لانه هو الي بيدي الاوامر ولازم يبقي عارف ازي يتعامل مع الجهاز كويس 🤝
- وفيه زمالات تانيه زي زماله الاطفال والتخدير
◾اخر مجال عندك هو الدبلومة
 ودي بتبقي مكلفه شويه واقل فايده من الحاجات التانيه ال قلنا عليها بس عموما الدبلومات زي مكافحه العدوي infection control  وبتبقي ٦ شهور او دبل
- او دبلومة الاداره او الجوده 🤔
◾وبشكل عام الكليه ديه من اكتر الكليات الي ليها مجالات شغل مش زي ما احنا فاكرين نهائي
《 وبإذن الله إذا أخدت قرارك ودخلت الكلية دي لازم تقدر قيمتك وقيمة العمل ال بتعمله و الموضوع مش سهل أوي ولا صعب مستحيل لا هو ممكن جدا بالمجهود والسعي》
===================

#كلية_العلوم_الصحية_التطبيقية

" وهى كلية مستحدثة داخل الجامعات حيث تتوافر الكلية بخمس جامعات مصرية فقط؛ جامعتين حكوميتين هما جامعة المنوفية وجامعة بني سويف، و3 جامعات خاصة، ونقدم لطلاب الثانوية العامة دليلًا يخص الكلية وأقسامها ونظم الدراسة بها.

مدة الدراسة بالكلية
مدة الدراسة بكلية "العلوم الطبية التطبيقية" 4 سنوات، بالإضافة إلى سنة امتياز بمستشفيات الجامعة، ويعقبها التكليف للعمل بالجامعة، ويأتي التخصص في السنة الثانية من الدراسة باﻷقسام المختلفة.

شروط القبول
تقبل الكلية طلاب الشعبة العلمية من الثانوية العامة شعبتي العلمي رياضة، والعلمي علوم، بشرط الحصول على الحد الأدنى للقبول بالكلية الذي يحدده مكتب التنسيق، بجانب الطلاب الحاصلين على دبلوم المعهد الفني الصحي، بشرط أن يكون التقدير "جيد" على الأقل، بالإضافة إلى حمَلة المؤهلات العليا بشرط أن يكون حاصلًا على شهادة الثانوية العامة تخصص علمي رياضة أو علمي علوم.

كما تقبل الكلية شهادات الالتحاق الآتية؛ وهي الثانوية العامة شعبة علمي رياضة، والثانوية العامة شعبة علمي علوم، بجانب الدبلومة الأمريكية، والدبلومة البريطانية، والشهادات المعادلة.

ولا بد أن يتناسب الحد الأدنى للقبول بكل جامعة، حيث تصل نسبة القبول بالكلية في عدد من الجامعات إلى 96% لشعبة علمي علوم، وهي الحال بجامعة بني سويف، ونسبة 88% لشعبة علمي رياضة.

الأوراق المطلوبة‏
للالتحاق بالكلية يتطلب الحصول على صورة من إيصال مكتب التنسيق، وصورة من شهادة الثانوية العامة، وصورة من بطاقة الترشيح للكلية التي رُشح لها الطالب، وصورة من إيصال السداد، بجانب مستند لإثبات عنوان الطالب.

مجالات العمل
«إخصائي» في مجال التخصص بالمستشفيات والمعامل ومراكز الأشعة.
الأقسام بجامعة بني سويف
تعتبر جامعة بني سويف أول جامعة حكومية مصرية تأخذ خطوة إنشاء كلية العلوم الصحية داخل حرَمها الجامعي حيث تم إنشاء الكلية في سبتمبر 2014؛ ليكون ذلك التاريخ بداية العام الدراسي داخل الكلية،

أقسام الكلية
1- "قسم البصريات وعلوم الرؤية"،
الذي يهدف إلى إعداد تقني بالبصريات وعلوم الرؤية، بحيث يكون الطالب ملمًّا بالقوانين الفيزيائية لانعكاس الضوء وانكساره، ويكون قادرًا على تحديد عيوب الإبصار البسيطة، وتركيب النظارات والعدسات اللاصقة، والقيام باختبارات النظر وتمارين.

2- "قسم طب المجتمع والبيئة
(تغذية، وصحة نفسية، وصحة بيئية)"، ويهدف إلى إعداد متخصص بطب المجتمع والبيئة قادرٍ على التعامل مع مشاكل المجتمع الصحية، وملمًّا بأسس التغذية السليمة في فترات الصحة والمرض بما يمكِّنه من إعداد خطة متكاملة للتغذية المتكاملة لكل الحالات المرَضية الشائعة وغير المرَضية، ويكون ذا دراية بكيفية التعامل مع آثار الأمراض النفسية ووسائل التحليل النفسي للمريض.

3- "قسم الإدارة الصحية وتقنيات المعلومات الإدارية"
ليكون القسم الثالث، والذي يهدف إلى إعداد تقني متخصص بعلوم الإدارة الصحية وتقنيات المعلومات الإدارية للهيئات الصحية والقوانين التي تحكمها، وتسهم في أن يكون الطالب قادرًا على التعامل مع التقنيات التكنولوجية الحديثة وأساليب الإدارة الإلكترونية.

4- قسم المختبرات الطبية،
الذي يهدف لإعداد تقني بالتحاليل الطبية قادر على سحب وإعداد وتحليل العينات الطبية بمختلف صورها بدقة وسرعة، والتعامل مع كل أجهزة التحليل الطبية، وتحضير العينات على أسس السلامة المهنية له وللمريض.

5- "برنامج تقنيات الأشعة (تشخيصية، وعلاجية)"،
الذي يهدف إلى إعداد تقني بتقنيات الأشعة (تشخيصية، وعلاجية) ملم بالقوانين الفيزيائية للإشعاع ومخاطره، وقادر على التعامل مع جميع أجهزة الأشعة بمختلف أنواعها، مستخدم لكل الطرق والأوضاع المختلفة للتصوير الإشعاعي والعلاجي، واضعًا نصب عينيه أسس السلامة المهنية له وللمريض.

6- قسم "التخدير والرعاية المركزة (جراحية، قلبية، تنفسية)"،
ويهدف إلى الإلمام بمواد التخدير والرعاية.
جامعة المنوفية
يتواجد بالكلية عدد من الأقسام حتى الآن، وهى:
1- قسم الرعاية الطبية الحرجة والعاجلة، الذي يهدف إلى إعداد تقني متخصص بالحالات الحرجة والتخدير، وتقديم الرعاية والملاحظة للمرضى، بجانب التعامل مع كل الأجهزة الطبية الموجودة بغرف العمليات.
2- قسم صيانة وتطوير الأجهزة الطبية؛ الذي يعمل على إعداد تقني متخصص في صيانة الأجهزة الطبية، ومتابعة تشغيلها وتطويرها وتركيبها، وقسم الطب الوقائي، الذي يعمل على دراسية آليات سبل الوقاية من الأمراض، سواء على المستوى الفردي أو الاجتماعي، ويهدف بشكل أساسي إلى توقع الأمراض ومنعها قبل حدوثها، إلى جانب رفع المستوى الصحي على المستويين الجماعي والفردي.

3- قسم الأشعة التشخيصية والعلاجية، هو أحد فروع الطب الذي يستخدم تقنيات التصوير الطبي؛ بهدف وضع التشخيص الملائم وفي بعض الأحيان يتطرق إلى العلاج، فعند بداية ظهور هذا العلم اقتصر على استخدام الأجهزة المصدرة للأشعة السينية في تقنيات التصوير، أما في الوقت الحاضر، فقد توسع هذا العلم ليشمل أجهزة أخرى مثل التصوير بالأمواج فوق الصوتية، والتصوير الطبقي المحوري، والتصوير بالرنين المغناطيسي.

4- قسم التسجيل الطبي والإحصاء، فهدفه الأساسي طرح كل السبل المتاحة لراحة المريض عند دخوله للعلاج بالمستشفى أو المتابعة بالعيادات الخارجية، وتقديم الخدمات الطبية في نظام دائم، بجانب تسجيل جميع حالات الدخول والخروج، وإعدادها في صورة ملفات طبية لسهولة حفظها والحفاظ على سرية بياناتها والرجوع إليها عند الحاجة، سواء بالأبحاث الطبية ورسائل الماجستير والدكتوراه.

5- قسم تركيب الأسنان؛ يعمل خريجو القسم كإخصائيي تركيب أسنان بالمستشفيات المختلفة، وسيتم افتتاح قسم خاص بالعناية المركزة والحالات الحرجة من الفرقة الثالثة بالكلية ويكون الخريج "تقني" أو "تكنولوجسيت" في التخصص وهو أعلى من الفني وأقل من الإخصائي.

===================
《كلية التكنولوجبا الحيوية / biotechnology 》
- كانت قسم في علوم وزراعة وحاسبات *ولسه موجوده كقسم* ولأهميتها تم فصلها واعتبارها كلية لوحدها🙏
《كلية التكنولوجبا الحيوية / biotechnology 》
◾ هي كلية بتدرس فيها الهندسة الوراثية وعلم الوراثة والجينات وبتدرس مجالات مختلفة زي :
《1》- Pharmaceutical biotechnology
المجال الطبي الدوائي💊
《2》- Agriculture biotechnology
المجال الزراعي 🌴
《3》- Marine biotechnology
فيما يخص علوم البحار 🐟
《4》- Industrial biotechnology
المجال الصناعي 🔩
《5》- Bioinformatics
مجال المعلوماتية الحيوية 💻
◾إيه الأماكن ال موجودة فيها ككلية وإيه كقسم عشان منتوهش ؟
- موجوده ككلية في جامعتي MUST و MSA و BUC و النيل
- في بينهم فرق واحد بس هو إن في MUST مفيش تخصص وبتدرس كل المجالات وتشتغل في كل المجالات فيما بعد 🤞
◾أما بقى بايوتيكنولوجي كأقسام موجوده في :
- كقسم في كلية زراعة في جامعة القاهرة
- قسم في كلية العلوم
- قسم في صيدلة الجامعة الألمانية GUC
◾بالنسبة للأقسام دي كلها فإيه مجالاتها ومختلفين عن بعض إزاي  ؟🤔
《1》- Industrial biotechnology
                     《المجال الصناعي》
- خريج الكلية بيشتغل ف مصانع الكيماويات
- بيشتغل في مصانع  ادوات التجميل وال makeup
- بيشتغل في مصانع الادوات المنزلية زي مثلا مساحيق الغسيل وانزيماتها  
- بيشتغل ف مصانع الغذاء اي مصنع اغذية زي شيبسي او بيبسي بتشتغل مراقب جودة بتشوف المنتج ده مطابق للمواصفات ولا لا وبالتالي الانتاج كله بيتوقف عليك
- بيتشغل ف ال Biomaterials و ال nanotechnology
بتشتغل ف صناعات الوقود الحفري
《2》- pharmaceutical biotechnology
                       《المجال الطبي الدوائي》
- بتشتغل ف شركات الادوية وصناعة الادوية زي المضادات الحيوية 💊
- بتشتغل في معامل ومراكز البحوث لاكتشاف ادوية للقضاء على الامراض
- بتدرس العلاج بالجينات   
- بتدرس الخلايا الجذعية وبتشتغل ف مراكز الابحاث او مراكز ومستشفيات العلاج بالخلايا الجذعية ف مصر والخارج
- بتشتغل ف الحقن المجهري واطفال الانابيب
- بتشتغل ف معامل DNA
- بتفتح معامل تحاليل طبية وتشتغل في معامل التحاليل
- بتشتغل ف الطب الشرعي والبحث الجنائي
《3》- Marine biotechnology
                          《علوم البحار》
بتدرس المجال ده ف الكلية بحيث تكون مؤهل لاستكشاف البحار واستخراج المواد الفعالة للمجال الطبي الدوائي 👌
《4》- Agriculture biotechnology
                      《المجال الزراعي》
- بتدرس كل ما يخص الهندسة الوراثية الزراعية والجينات
بنشتغل في تحسين المحاصيل الزراعية كجعلها مضادة للفيروسات او مياه البحار عشان تتسقي بمياه البحار
- كمان بتدرس المدة المتاحة ال ممكن تسيب فيها مثلا المحاصيل الزراعية في الشمس منغير ما يحصلها حاجة
- بتشتغل ف مراكز البحوث الزراعية 📑🌴
◾كده إحنا شرحنا مجالات وتخصصات كل فرع من فروع البايوتيكنولوجي ✔
◾بتتخرج من جامعة MSA و MUST و BUC و النيل حاصل على بكالريوس تكنولوجيا حيوية
◾قسم بايوتك كلية زراعة عين شمس حاصل على بكاليريوس زراعة
◾قسم بايوتك علوم حاصل على بكالريوس علوم
◾قسم بايوتيكنولوجي صيدلة حاصل على بكاليريوس صيدلة
◾بالنسبة للتنسيق فهو لسه لحد دلوقتي مفيش حاجة واضحة عنه بالنسبة للجامعات الحكومية أما بالنسبة للجامعات الخاصة فهو بيتحدد على حسب كل جامعة وحسب نسبة إقبال الطلبة وإستيعاب الجامعة🏛
- بالنسبة للمصروفات فهي بتختلف من سنة لسنة ومن جامعة لجامعة بس نقدر نقول إن المتوسط من 40 ألف ل 60 ألف
🚩جامعة MSA هي أعلى واحده يعني المتوسط بردو ما بين 90 ألف ل 100 ألف
⚠️خريجين الكلية دي تابعين لنقابة العلميين وكان في أخبار إن في نقابة للبايوتيكنولوجيست قريب بس منعرفش إذا كان الخبر ده حقيقي أو لا 🤓
◾الكلية مش صعبة ومش سهلة بس بتحتاج مذاكرة لأن تخصصاتها كتير وعلمية بحتة لذلك لازم تذاكر وتجتهد عشان توصل لكل أحلامك👌

====================

#كلية_زراعة
شباب الكليات والتنسيق العظيم .. ازيكوا ^^
نظرا ان مصر دولة زراعية بالدرجة الاولي🌳 .. ونظرا برضو اننا ماشين فيها بالبركة وعلى حسب كلام الناس والي بيقولوه وبس 🙂
ففيه كليات كتير بتضيع في وسط الشكليات دية .. وبيتبصلها على حسب المجموع وبس .. ومبيتعملش حساب اذا كان الكلية والمجال ده مهم وبينفع الناس ولا لا 🤦‍♀️
وكلية زراعة على رأس الكليات دي
هتلاقي ان اللي بيدخل الكليه دي وبيعرف اللى بيتدرس فيها نظرته بتتغير عنها تمام وبيعرف اد ايه هى مهمة❤
مبدأيا كده الكليه ٤ سنين … وممكن تدخلها من علمي بس .. وموجوده ف كتير من جامعات مصر في :
· زي القاهرة
·  وعين شمس
· والزقازيق
· واسيوط وغيرهم.
الكلية بتاخد من التلت مراحل عادي واحيانا بتاخد  لحد مجموع 80% وفيه سنين كتيرة بتبقي اقل كمان
ممكن لحد 75% مثلاً
ودي حاجة بتختلف من سنه للتانيه حسب التنسيق طبعاً
نيجي للاقسام بقي..
 ومش معني ان دي كليه زراعة ان انت هتبقي بتزرع بس يعني!  لأ خالص يعني
الكلية دي فيها 20 قسم … اه زمبؤلك كدا
يعني 20 تخصص تقدر تختار بينهم براحتك متخيل 😌
بس الاقسام ديه بتختلف من جامعة للتانيه … وفي جامعات كتيره مش هتلاقي فيها كل الاقسام دي،بس الي هنقول عليهم دول اشهر الاقسام الي ممكن تلاقيها في زراعة ف العموم يعني:
عندك بقا اقسام زي
1. قسم الإنتاج الحيوانى والسمكي.🐟
2. وقسم إنتاج الدواجن.
3. وقسم الغابات وأشجار خشبية.
4. وقسم أمراض النبات.
5. وقسم علوم الأراض.
6. وقسم المحاصيل والفواكة والخُضَر.🍊
7. وقسم البساتين.
8.  وقسم النبات الزراعى.
9.  وقسم الزهور ونباتات الزينة وتنسيق الحدائق.🌸
10.  وقسم الاقتصاد وإدارة الاعمال الزراعية.
11.  وقسم الاقتصاد المنزلي.
12.   وقسم علوم الأغذية وتقنية الألبان.🥛
13.  وقسم علم الحشرات التطبيقي.
14.  وقسم المجتمع الريفى.
15.  وقسم الإرشاد الزراعى.
16.   وقسم المايكرو بيولوجيا الزراعية.
17.  وقسم علوم الأراضي والمياه.
18.  وقسم الكيمياء الحيوية الزراعية.
19.  وقسم كيمياء وتقنية مبيدات الآفات.
20.  وقسم الوراثة.
والاقسام ديه كلها ممكن تدخلها لو كنت علمي علوم
اما لو علمي رياضه فبيبقي قدامك قسم هندسة زراعية .. وده هتدرس فيه طريقة تصميم شبكات الري الحديثة سواء بالرش أو بالتنقيط  للمزارع ولكن بتوسُّع طبعا..
القسم ده شغله يختلف شويه عن باقي اقسام الكلية لانك هتبقي مهندس🤓 ومطلوب في كل المزارع الكبيره .. وهتبقي المسئول مع فريق الصيانه وتصميم شبكات الري والابار .. وصيانه كل المعدات الزراعيه والتعديل عليها .. وبتتعاقد على المعدات الزراعيه والجرارات..  
 وانت ممكن تدخل أى قسم من الي اتكلمنا عليهم
ولكن دلوقتى فيه نظام اسمه المجالات بمعنى انك عشان تدخل قسم لازم تدرس المواد الى تبع مجال القسم الي انت هتدخله.
عندك مثلا : مجال وقايه النبات بيتكون من 3 اقسام او بمعنى اصح هتلاقي فيه تلت اقسام الي مرتبطين بمجال وقايه النبات وهما (قسم حشرات - وقسم مبيدات - وقسم امراض نبات )
يعني لو دخلت مثلا قسم حشرات يبقي لازم تدرس كورسات من القسمين التانيين الي هما مبيدات وامراض النبات وده بيفيد جدا فى الشغل علي فكره.
وعموما التخصص بيبدأ من سنة تالتة، يعني بتتخصص تالتة ورابعة. ولكن القاهرة و عين شمس التخصص من أولى و خاصة لو هتدخل انجليزي.
فى سنة أولى وتانية بتاخد مواد بتوضح كل اقسام ومجالات الكليه عشان تقدر تحدد بعدها هتختار انهى تخصص.
وطبعا فيه أقسام على حسب التقدير العام واقسام على حسب تقدير مواد معينة وعشان كده لو عايز قسم أو مجال معين لازم تشد حيلك فى المواد اللى القسم ده محتاجها عشان تتقبل، بالإضافة الي إن كل قسم بيكون محدد عدد طلبة معين عشان يدخلوه فشد حيلك قوي💪
نيجي بقا لنظام الدراسة
سنة أولى : بتاخد فى الترم 7 مواد
أغلب مواد سنة أولى بتبقي أحياء و كيميا وفيزيا ووراثة يعني مثلا زى مواد (كميا عضويه - وعلم حشرات - وعلم حيوان - وعلم النبات - وكميا تحليله )
وفيه كمان مواد أدبيه وإحصائية ( زي اقتصاد زراعى - و مجتمع ريفى )
وان شاء الله انت عندك خلفية عن المواد ديه من ثانوية عامة.🤓
سنة تانية : بتاخد مواد جديدة عليك
وبتكون اكتر مجالاتها نباتى و صناعى
زى مواد ( علم الألبان و نباتات الزينة و أساسيات الفاكهة و علم تصنيع الاغذية وأساسيات الخضر وكده )
بتحدد تخصصك ف معظم الكليات ف تالتة زي ما قولنا وبتكون أخدت فكرة عن كل قسم.
والدراسة في الكلية.. المفروض عملية،
بس للأسف الواقع غير كده كالعادة🤦‍♀️ فممكن نقول إن التلت بيبقى عملى فعلا والتلتين نظرى وهتلاقي في مواد كلها عملى ومفيهاش نظرى.
بس عامة يعني العملى في الكلية ممتع جدا فى كل الاقسام، وجزء العملي ده بيعتمد على ميزانية الكلية💲. يعني في جامعات بتجيب أدوات وفيه جامعات لا وانت وظروفك بقا.
طبعا هتقولي العملي بيبقي عباره عن ايه ؟
 بص بقا هو بيختلف جامعه لغيرها وحسب المستوي برضو.. بس كله بيبقي في معامل مخصصه وحسب القسم بتاعك بيبقي شكل العملي
يعني مثلا قسم وقايه النبات .. العملي بتاعه بيقي في ٥ معامل تقريبا
عندك معمل مبيدات
ومعمل مكافحة الحيوية وإنتاج التطفلات
ومعمل النمياتودا والاكاروس
رمعمل الدراسات البيئية
ومعمل الفسيولوجي
وهكذا..  
وملحوظة صغيره عن جامعة القاهره .. عشان هيا مختلفه شوية عن باقي الكليات  يعني ماشيه بنظام الساعات المعتمده  وفيها انجليزي ودولي وعربي وكده
لغة الدراسة (عربي-انجليزي-فرنساوي ) طب بيعتمد الانجليزي علي درجتك في الانجليزي ولازم تكون 80 % فيما فوق انما بالنسبة للفرنساوي متاح قسم الالبان بس  فدرجتك في الانجليزي  80 %فيما فوق +الفرنساوي 75% فيما فوق  وبتدرس في اولي وتانية بالانجليزي وتالتة ورابعة بالفرنساوي .بس بيبقوا مصاريفهم عالية عن العربي علي حسب كل جامعة برضو
طيب احنا متفقين من الاول انك اكيد مش هتتطلع من الكلية تزرع والهبل ده .. بس انت هتشتغل ايه بقا؟🤓
بص خريج زراعة ممكن يشتغل
في شركات استيراد وتصدير
وممكن في شركات كيماويات
وحجر صحى في المزارع
وشركات الاغذية والألبان ومزارع فاكهه و معهد الدراسات العليا والبحوث للزراعة  والمنطق القاحلة  من اكتر الحاجات اللى متوفرة فى الشغل بس بتكون عايزة تقدير عالى  هى مراكز البحوث.
ومجالات وفرص الشغل بتفرق من قسم للتاني .. بس بحاجات بسيطه يعنى بنسبه 10% القسم بتاعك بيفرق فى الشغل
فمثلا فيها اماكن ومجالات شغل بتحتاج للشباب أكتر وبيبقى صعب على البنات🙍‍♀️، زي شغل الشركات والمصانع والمزراع وبتحتاج شغل بليل.
لكن البنات غالبا بتبقى مطلوبة اكتر في الشغل الإداري والمعامل🤷‍♀️.
وأهم حاجه عشان تلاقى فرص شغل كويسة وتعرف تحدد قسمك .. حاول تروح للدكاترة اللى هتعرفهم فى الكلية وهما هيعرفوكم على مجالات الشغل والقسم اللى هتختاره.وهيعرفوا الشركات إنكم موجدين . لإن فيه شغل كتير بيبقى عايز خريجين زراعة بس صعب يوصلولهم🤦‍♂️، وحاول يكون ليك علاقة مع الي اتخرجوا عشان يساعدوك.
ودور على شغل او علي تدريب علي جوجل من أول سنة كلية وقدم فيه
وهتتقبل وهتكون الشركات دى عايزاك بعد ما تتخرج وكل التدريبات هتتحط فى السي ڤي بتاعتك في الاخر 🤓
اخر حاجه خالص 😶 التقدير سهل في الكلية🤕، والكلية جميلة وممتعة للي يحطها في دماغه . وممكن تشتغل فيها من وانت لسه في الكلية.
فحاول تستفيد بكل حاجة بتتعلمها عشان هتفيدك بعدين.🤓
===================
#كلية_فنون_تطبيقية
كلية النص مهندس والتاني فنان 😌😎🎨
بما إننا هنبدأ ف كليات الفنون 🎨
ف خلينا نبدأ بحل لغز كليات الفنون باسماءها بالشعب ال بتقبل منها 😁:
📍الفنون التطبيقية: بتقبل من علمي رياضة - علوم
📍الفنون الجميلة: ودي متقسمة لـ 3 أجزاء:
- قسم عمارة: بتقبل من علمي رياضة بس
- قسم ديكور: بيقبل من علمي علوم - رياضة
- فنون (ال هي باقي الاقسام): بتقبل من علمي وأدبي
📍التربية الفنية: بتقبل من جميع الشعب
🎨 فنون تطبيقية من الكليات ال لازم تنجح ف امتحان القدرات بتاعها عشان تتقبل فيها + المجموع بتاعك.
(هنقول تفاصيل أكتر عن القدرات ف أول كومنت)
📍السؤال الأذلي عن فنون تطبيقية، هو لازم أكون باعرف ارسم كويس عشان ادخل فنون تطبيقية؟
لأ مش لازم، أنت بتحتاج اساسيات ف الرسم وبتقدر تتعلمها ف الكلية ببساطة، لأن الرسم مهارة مش موهبة يعني مش لازم تتولد بيها لكن عادي جدا تتعلمها ودا عن تجربة جدا ع أكتر من شخص 🤠
📍 الدراسة:
أساس فنون تطبيقية هو التصميم، ف كل المواد ف الخمس سنين بتخدم إنك تكون خريج قادر تصمم أي عمل فني بناء ع أساسات مش بعشوائية.
الكلية 5 سنين مقسومة سنة اعدادي و4 سنين تخصص..
- سنة اعدادي (ف جامعة دمياط اسمه القسم العام): ودي هتاخد فيها مواد تأسيسية ف التصميم زي أسس تصميم، ومنظور حر/هندسي، خطوط، متاحف، رسم هندسي، هندسة وصفية.
 وفي مواد عامة زي الفيزيا والكميا والميكانيكا والديناميكا، بتكون سهلة جدا وبسيطة حتى لو إنت علمي علوم بتقدر تفهم المواد الرياضية كويس عادي.
- التخصص:
⚠️توضيح إن ف تعريفك سنوات الكلية، بتقول أنا أولى تخصص، ال هي تانية جامعة لأن عندك سنة اعدادي 😅
⚠️ طيب فنون تطبيقية موحودة ف جامعات إيه اصلا ؟
موجودة ف 4 جامعات حكومية (حلوان وبنها وبني سويف ودمياط).
⚠️ بيكون في تنسيق داخلي للتخصصات بعد سنة اعدادي، بيكون نفس النظام بتاع ثانوي إنك بعد النتيجة بتدخل الرغبات بتاعتك وبعدين بتظهر النتيجة وبعدين بيظهر تنسيق الأقسام وبتعرف إنت اتخصصت إيه.
⚠️ الأقسام الأساسية = 14 قسم موجودين كلهم ف جامعة حلوان وجامعة دمياط، لكن بنها وبني سويف فيهم اقسام ناقصة.
📍الأقسام:
1️⃣ قسم الفوتوغرافيا والسينما والتليفزيون: من اسمه، فأنت بتتعلم فيه اساسيات تصوير سواء صور أو أفلام قصيرة أو طويلة أو برامج تليفزيونية، لأنك بتتعلم فيها اضاءة وكاميرات
⛔ ممكن تشتغل كمخرج سواء برامج أو أفلام، وممكن يبقي لك الكارير بتاعك ف الأفلام القصيرة وتدخل بيها مسابقات.
⚠️ مش موجود ف بنها وبني سويف
2️⃣ قسم الطباعة والنشر والتغليف: ودا القسم ال بيهتم بالمطبوعات الورقية والبنارات، زي الكتب والمجلات وبنارات الاعلانات ال بتبقي متعلقة سواء ف الشارع او ع الكباري وغيره.
وكمان بيهتم بعلب التغليف للمنتجات ال بتتباع، سواء المنتجات الغذائية زي الشيبسيهات والمكرونات وهكذا، أو غيره.
⛔ بتشتغل ف المطابع، زي مطابع الاهرام والجمهورية، أو شركات التعبئة والتغليف ودي كتيير جدا.
3️⃣ قسم الدعاية والإعلان: أي شركة دلوقتي سواء start up او شركة بقالها مدة مش بتتحرك من غير لوجو، أو شعار ليها، دا جزء من مهام قسم الاعلان، وكمان الاعلانات التليفزيونية وأفكارها، والبوسترات سواء التوعوية او الاعلانية ال بتنزل ع الكباري او بتتعرض ف الشوارع، وكمان بيتعلموا أنميشن وتحريك.
⛔ ممكن تشتغل في شركات الدعاية والاعلان، ودي بيكون الشغل فيها عن طريق عميل فرد أو شركة بيجي يتفق مع الشركة ع فلوس معينة لشغل معين، بعد كدا بيبدأ يقعد معاك كمصمم اعلانات ويقولك هو عايز إيه بالظبط، وإنت تبدأ تصيغ دا ف صورة اعلان.
أو ممكن تشتغل شغل حر freelancer ودا مشكلته إن انت ال بتتفق مع العميل ع الفلوس والوقت وكل حاجة وكمان بتعرف متطلباته وبتشتغل، وكمان بتحتاج تبني اسم كويس ف السوق عشان الناس تيجيلك وتتعامل معاك مباشر، ميزته إنك بتكون حر نفسك بتظبط وقتك زي ما تحب على حسب نظام يومك مش مضطر تنزل الساعة 8 وتروح الساعة 5 😅.
⚠️ في جامعة بنها، قسم التاني والتالت متجمعين ف قسم واحد اسمه دعاية واعلان وطباعة ونشر، وبيدرسوا مواد التخصصين مع بعض ف الاربع سنين.
⚠️مش موجودين ف بني سويف
4️⃣ قسم التصميم الداخلى والأثاث: ودا بيهتم بالتصاميم الداخلية لأي مبني، بيكون هو وقسم عمارة ف هندسة مكملين لبعض، مع إن تصميم داخلي بياخد جزء معماري وكذلك عمارة بياخد جزء تصميم داخلي.
وكمان تصميم داخلي متوسع شوية لانه ممكن يهتم بالديكورات الداخلية للمسارح أو الكادارات التليفزيونية، أو ديكورات الافلام.
وكمان إنه بيبقي فيه جزء أثاثي، فانت بتتعلم عن انواع الاخشاب واشكالها وايه نستخدمه فين وهكذا.
⛔ ممكن تشتغل ف مكتب تصميم داخلي او مكاتب تصميم العمارة.
5️⃣ قسم التصميم الصناعي: في بعض الكليات اسمه تصميم منتجات، وبيهتم بتصميم الديزاين الخارجي لأي منتج صناعي من الابرة للصاروخ حرفيا 😎.
وبيكون مكمّل لقسم هندسة ميكانيكا، مع إنهم ف تصميم صناعي بياخدي جزء ميكانيكي لكنه بيكون سهل وبسيط للمنتجات البسيطة سواء اليدوية أو الكهربية.
⛔ شغلك بيكون ف مصانع المنتجات، بيكون في سيكشن اسمه البحث والتطوير ف المصانع ودا ال بيكون مسئول إنه يحط الديزاينز الخارجة سواء لمنتجات جديدة أو تطوير ع منتجات موجودة بالفعل.
6️⃣ قسم الاثاثات المعدنية والإنشاءات المعدنية والحديدية: بيهتم بالاثاث المعدني زي مثلا لما بتدخل أي عيادة بتلاقي كراسي او مقاعد معدنية، وأي كراسي او مقاعد معدنية بيكون دا جزء من شغله، لكن هو بيتوسع أكتر من كدا كمان.
7️⃣ قسم المنتجات المعدنية والحُليّ: طب إيه الفرق بينه وبين الأثاثات المعدنية؟ إن دا بيهتم بالمنتجات البسيطة زي المكتبات المعدنية أو التابلوهات المعدنية وغيره، مش بيتدخل أوي ف الأثاثات، وكمان دا بيكون زايد عليه إنه بيهتم بالأكسسوريز المعدنية وكمان حلي البيوت زي الاباليك والنجف.
⛔ شغله كحلي بيكون في شركات الذهب أو المديليات المعدنية أو العملات المعدنية وغيره وكمان شركات النجف والكرستالات زي كرستال عصفور.
⚠ في حامعة بنها،️ القسم ال 6 وال 7 مجموعين ف قسم واحد.
⚠️ مش موجودين ف جامعة بني سويف.
8️⃣ قسم الخزف: بيتعلموا فيه تقنيات ووسائل الخزف المختلفة، بيدرسوا أنواع الأطيان(جمع طين)😂 وبيحللوها عشان يعرفوا أنهي نوع يستخدم ف إيه، وبيعرفوا عن الافران الحرارية وازاي يستخداموها وكمان صيانتها، وبيتدربوا ع تصميم الخزف الصناعي واليدوي والدولاب.
⚠️مش موجود ف بنها وبني سويف
9️⃣ قسم الزجاج: بيدرسوا فيه كل حاجة ليها علاقة بالزجاج وبالتالي بيقدروا يوظفوها ف كل حاجة بعد كدا، سواء مباني معمارية او العبوات الزجاجية زي البرطمانات والازايز، وغيرهم..
وكمان بيتعلموا وسائل ترميم الزجاج والرسم عليه ممكن تسيرش عليه، هتشوف شكله وبيكون من الحاجات المطلوبة جدا وكمان اسعارها عالية.
⚠️مش موجود ف بنها وبني سويف
🔟 قسم الزخرفة: بيتعلموا التنسيقات الجمالية للاماكن سواء الداخلية او الخارجية، ودا بيكون واسع جدا بقي سواء ميادين او حدائق او منازل بتصميم ورق الحائط وغيرها.
⚠️مش موجود ف بنها وبني سويف
1️⃣1️⃣ قسم النحت والتشكيل المعمارى والترميم: ودا بيهتم ب3 أجزاء، اول حاجة المنحوتات المعمارية ال بتكون في أي مكان اثري، أو قصور والنصب التذكارية وهكذا..
تاني حاجة بيهتم بالترميم ف المنشآت الأثرية، زي المساجد والمتاحف، لو نزلت المعز هتلاقي مهندسين نحت، أو كلية آثار شغالين ف الترميم ف اجزاء كتير منه.
⚠️ مش موجود ف بني سويف.
1️⃣2️⃣ الغزل والنسيج والتريكو: ودا القسم ال بيهتم بالخيوط والأنسجة عشان نطلع القماش ايا كان شكله او خامته أو نوعه، وكمان شغله ف السجاد بيكون كويس جدا لأن السجاد عبارة عن خيوط مترتبة بشكل معين بيدينا شكل السجادة
⛔ فشغله بيكون في الانسجة المنتشرة جدا ف المحلة الكبرى، أو مصانع السجاد زي النساجون وسيرا وغيرهم.
1️⃣3️⃣ قسم طباعة المنسوجات والصباغة والتجهيز: أي بيجامة أو ملاية دلوقتي بيكون الشغل ال عليها مطبوع، القسم دا هو ال بيهتم بالديزاينز دي يكون شكلها حلو ولذيذ وكمان بيتعلم ازاي يطبع اي ديزاين ع اي قماشة وطريقة الطباعة بتختلف ع حسب القماشة هو بيتعلم دا بقي 😁
1️⃣4️⃣ قسم الملابس الجاهزة: هو تصميم الازياء، بس كدا ؟ اومال انت فاكر ايه 😂
لكنهم بيتعملوا ازاي يصمموا ملابس جاهزة لكل الاعمار السنية من كبير لصغير، وكمان بيتعلموا يعملوا منتجات جلدية سواء شنط او غيرها.
⚠️ مش موجود ف بني سويف
⚠️ يبقي المجموع 8 اقسام ف جامعة بنها، و4 أقسام في جامعة بني سويف،، وممكن تحول بعد اعدادي من جامعة لجامعة، لكن بيكون التحويل صعب شوية ولازم تتحرك فيه من بدري.
⚠️ اقسام فنون تطبيقية من أكتر المجالات ال بتكون مطلوبة ف سوق الشغل، فأنت بمجرد ما بتتخرج بتلاقي شغل مناسب ليك ف اكتر من مكان، المهم إنك تكون شغال ع نفسك كويس ومش معتمد بس ع الكلية.
📍طبيعة الدراسة:
1. جزء عملي: ودا جزء كبير جدا ومهم جدا ف الكلية ف اي تخصص، ودا ال بنعمل فيه مشاريع ولوحات وبنسهر ف الكلية ونطبق ف البيت بالأيام عشان ننجزه وممكن بعد دا كله يترفض وتروح تعيده زي العسل كدا 😂😌🙊
2. جزء نظري: هو مهم جدا عشان المعلومات النظرية بتساعد ف التطبيق، لكن مش بيحتاج مجهود ومعظم الدكاترة بيكونوا مقدرين إننا مسحولين ف العملي فبيسهلوا علينا النظري 😁

====================
#كلية_تجارة
◾كلية البشوات زمان وكلية الشعب دلوقتي؟🤔
- ايوه هي ال جت في دماغك علطول😌
《كلية تجارة》
◾الكلية ال معظمنا بيكون رافضها فى البداية ، بس أول ما بيتزنق بتكون أول بديل حقيقى بيفكر فيه وبنكتشف انها مش بالسوء اللى احنا متخيلينه ده
والعظيم جدا ان فيه ناس بتختارها وبتفضلها عن كليات كتير تانيه وبتختار تكمل في المجال ده بنفسها
◾مبدأيا كدة كلية التجارة هي كلية نيتها صافية جدا
علشان بتقدر تدخلها من علمى علوم ورياضة وأدبى
مش كدة وبس علشان كمان دى من الكليات اللى فيها انتظام و انتساب🤓
◾ طيب ايه الفرق بين انتظام وانتساب موجه ؟👀
- انتظام مجموعها بيكون أعلى من مجموع انتساب
- بيكون ليك حضور سكاشن لكن انتساب لا
- اغلب  الجامعات لو مش كلها ليها حضور سواء محاضرات او سكاشن بس في انتساب مفيش حضور وغياب
- وكمان مصروفات انتظام أقل من مصروفات انتساب
- انتظام مميزة فى فكرة انك ممكن تدخل انجليزي لكن فى انتساب لا
《 ممكن اغلب الجامعات لا لكن تجارة اسيوط عادي انجلش انتساب واسأل في الجامعة اللي هتقدم فيها + ان المصاريف ممكن تكون اكتر من انتظام شويتين 》💰
- وكمان بعض الأقسام اللى هنتكلم عنها كمان شوية زى اكتوارى مينفعش تدخلها من انتساب 🤦‍♂️🤦‍♀️
- بس كده مش أكتر غير كده فالباقى نفس المواد
◾وغالبا تجارة بتبقي مرحله اولي وتانيه بالنسبه لانتظام..
لكن فى المرحلة التالتة .. مبتبقاش موجوده غير لانتساب موجه بس
◾ لغات الدراسة فى الكلية دى 3 لغات عربى وانجليزى وفرنساوى
- عربى موجودة فى كل كليات تجارة وكذلك انجليزى لكن فرنساوى موجودة بس فى 《جامعة عين شمس وجامعة اسكندرية》
◾طيب لو أنا عاوز أدخل انجليزى فيه شروط لده ؟
آه فى شروط ..
أول حاجة ان يكون جايلك فى التنسيق تجارة انتظام
《الباقي هتعرفه في البوست الجاي👋》
◾بالنسبة لفرنساوى فلازم يكون جايلك في التنسيق تجارة انتظام بردو + درجة معينة في الفرنساوي الجامعة هي ال بتحددها و من خلال المجموع الاعتباري 《مجموعك الكلي + درجة الفرنساوي》 بيتحدد أنت هتتقبل ولالا🤔
     وعموماً متقلقش الموضوع مش صعب زي ما انت متخيل
◾ايه الفرق بين تجارة عربى وتجارة انجليزى ؟
- تجارة عربي بتدرس فيها المواد بالعربي + إن الكتب بتبقى من تأليف الدكتور أو الجامعة عموما من خلال هيئة التدريس فيها
《أكيد هتستنى البوست الجاي عشان تعرف إبه المختلف في تجارة انجلش😌》
◾بعض الآراء بتقول ان تجارة انجليش أفضل من ناحية فرص الشغل وهكذا وفى آراء تانية بتقول ان الاتنين متساويين فى حالة ان خريج تجارة عربى أخد كورسات اقتصاد او محاسبة بالانجليزي وهكذا
◾عموما المعيار النهائي اللى بيفرق فعلا مدى فهمك للمادة العلمية وأى حاجة تانية ممكن تتدارك مع الوقت 🙌
- كدة احنا خلصنا تشعبات اللغات ندخل على الدراسة والأقسام
◾الكلية 4 سنين بعدها بتتخرج بدرجة البكالريوس
وبتبدأ تدرس في الكلية
《1》- المحاسبة وفروعها
《2》- إدارة الأعمال وفروعها
《3》- التأمين وفروعه
《4》-الاقتصاد وفروعه
 《5》- الإحصا، الرياضة، القانون دى المواد اللى فى الغالب كلكم بتدرسوها قبل التخصص  
◾طيب سؤال اتسأل لينا هو أنا لازم أكون شاطر فى الرياضة ؟ والرياضة هناك شبه رياضة ثانوى كدة ؟
- اولا فلأ مش ضرورى تكون شاطر فى الرياضة
- ثانيا فيه مواد بتكون فيها الرياضة شبه ثانوى وفيه مواد بتكون مختلفة يعنى بتاخد رياضة بحتة زى اللى أخدتها قبل كدة وبيقي فيه《رياضة أعمال》 دي خاصة بالمواد التجارية ودى ال انت هتاخدها أول مرة فى الكلية ومبتبقاش شبه رياضة ثانوي👌
◾طيب ايه التخصصات اللى موجودة ؟ وبتخصص من امتى ؟
- بالنسبة للأقسام والتخصصات :
- الأقسام الشائعة اللى بتيجى فى بالنا أول ما بنسمع سيرة كلية التجارة هى وبلا شك
                       《المحاسبة وادارة الأعمال》
- وهما متوفرين فى كل الجامعات
 بتدخل الكلية تقعد 3 سنين وبعدين تختار فى السنة الأخيرة هتكمل محاسبة ولا ادارة أعمال وفي أغلب الجامعات بيكون التخصص من سنة 3 ✔
◾بالنسبة للمحاسبة :
- المحاسبة عموما الدراسة فيها تراكمية فبتحتاج فيها تكون فاهم كويس مواد المحاسبة فى السنين كلها وبتتخرج دارس كل أنواع المحاسبة وشويه مواد من اقتصاد اللى بتأهلك تكون محاسب شاطر قادر تعمل أى حسابات وتظبط الميزانية
وحاليا فيه شهادة اسمها شهادة 《CMA》ودى اختصار لCertified Management Accountant
《معناها بالعربى شهادة المحاسب الإدارى المعتمد 》
- الشهادة دى بتديك القدرة انك تدرس البيانات ال متوفره عندك ومن خلال البيانات دى تاخد قرارت ادارية والشهاده دي بتفرق فى مستواك فى الشغل جدا وبتوفرلك فرص شغل فى أماكن أحسن🏦
◾اما بقى إدارة أعمال:
- فانت هتركز على دراسة الموارد البشرية ودراسة الجدوى ومشروعات صغيرة وتسويق 👨‍💻👩‍💻
- وعدد الطلبة فى القسم ده بيكون أقل من محاسبة بس يعتبر العدد فيه كبير نسبيا بردو وبالنسبة للجامعات ال بتتخصص ادارة من سنة تالتة فبيتشعبوا في سنة 4 إما تسويق أو موارد بشرية أو ميزانيات وهكذا
◾دى الأقسام المعروفة لمعظمنا بشكل كبير
                                 لكن
في كام قسم كدة معظمنا ميسمعش عنهم وبيوفروا بديل حقيقى لطلبة كتير عندهم اهتمامات مختلفة عن المجالات التقلييدية لتجارة 💡
◾هنبدأ بقسم الإقتصاد والتجارة الخارجية :
- ده هنلاقيه فى جامعة حلوان بس والتخصصات الرئيسية اللى بتدرسها فى القسم ده هى :
- الافتصاد
- الاقتصاد الأولى
- التجارة الخارجية
وده يعتبر بديل كويس جدا ل ال ملحقش اقتصاد وعلوم سياسية وكان عاوز يتخصص اقتصاد لان القسم ده أصلا كان موجود قبل تأسيس كلية الاقتصاد والعلوم السياسية فى جامعة القاهرة ولما اتفتح سياسه واقتصاد في اسكندريه الكلية قامت علي المعيدين والدكاتره ال من القسم ده في تجاره
◾التخصص التانى هو :
- تخصص إدارة الأعمال ونظم المعلومات ال بنختصره فى BIS وال هى اختصار ل
 《Business  Information System 》
وهنا انت بتدخل على القسم ده على طول وبتقضى ال4 سنين فيه وهو بمصروفات بتختلف من جامعة لجامعة  
الدراسة فيه بتتقسم علي ال4 سنين
- أول سنتين بتدرس فيهم مواد تجارية ومواد عامة زى مهارات الاتصال و هكذا
- تاني سنتين واللى بيميزوه بشكل كبير بتدرس فيهم شبكات ، برمجة ، نظم
◾وال بيدرسلك غالبا بيكون دكاترة من هندسة وحاسبات
القسم عموما مش موجود غير في جامعة حلوان وجامعة طنطا  وبيعتبر من الأقسام المستحدثة 🙏
◾آخر قسم هنتكلم عنه ومش كتير يسمع عنه هو قسم 《اكتوارى 》
- ايه اكتوارى دى ؟ كلموني عربي لو سمحتم😣
- اكتوارى ده علم بنسميه علم تخمين المخاطر《 Actuarial science 》
-  بعمل فيه ايه بقى ؟
◾بص يا سيدى ده عبارة عن انك بتستخدم الطرق الحسابية والاحصائية علشان تقدر المخاطر فى قطاعات التأمين والصناعات المالية بمعنى تانى الاكتواريين دول بيشوفو ايه هى احتمالية التغيرات والأحداث اللى هتحصل علشان يقللوا الخساير  وبيدبروا وبيحطوا حلول فى حالة حصل أى تغير سلبى علشان الدنيا متبوظش 😎
- طيب بالنسبة للقسم ؟
- بص يا فندم مبدئيا هو مش موجود غير فى《 جامعة القاهرة والجامعة الأمريكية 》
- بتدخله بعد ما بتقضى سنة أولى فى الكلية سواء كنت تجارة عربى أو انجليزى (ده فى حالة انك فى جامعة القاهرة يعنى) مش الجامعة الأمريكية يعني أحنا غلابة "))
◾طيب ايه المواد الرئيسية اللى بتدرسها ؟ 👀
- بتدرس فيه مجموعة من مواد الرياضة والاحصاء والتأمين .
- وده كده يعتبر نبذة عن أقسام مختلفة👌
◾طيب آخر حاجة مجالات الشغل عموما ايه ؟
- خرجين قسم محاسبة بيشتغلوا عموما فى المحاسبة الادارية ، ومحاسبة التكاليف ، وفى البنوك وفى مصالح الضرايب المختلفة ✏🗒
- وخرجين ادارة أعمال بيشتغلو فى ادارة الموارد البشرية يعنى بيبقو مسئولين عن الموظفين فى الشركات أو أى مؤسسة عموما وبيتابعو معاهم شغلهم وكفاءتهم وبيقيموهم وبيوفرولهم التدريبات اللازمة 《HR》
- وممكن يشتغلوا كمان في التسويق والشركات المالية والبنوك والبورصات والهيئات العامة 《marketing 》
- وخرجين اقتصاد وتجارة خارجية بيكونوا اخصائيين اقتصاديين واخصائين في التصدير والاستيراد
وشركات التأمين وهكذا 🙌
◾عموما مفيش مكان شغل مبنحتاجش فيه لخريجين كلية التجارة بأنواعهم
《ملاحظة مهمة》:
سكك الشغل متاحة بشكل كبير ومش مقتصرة بس على مجال البنوك والمجالات المعروفه في تجارة
◾ اهم حاجه انك تطور من نفسك وخليك دايما متابع وشوف ايه هينميك وتاخده يعنى انت مثلا ممكن تشتغل فى الصحافة الاقتصادية لو مهتم بالصحافة أو مراكز الدراسات الاقتصادية ده غير انك ممكن تشتغل فى التدريب 👀
◾المتخصص بمعني انك تدي للناس زي كورسات فى مادة من المواد اللى درستها أو نوع محاسبة أو انك تشتغل في تدريب على تنمية المهارات عموما ده غير طبعا مجال الماركتينج أو التسويق وقد ايه هو مجال واسع ومطلوب بشكل كبير😎
◾وال عايزبن نأكد عليه ان الكلية دى من أكتر الكليات اللى ممكن تشتغل فيها على نفسك بعيدا عن الجامعة اللى انت فيها😀
- الكورسات الأونلاين المجانية وال مش مجانية متاحة فيها بشكل كبير وهتسهلك انك تتعلم صح
◾ونصيحة كدة اخيره حاول تظبط الانجليزى بتاعك لأنه هيفيدك كتير سواء هتاخد كورسات أونلاين فبتبقى بالانجليزي أو لو هتستخدم مراجع أو لو مقدم على شغل فهتحتاج انجليزي كويس معاك 👀
◾وبيبقى فيه كل سنة تدريبات الكلية بتوفرها للطلبة اللى تقديراتهم عالية فى البنوك حاول تاخدها لأنها هتفيدك جدا

======================
#كلية_تجارةE
◾كليه تجاره شعبه اللغة الانجليزية🏛
 ◾الكلية جزء من تجارة بس الدراسة فيها بتكون بالانجليزي✅
◾طب إيه الفرق بين تجارة وتجارة انجلش؟ 👀
《1》- الكتب في أغلب الأحيان مش بتتألف في مصر و بتبقى متألفة في دول تانية زي 《بريطانيا وكندا》                           
《2》- اماكن الدراسة مجهزة بشكل أفضل في تجارة إنجلش عن تجارة كمان الأعداد في تجارة إنجلش بتبقى أقل ودي ميزة 👌
《3》- الكلية بمصروفات بتختلف من جامعة لجامعة بس المتوسط بيبقى من 9000 ل 15000 وممكن تقل أو تزيد حسب الجامعة 💸
《4》- عشان تدخل الكلية لازم تبقى جايب درجة معينه في الانجليزي ودي بتختلف من جامعة لجامعة يعني مش حاجة ثابتة 🙌
◾الأقسام ✍ :
- أساس الكلية إن فيها 6 أقسام رئيسية بس بيختلف وجودهم من جامعة لجامعة وهما :
1- المحاسبة : أكبر قسم من حيث الأعداد 📊
2- ادارة الاعمال : من أكتر الأقسام ال عليها إقبال بعد محاسبة🤓
《والقسمين دول موجودين في جميع الجامعات》
3- الاحصاء والتأمين
4- الاقتصاد
5- التجارة الخارجية
6- سياسة
《ودول بيختلف وحودهم من جامعة لجامعة》
  ◾نظام الدراسة : ✍              
  - مدة الكلية 4 سنوات              
- في أول سنتين الدراسة بتبقى عامة بمعنى إنك بتدرس مواد من كل الأقسام وكل التخصصات
- في سنة 3 بتبدء تتخصص في قسم من الأقسام وفي بعض الجامعات بيبقى التخصص من سنة 4 حسب نظام الجامعة
كمان في أقسام معينة ممكن التخصص فيها يكون من سنة 2  زى 《قسم سياسة في جامعة أسيوط》💡
- التقييم أو الدرجات عموما بتبقي على 3 حاجات هما :
1- اعمال السنة
2- امتحان الميد ترم
3- امتحان نهاية الترم
《وبتختلف من جامعة لجامعة لإن أوقات في جامعات بتقيم على أساس presentations بيعملها الطلبة في مواد معينة》📚
◾مينفعش أبدا يبقى عندي شركة أو مؤسسة منغير خريج كلية تجارة
طب ليه ⁉️
- خريج الكلية بيكون على علم واسع محاسبيا او في الجوانب الادارية ب《مبيعات - خدمة عملاء - تسويق - موارد بشرية - استثمار وغيرها من التخصصات المختلفة 》
◾هنتكلم دلوقتي عن فرص العمل للقسمين الأساسيين في الكلية وهما 《 محاسبة و إدارة أعمال 》
- محاسبة :
خريج قسم محاسبة بيبقى ليه فرص كتير في أماكن كتير زي 《البنوك وشركات المحاسبة والضرائب》 هما أكتر الأماكن احتياجا لخريجي القسم
- وأنت كطالب تجارة بتبقى محتاج شهادات تزيد من خبرتك  زي 《CMA , CIA , CFA , CPA <IFRS 》و كلهم شهادات معتمدة دولياً😎
- وخريج كلية تجارة وخصوصا قسم محاسبة مش بس بيشتغل في بنوك أو شركات محاسبية ،كمان يقدر يشتغل في 《المستشفيات وشركات الادوية و الشركات الخاصة》 وعموما اي استثمار لازم يبقى فيه جزء الحسابات✏🗒
◾إدارة أعمال : 👩‍💻👨‍💻
- خريج قسم إدارة أعمال بيبقى عنده خبره في كذا مجال منهم 《التسويق - الموارد البشرية - خدمة العملاء - الادارة وغيرهم 》
-  بيبقى متاح لخريج قسم إدارة أعمال الشغل في كل الأماكن ال قولنا عليها لقسم محاسبة من شركات وبنوك ومستشفيات وغيرهم بس في positions مختلفة تتناسب مع طبيعة دراسته
زي مثلا شغله ك HR / PR / Marketeer وغيرهم✅
-  خريج القسم بيحتاج لشهادات ودراسات تانية عشان يزود معلوماته زي مثلا شهادة MBA
- خريج القسم ده بيبقى مؤهل لإنه يعمل المشروع الخاص بيه ويدرسه من كل الجوانب عشان يطلع بالنتيجة المناسبة في النهاية 👌
◾الكلية مش سهلة ومش صعبة هي محتاجة استثمار لوقتك فيها و استغلال كل الفرص المتاحة لأنك تتعلم و متكتفيش بدراسة الكلية بس لازم يبقى عندك نظرة أوسع
إبحث ودور واجتهد عشان تتعلم وتواجه سوق العمل😀
==============
#كلية_الحقوق
مجرد ما نسمع اسم كلية الحقوق هيتردد ف ودننا جملة بصدي سينمائي رهيب: ( إنت فاكرنا عايشين ف غاابة !! 😡 )
ودا اساس كلية الحقوق، إننا بشر وبنتعامل مع بعض طول الوقت، فلو مكنش في قوانين بتحكم الأطراف ال عايشة وبتحفظ حقوق كل شخص ف المجمتع هنكون عايشين فعلا ف غابة !
عشان كدا كلية الحقوق من أهم الكليات الموجودة ف مصر، لأنها مرتبطة بالعدل ⚖
وهي مش بس كلية قيمتها عالية جدا، لكن الأهم إنها ممتعة جدا ف دراستها..
⚠️ هيطلع واحد يقول يا عم كويسة ايه بس ؟! صل ع النبي ف قلبك 🥱
ودا لأنه مش مستوعب قيمتها ولا هي من اهتماماته، لكن دخلها عشان كلية وخلاص، ودا مش صح..
دراسة الحقوق والقوانين ومعرفة الأحكام والعقوبات والجزاءات ممتعة جدا..
فكرة إنك تبقي عندك قضية وتبدأ تدور وتدعبس فيها وتجتهد عشان توصل للحقيقة بتكون رحلة ممتعة جدا الحقيقة 😍
📍معلومات عن الكلية:
- موجودة ف كل جامعات مصر.
- في منها انتظام وانتساب (الفرق ببساطة إن انتظام تنسيقها أعلى ومصاريف أقل، انتساب تنسيق أقل ومصاريف أعلى،، لكن الدراسة بتكون نفسها، وبتكونوا ف نفس الكلية مع بعض)
- الكلية موجودة بلغات:
عربي: مش له أي شروط، غير إنك تكون جايب المجموع.
انجليزي: بيكون بمصروفات، موجودة كانتظام بس مفيش انتساب، وجايب ف الانجليزي أكتر من 80% من مجموعها = تقريبا 40/50.
فرنساوي: بيكون في امتحان تحريري، وامتحان شفوي لازم تجتازهم الاتنين عشان تتقبل ف القسم الفرنساوي، ويكون مستواك ( DELF  B2 ) ف الفرنساوي.
وف القسم الفرنساوي بتكون بتدرس بجانبين المصري والفرنساوي، عشان كدا مصاريفها بتكون غالية شويتين تلاتة 😂.
📍الدراسة:
- الكلية 4 سنين
- بتختلف المواد حسب كل جامعة وإيه امكانياتها ف توفير دكاترة للمواد دي، لكن في مواد أساسية لازم بتتعلمها ف اي جامعة وهي أساس كلية الحقوق أصلا، ف تعالوا نشوف المواد دي زي إيه 😁:
1️⃣الشريعة الإسلامية: وبتدرس فيه الأحكام المذكورة ف الشريعة الإسلامية، ومع إن مصر دولة إسلامية ف المقام الأول لكن بيختلف تطبيق أحكام الشريعة الإسلامية حسب مدى تأثر الدستور بالشريعة دي.
لكنها مهمة جدا لاننا دايما محتاحين أشخاص فاهمين أحكام الفقه والشريعة الإسلامية عشان أحكام الميراث مثلاً.
2️⃣القانون المدني : بتتعرف فيه ع المؤسسات المدنية الموجودة وطبيعة عملها، وكمان ممكن تتعرف على قوانين المِلكِيّة والفكرية وإزاي تصيغها وتفهمها، وكمان بتدرسوا الأحوال الشخصية لغير المسلمين في القانون المدني، لأن القانون المدني هو المرجعية لغير المسلمين.
3️⃣القانون التجاري : ويشمل تخصصات القانون التجاري، القانون البحري، القانون الجوي، التشريعات التجارية لتنظيم المنافسة، وحماية المستهلك، ف الجزء دا من الدراسة مرتبط بالأعمال المالية والشركات والبنوك وغيرهم من المؤسسات.
4️⃣القانون الجنائي: جنائية = الجرايم والعقوبات، ودا مهم جدا لأنه غالب شغله ف مصر إن لو حد متهم ف قضية ومظلوم فيها بتبدأ تدافع عنه، وتحاول تعرف مين الجانى الحقيقي.
فأنت بتدرس ف الجزء دا القوانين والإجراءات الجنائية، وكل جريمة هيكون عقابها إيه بالظبط.
⚠️إنت بتحتاج تكون دقيق جدا ف اختيار قضاياك عشان متخرجش تدافع عن واحد فاسد وظالم ولإنك محامي شاطر ف هتقدر تخرجه، لكن لازم إنت تسعى لتنفيذ الحقوق اصلا
⚠️ بمعنى تاني خلي بالك من ضميرك 😇
5️⃣القانون العام : بيأهلك إنك تشتغل في مجال القانون الدستوري، عشان كدا بتدرس فيه تخصصات القانون الدستوري، والنظم السياسية، والقانون الإداري، والعقود الإدارية.
⚠️في أجزاء تانية بتقدر تدرسها أو تاخد نبذات عنها ع حسب كل جامعة زي:
- قانون المرافعات: بتدرس فيه قوانين المرافعات المدنية والتجارية.
- القانون الدولي العام: بتدرس فيه القانون الدولي العام و التنظيم الدولي.
- القانون الدولي الخاص: بتدرس فيه قوانين الجنسية، مركز الأجانب، وتنازع القوانين، وتنازع الأختصاص القضائي.
- فلسفة القانون وتاريخه: بتدرس فيه فلسفة القانون، تاريخ القانون، علم الإجتماع القانوني، والقانون الروماني.
- القانون الإجتماعي: بتدرس فيه قانون العمل والتأمينات الإجتماعية، القانون النقابي، وتشريعات التعاون.
- المالية العامة والقانون المالي والتشريعات الإقتصادية: و بتدرس فيه المالية العامة، القانون المالي والضرايب، التشريعات الإقتصادية و الإقتصاد.
وبعد كدا بتخلص وبتبقي جاهز لمواجهة الحياة العملية وبتبقى خريج ليسانس حقوق أد الدنيا 😎
والشغل منها واسع جدا جدا، فمفيش شركة أو حتى أعمال تجارية دلوقتي إلا وبتحتاج محامي ليها، وكمان ممكن تقدم بعدها ف كلية الشرطة، وممكن تشترك ف نقابة المحاميين عشان تقدر تمارس مهنة المحاماة.
وممكن تعمل دراسات عُليَا وتتخصص ف حاجة معينة، وتبقي محامي متخصص.
📍المذاكرة:
من اكتر الافكار المنتشرة عن كلية الحقوق إنها صعبة، ودا منطقي جدا إن الناس تبقي شايفة دا لإن الألفاظ القانونية والحقوقية مش متداولة اصلا ف حياتنا اليومية، عشان اقول إن كل الناس هتبقي فاهمة الالفاظ دي ومذاكرتها.
وبالتالي أه هتحتاج تجتهد شوية عشان تثبت حبة مفاهيم ومصطلحات ف دماغك، هتحتاج يبقي ليك ذاكرة كويسة عشان تربط بين القوانين وبعضها، والبنود الدستورية.
⚠️ عشان كدا مهم جدا تبقي داخل الكلية ومستعد ليها، ومهيأ نفسك للمذاكرة، والأهم هو (فهم) كل حاجة هتعدي عليك، لأن إنت لو مش فاهمها مش هتبقي فاهم تطبيقها عامل ازاي، وبالتالي مذاكرتك ليها هتكون بلح ف الآخر 🤦‍♀️🤷‍♀️.
⚠️ نقطة تانية مهمة جدا وهي التدريب ف مكاتب المحاماة، مع محامي مُمارس للمهنة، وتبدأ تشوف تطبيق القوانين النظرية ال إنت بتدرسها بيكون عامل ازاي ع أرض الواقع، والأفضل تبدأ فيها من بدري لو تقدر من اولى او تانية كلية 👏
وبكدا نكون اتكلمنا ف كل النقط المهمة ليك عشان تقرر الكلية دي مناسبة ليك ولا لا، لو عندك أي سؤال سيبه ف الكومنتات وهنرد عليك 😎.
==================
المعهد الفني الصحي
◾نظراً للتساؤلات الكتير عن المعهد الفني الصحي
في البوست ده إن شاء الله هنتكلم عنه ببعض التفصيل
- يلا 🤔
                                 《المعهد الفني الصحي 》
◾معهد فوق متوسط بتقدر تدخله من ثانوية عامة بشُعبتي العلمي 《علوم، رياضة 》 والدبلوم التجاري و المدارس الثانوية الصناعية 👌
◾ المعهد موجود في جامعات كتير زي بني سويف والمنصورة وطنطا وبورسعيد واسماعياية وسوهاج وأسوان وأسيوط وبنها والزقازيق وإمبابة وغيرهم
◾مدة الدراسة فيه 4 سنين بس منفصلين يعني سنتين دراسة وبعد كده تكليف بعد كده 《سنتين بكالريوس 》 اختياري
- كان مُقرر إن هيتم دمجهم ويبقوا 4 سنين بعدهم تكليف كمدة دراسة فعلية بس الحقيقة معندناش معلومات أكيدة إذا القرار اتنفذ أو لا 🤓
◾المعهد فيه أقسام كتير وبتختلف من جامعة لجامعة بس في المجمل هما  :
- المعاونون الصحييون
- المعامل
- الأشعة
- صناعة الأسنان
- التسجيل الصحي والإحصاء
- التمريض
- صيانة الأجهزة الطبية
- شعبة الرعاية الطبية العاجلة
- شعبة التوليد وصحة المجتمع
-  شعبة التمريض النفسى والصحة النفسية
 - شعبة الطوارئ والحالات الحرجة
 - شعبة تمريض الأورام
◾هنتكلم بتفاصيل شوية عن أشهر الأقسام في المعهد :
《1》- قسم الأشعة :
- خريجين القسم ده بيشتغلوا في المستشفيات والمراكز الطبية والخدمية التابعة لوزارة الصحة والعدل و التعليم العالي وطبعا مختلف القطاعات الطبية
- أول ما بتتخرج علطول بتاخد تصريح لمزاولة المهنة و وبتشتغل في 80% من أنواع الأشعة وممكن بعد كده تفتح مركز أشعة خاص بيك وتكمل دراستك في كلية علوم طبية أو تكمل سنتين بكالريوس في المعهد لو مكنتش كملتهم🤓
《2》- قسم التحاليل الطبية :
- التكليف للقسم ده بيبقى في  وزارة الصحة وجميع الوزارات ال ليها خدمات طبيه، زي 《 المسشفيات العسكرية والطب الشرعي وغيرهم》💊
- ويقدر كمان خريج القسم ده يشتغل في معامل التحاليل و معامل الشركات الكيماويات و قسم التحاليل من الأقسام المهمة في التشخيص وله سوق كبير في العمل الخاص ونسبة كبيرة من أصحاب المعامل خريجي المعهد الفني الصحي.💉
《3》- قسم الأسنان :
- ببشتغل الخريج من قسم الأسنان فى المستشفيات المركزي التابعة لوزارة الصحة
- ويقدر يفتح معمل تركيبات الأسنان و يكون مسئول عن التركيبات وتجهيزها وهكذا
- بس في شرط مهم عشان تتقبل في القسم ده بيتعملك اختبار صغير كده يعرفوا انت عندك موهبة النحت ولالا لأن القسم بيعتمد بشكل كبير على المهارة دي بس متقلقش الامتحان مش بيكون صعب وتقدر تعديه بإذن الله ✔
《4》- قسم التسجيل الصحي :
- من أكتر الأقسام المريحة والتكليف بيكون في المستشفيات المركزية ووحدات الصحة، وبيكون مسئول عن تنظيم العملية الصحة إداريا.
《5》- قسم المعاونين الصحيين :
- التكليف للقسم ده ببكون في الإدارات الصحية والإشراف  على المطاعم وشركات المياه ومصانع المنتجات الغذائية وبيكون له سلطه في المنطقة ال بيتعين فيها
《6》- قسم أجهزة طبية :
- وهو من الأقسام المهمة في مجال الهندسة الطبية
-  خريجين القسم ده بيشتغلوا في المستشفيات والوحدات ومستشفيات التعليم العالى،وبيقدروا يشتغل في الصيانة او المبيعات او ممكن يشتغلوا في التصنيع ويطوروا من مشروع تخرجهم لو كان جهاز طبي ، وبيقدروا يكمل دراستهم في كليات الهندسة او العلوم الطبية.🏛
◾الأقسام كلها متاحة لعلمي علوم ما عدا قسم أجهزة طبية فهو خاص بعلمي رياضة بس ، كمان في تنسيق داخلي وكل قسم بياخد من نسبة معينة بتحددها كل جامعة 👌
- المعهد كويس جدا ومجالاته كتير وضمن النطاق الطبي كمان ومجموعه مش بيكون كبير ولا قليل وطبعا النسب بتختلف من سنة لسنة لذلك منقدرش نحددله بالظبط
◾إذا قررت تدخل المعهد لازم تذاكر كويس جدا وتتقن دراستك عشان تتقن شغلك فيما بعد وتقدر تحقق أحلامك
- آخر حاجة عايزين نقولها إن عادات وتقاليد المجتمع عمرها ما هتفيدك ولا هتحققلك أحلامك إذا كان هي بس ال مسيطرة عليك 🤞
====================
#فنون_جميلة 🖼
نفكركم بتقسيمات كليات الفنون 🎨 :
📍الفنون التطبيقية: بتقبل من علمي رياضة - علوم (واتكلمنا عنها بالتفصيل ف البوست ال فات)
📍الفنون الجميلة: ودي متقسمة لـ جزئين: (ركزوا فيهم كويس عشان هنتكلم عنهم كتير 🥱😂)
- قسم عمارة: بيقبل من علمي رياضة بس
- أقسام الفنون:
- قسم ديكور: بيقبل من علمي علوم - رياضة
- باقي الأقسام(نحت، جرافيك، تصوير): بتقبل من علمي وأدبي
📍التربية الفنية: بتقبل من جميع الشعب
🎨 فنون جميلة من الكليات ال لازم تنجح ف امتحان القدرات بتاعها (وال بيكون مختلف ع حسب القسم ال بتقدم عليه) عشان تتقبل فيها + المجموع بتاعك بناء ع التنسيق.
📍السؤال المتكرر عن فنون جميلة، هو لازم أكون باعرف ارسم كويس عشان أدخل فنون جميلة؟
زي ما شوفنا التقسيمة فوق إن فنون جميلة ف القدرات بتتقسم لقدرات عمارة وفنون، ف لو إنت مقدم لقدرات الفنون، ف آه لازم تكون عندك مهارات كويسة ف الرسم مش لازم تبقي بيرفكت بس ع الأقل عندك اساسيات كتير، لأن مقاييس القبول ف فنون جميلة من الناحية الفنية أكتر من فنون تطبيقية بشويتين 😅
ودا منطقي جدا لأن فنون جميلة اعتمادها الأكبر ع الناحية الجمالية (ال بقوانين مش الذوق الشخصي أينعم)، لكن تطبيقية فيها ناحية هندسية شوية، ف بيكون الجانب الجمالي فيها مش أهم مقياس.
لو مقدم لقسم عمارة، ف لأ مش مهم أوي لأن الامتحان بيكون مركز ع مهارات الهندسية والمنظور أكتر منها الناحية الجمالية.
📍 الدراسة:
الكلية 5 سنين..
سنة إعدادي، و4 سنين تخصص..
⚠️ السنة الإعدادي بتفرق ف دراستها ع حسب إنت مقدم على إيه 🤔
- لو مقدم عمارة: فأنت بتتخصص من أول سنة، وسنة إعدادي بيكون فيها مواد مخصصة للقسم نفسه.
زي مثلا أسس تصميم، وهندسة وصفية، وتصميم معماري.
- لو مقدم ديكور: بتتخصص بردو من اول سنة، وسنة إعدادي بتاخد فيها مواد مخصصة للقسم نفسه.
زي مثلا أسس تصميم، وإسقاط هندسي، ورسم، وتصميمات.
- لو مقدم فنون: فأنت بتتخصص من تاني سنة، وف أول سنة بتاخد مواد خاصة بال3 أقسام الفنية، فبتتأهل ليهم هم ال3 عشان كدا بيكون ليك حق الاختيار بينهم من تاني سنة 👏
زي اسس تصميم، الرسم، الحفر، التصوير، النحت، التشريح.
⚠️ زي ما قرأتوا إن في مادة اساسية لكل الأقسام وهي أسس تصميم، ودا عشان زي ما قولنا، إنها بتهتم بالناحية الجمالية المبنية ع قوانين وقواعد مش بشكل عشوائي.
⚠️ في مواد عامة ف اعدادي مشتركة بين كل الأقسام زي انجليزي وتاريخ حضارة وحقوق إنسان.
⚠️ في مواد مشتركة بين عمارة وديكور زي الفيزيا والكيميا.
📍 التخصص:
⚠️توضيح إن ف تعريفك سنوات الكلية، لما بتقول أنا أولى تخصص بتكون ف تانية جامعة لأن عندك سنة اعدادي 😅
⚠️ فنون جميلة موجودة في 5 جامعات حكومية (حلوان واسكندرية والمنيا وأسيوط والأقصر)، ومش موحودة ف جامعات خاصة.
⚠️ بيكون في تنسيق داخلي لل3 تخصصات الفنية بعد سنة اعدادي، بيكون نفس النظام بتاع ثانوي إنك بعد النتيجة بتدخل الرغبات بتاعتك وبعدين بتظهر النتيجة وبعدين بيظهر تنسيق الأقسام وبتعرف إنت اتخصصت إيه.
⚠️ الأقسام الأساسية = 5 أقسام موجودين ف كل الجامعات، في جامعات عندها تغيرات بسيطة جدا جدا هنتكلم عليها عند كل قسم.
📍الأقسام:
1️⃣ قسم عمارة: دراستهم فيها من أول سنة بتكون متخصصة ف العمارة، وكل مواد سنين الكلية بتهتم إنها تخرج مصمم معماري قادر يبقي فاهم كويس العمارة اساسها إيه وتنفيذها بشكل صح أزاي.
والخريج منها بيكون متعلم كتير عن: التصميم المعمارى، تخطيط المدن، تصميم المواقع والاسكان، تصميمات تنفيذية، المعالجة البيئية للمبانى(يعني بتعرف إيه تأثير البيئة المحيطة بالمبني على المواد ال انت مستخدمها)، الانشاء المعمارى، التجهيزات الفنية للمبانى(ودا من ضمن مميزات عمارة فنون جميلة)، المنظور الهندسى والظل، طرز معمارية، ونظريات التخطيط.
⛔ طيب إيه الفرق بين عمارة فنون جميلة، وعمارة هندسة؟
دا سؤال من الأسئلة التاريخية لقسم العمارة 😂 وال مفيش حد بيقدر يجاوب عليه إجابة جوهرية ف اساس الشغل نفسه لأنك محتاج حد يكون درس ف الكليتين ودا قد يكون مستحيل 😅 ومعظم الفروقات بتكون تقنية ف شكل الدراسة مش أكتر.
ف خلينا ف المهم إن القسم دا بيكون فرصة كويسة لل مش لحق هندسة بسبب المجموع.
2️⃣ قسم الديكور:من اسمه بيهتم بالناحية الجمالية للمكان، وشكل ديكوراته عاملة ازاي وإيه أنسب حاجة نقدر نستخدمها ف المكان ع حسب وظيفته وذوق صاحبه، سواء كانت بيوت أو محلات ومعارض، أو مسارح، أو أفلام وغيرهم.
سنين الكلية فيها مواد بتركز إنهم يكونوا عندهم معلومات كتير عن: تصميمات العمارة الداخلية، تصميمات الديكور التنفيذية، طرز التأثيت (من الأثاث)، تصميمات الفنون التعبيرية، نظريات الديكور، الاسقاط الهندسى، دراسات تحليلية، هندسة المناظر، مواصفات التخصص الفنية وحساب الكميات، تنفيذ وماكيت، تاريخ مسرح وسينما، وكاميرا واضاءة.
⛔ ف سنة 3 تخصص بتبدأ تختار شعبة تتخصص فيها أكتر ما بين شعبتين:
  أ - العمارة الداخلية
 ب - الفنون التعبيرية (ديكورات المسارح والسينما والدراما)
3️⃣ قسم الجرافيك (وال اسمه قسم التصميمات المطبوعة في جامعة اسكندرية): وبيهتم برسم الجرافيك = باختصار وببساطة إنك بتحول الرسومات الورقية بتاعتك لرسومات ديجيتال، وال بتدرس فيه مواد متخصصة جدا ف الرسم والشخصيات وغيره
⛔ ف سنة 3 تخصص بتبدأ تختار شعبة تتخصص فيها أكتر:
⚠️ جامعة حلوان:
1. شعبة الرسوم المتحركة ورسوم الكتاب (الشعبة دي موجودة ف جامعة المنيا كقسم مستقل عن قسم الجرافيك) وال بتهتم إنك تبقي خارج من الكلية قادر تشتغل شغل أنيميشن، وال بيكون عبارة عن إنك بترسم ال objects بتاعتك وبتبدأ تحركها زي ما أنت حاطط الفكرة.
2. شعبة التصميم المطبوع: وال بيكون ف البوسترات وغيره، والقصد منه إنه بيكون لقطة واحدة مش متحركة زي الانيميشن.
(باختصار زي الصورة والفيديو)
⚠️ جامعة اسكندرية متشعبة أكتر بنفس المعنى لشعب جامعة حلوان لكن المسميات مختلفة:
1. شعبة الاتصال الجرافيكي
2. شعبة رسوم النشر والصور الإيضاحية
3. شعبة الطبعة الفنية
4️⃣ قسم النحت: بتبقي قادر تنحت أشكال وأجسام للنصب التذكارية او الأماكن الاثرية والمؤسسات الوطنية سواء المحلية أو الأجنبية.
⛔ ف سنة 3 تخصص بتبدأ تختار شعبة تتخصص فيها أكتر:
1. النحت الميداني والفراغي (أن بيكون عندك مساحة فاضية زي ميدان أو مدخل قصر وهكذا وبتبدأ تقرر هتملاها بأنهي عناصر نحتية)
2. شعبة النحت البارز والميداليات (بيكون إن عندك سطح معين وتبدأ تنحت فيه الخامة الزيادة عشان ف الآخر يطلع الشكل ال أنت عايزه)
⚠️ ف جامعة اسكندرية متشعبة أكتر من كدا وبيكون في شعبة خاصة للميداليات، وشعبة خاصة للنحت الخزفي (يعني النحت باستخدام مادة الخزف)
⚠️ في جامعة المنيا عندها قسم زيادة إسمه الترميم وصيانة الآثار، هو ليه علاقة بالنحت لكن بسبب طبيعة المنيا والبلاد ال حواليها ف بيحتاجوا ناس متخصصين ف ترميم الآثار عشان آثار الأقصر وأسوان.
5️⃣ قسم التصوير (تصوير بمعنى الرسم مش التصوير الفوتوغرافي): ودا ال بيكون عندهم الجانب الفني كبيير جدا، وال بيعملوا اللوحات ال بتتباع وهكذا.
⛔ ف سنة 3 تخصص بتبدأ تختار شعبة تتخصص فيها أكتر ما بين شعبتين:
1. شعبة التصوير وال بتتعلم فيها طبيعة حية والرسم الكروكي بالقواعد الصح، والمناظر الخلوية، وكمان بتتعلم فيها ترميم اللوحات الفنية.
2. شعبة التصوير الجداري: ال بتتعلم فيها الرسم ع الجداريات والحيطان وهكذا.
 ⚠️ طبيعي جدا إنك تحس إن مش فاهم الفاظ كتير من ال اتقالت، ببساطة خد اللفظ وحطه ف الgoogle search هيطلع لك صور كتير هتفهم منها القصد من الكلام 😁👏
📍طبيعة الدراسة:
1. جزء عملي: ودا جزء كبير جدا ومهم جدا ف الكلية ف اي تخصص، ودا ال بنعمل فيه مشاريع ولوحات وبنسهر ف الكلية ونطبق ف البيت بالأيام عشان ننجزه وممكن بعد دا كله يترفض وتروح تعيده زي العسل كدا 😂😌🙊
2. جزء نظري: هو مهم جدا عشان المعلومات النظرية بتساعد ف التطبيق، لكن مش بيحتاج مجهود ومعظم الدكاترة بيكونوا مقدرين إننا مسحولين ف العملي فبيسهلوا علينا النظري 😁
=======================
كلية الثروة السمكية
◾كلية مميزة ومش معروفه في نفس الوقت ومجالها في مصر كمان تحديداً حلو جدا 👌
- بالمناسبة إزاي يبقى عندك بحرين ونيل ومتعرفش عن الكلية دي ؟🤔
《كلية الثروة السمكية 》
◾ مبدئيا الكلية دي من الكليات المستحدثة في مصر يعني اتفتحت من قريب وتحديدا سنة 2009
- وطبيعي كلية ثروة سمكية لازم تتواجد كبداية في مدينة ساحلية وكانت المدينة دي هي السويس
- بدءت الكلية في جامعة السويس وبعدها بقت موجودة في جامعة كفر الشيخ و من ثم في أسوان
- الكلية مش موجودة غير في ال 3 محافظات دول بس🤞
◾الكلية بيقدر يدخلها طلبة علمي علوم وعلمي رياضة كمان وتنسيقها عموما بببقى متوسط فبتبقى متاحة لشريحة كبيرة من طلبة الثانوية العامة 👨‍🎓👩‍🎓
◾مدة الدراسة في الكلية 4 سنين
◾بالنسبة للأقسام فهي بتختلف من جامعة لجامعة ولكن في المجمل عدد الأقسام 8 موجودين في جامعة السويس كلهم أما في جامعتي كفر الشيخ وأسوان فموجود اقسام اه وأقسام لا ❌
◾الأقسام هي :
1- قسم البيئة المائية
2- قسم الاستزراع السمكي
3- قسم تكنولوجيا تصنيع الأسماك
4- قسم العلوم الهندسية
5- قسم التنمية البشرية والاقتصاد
6- قسم الملاحة والدراسات البحرية
7-قسم الصحة وأمراض الأسماك
8- قسم المصايد
◾الأقسام كلها مرتبطة ببعض شوية وكلهم ينفعوا لطلبة علمي علوم ماعدا قسم العلوم الهندسية فهو القسم الوحيد لطلبة علمي رياضة📊
◾هنتكلم دلوقتي بتفصيل شوية عن الأقسام 👀 :
《1》- قسم الاستزراع المائي : القسم ده موجود في ال 3 جامعات وهو من أهم الأقسام الموجودة وهدفه إعداد "أخصائي استزراع مائي"، ويهتم بإنشاء المزارع السمكية، وطرق تربية الأسماك والأحياء المائية الأخرى وتفريخها على نطاق تجاري، وكذلك الاهتمام بتغذية وصحة الأسماك وتكاثرها وتفريخها.🦈
《2》- قسم الاستزراع السمكي : زي ما قولنا قبل كده إن الأقسام مرتبطة ببعض شوية فمثلا قسم الاستزراع السمكي هدفه تطوير الطاب أكتر في مجال الاستزراع المائي و زيادة إنتاج مصر من منتجات الأسماك 🐟🐟
《3》- تكنولوجيا تصنيع الأسماك : القسم ده هدفه تقليل فاقد الأسماك عن طريق إعداد الطلاب لدراسة مقررات تغطي النواحي التكنولوجية المختلفة في مجال حفظ وتصنيع وتداول وتخزين الأسماك، ومنتجاتها 🦀🐚
《4》- العلوم الهندسية : القسم ده لطلبة علمي رياضة بس زي ما قولنا قبل كده👆 القسم ده بيهدف لإنشاء المزارع السمكية وإدارتها، وحل المشكلات الهندسية في مزارع إنتاج الأسماك وإيجاد الحلول المناسبة لها🙏
◾إيه المواد ال هتدرسها في الكلية دي ؟🤔
- مقدمة في الثروة السمكية،
- بيولوجيا الأحياء المائية،
- كيمياء عضوية وتحليلية،
- البيئة المائية والتنوع البيولوجي
- ميكروبيولوجي الأحياء المائية،
 - مبادئ علم الاقتصاد
- فسيولوجيا الأحياء المائية،
- الإحصاء البيولوجي وتصميم التجارب،
 - تكنولوجيا نظم المعلومات،
- مهارات الكتابة العلمية،
- كيمياء المياه والأراضي،
- فلك الأرصاد جوية.
🚩دي المواد ال طالب كلبة ثروة سمكية بيدرسها بشكل عام بتختلف من قسم لقسم طبعا ده بجانب مواد التخصص ، مش معنى كده إنك هتدرس كل المواد دي مره واحده لأ احنا بس جمعنا كل المواد ال بتتم دراستها خلال فتره الكلية عشان يبقى عندك عنها خلفية مسبقة🙏
◾بالنسبة لمجالات الشغل 👀 :
- في مجال الاستزراع السمكي البحري، والمفرخات، بجانب العمل في مجال الغذاء الطبيعي للأسماك، ومصانع التعليب والحفظ والشركات الغذائية المختلفة 💸💸
- كمان ممكن يشتغل في مراكز البحوث، وفي مجال الجدوى الاقتصادية، والعمل في إدارة تسويق الأسماك والمصايد، وفي مجال سفن الصيد كضابط ثالث، وفي مجال تصنيع وتصميم معدات الصيد الحديثة
- شركات الاستيراد والتصدير وطبعا المصايد السمكية
- وطبعا مجال التدريس والتعيين في الجامعة🏛
◾الكلية مش صعبة ومش سهلة بس نقدر نقول إنها مميزة لأن مجالها جديد وهي ككلية مستحدثة في مصر ده بيخليها مميزة أكتر،  لازم تسعى وتبذل مجهود عشان توصل ل ال أنت عايزه 👌
   《يارب بعد كل ده تبقى عارف تفرق بين أنواع السمك بس أهم حاجة 😀》

 ↚

==============
كلية علوم ذوي الإحتياجات الخاصة
◾كلية لو اتعلمت فيها صح هتساعد ناس كتير قبل ما هتساعد نفسك 🤔
- كلامنا في البوست ده هيكون عن :
             《كلية علوم ذوي الإحتياجات الخاصة 》
◾الكلية من الكليات الجديدة في مصر ، موجوده في جامعتين بس هما الزقازيق وبني سويف
◾أول سنة دراسية بدءت فيها الكلية ونزلت في التنسيق كانت سنة 2017 / 2016
◾الكلية لطلاب الثانوية العامة بمختلف الشُعب يعني علمي علوم ورياضة وأدبي 🤓
◾في جامعة الزقازيق الكلية اسمها 《علوم الإعاقة والتأهيل》 أما في بني سويف فهي اسمها 《علوم ذوي الإحتياجات الخاصة 》♿
◾هل في فرق بين الإتنين؟ 👀
- آه في فرق مش كبير بس هنعرفه لما نكمل👌
◾الكلية فيها برنامجين أو قسمين
- البرنامج 1 《التربوي 》 : ده بقى البرنامج الأكاديمي و من خلاله بتقدر تكون مدرس وبتتخصص بقى إما مدرس أساسي 《ابتدائي》أو مدرس عام 《إعدادي وثانوي》
- بتختار المادة ال هتتخصص فيها بعد اختيارك الأساسي او العام وطبعا مواد التخصص بتختلف
🚩 يعني مثلاً : لو اتخصصت عام المواد ال هتبقى متاحة ليك هي 《عربي ، انجليزي ، رياضة ، علوم ، دراسات ، حاسب آلي 》
🚩 أما بقى لو اتخصصت عام فالمواد المتاحة هي 《عربي ، انجليزي ، رياضة ، علوم ، تاريخ ، جغرافيا ، فيزيا ، كيميا ، ييولوجي ، حاسب 》
⚠️ ملاحظة مهمة :
- لو انت كنت علمي علوم أو رياضة فأنت متاح ليك كل المواد أما لو كنت أدبي فهيبقى متاح ليك المواد الأدبية بس يجانب العربي والانجليزي 👩‍🏫👨‍🏫
- التخصص بيبدء من سنة 1
⚫ سؤال مهم
- لما اتخرج هشتغل إيه ؟!
- تخصص تربوي بيأهلك تشتغل مدرس في الأساس في المدارس الخاصة بذوي الاحتياجات الخاصة او مدرس في المدارس العادية لأنك بتكون مؤهل للتعامل مع كل الفئات👌
◾البرنامج 2 《الإختصاصي》:
- ده بقى قسم الإعاقة وبيحتوي على 5 شُعب هي :
- الإعاقة البصرية
- الإعاقة السمعية
- التوحد
- اضطرابات اللغة والتخاطب
- صعوبات التعلم
◾بالنسبة لمجالات الشغل ؟
- لما بتتخرج من الكلية بتقدر تبقى مترجم بلغة الإشارة
- أخصائي توحد في مراكز التوحد والتخاطب
- بتقدر تشتغل في مراكز التأهيل النفسي والمستشفيات النفسية المهتمة بذوي الإحتياجات الخاصة
- طبعا مجال التدريس في الجامعة 《ذاكر بقى》
- المراكز خارج مصر بقى وخصوصا دول الخليج وبعض الدول الأوروبية والآسيوية المهتمة بذوي الإحتياجات الخاصة 🤞
◾دلوقتي بقى إيه الفرق بين الكلية في بني سويف والزقازيق ؟
- الفرق إنه من بني سويف بتتخرج أخصائي تربوي يعني بتجمع بين البرنامجين أما الزقازيق فبتبقى تخصص إما تربوي أو أخصائي
- علفكرة ممكن تعمل دبلومة لمدة سنة لو إنت اخصائي بس وتبقى تربوي كمان✔
◾مدة الدراسة في الكلية 4 سنين وشغالة بنظام الساعات المعتمدة
- لما بتقدم في الكلية بيتعملك إختبار كده عشان يعرفوا قدرة تحملك على الكلية وكمان يحددوا قدراتك الجسدية والذهنية بس متخافش بيبقى بسيط ونادر جداً إن حد يترفض بجانب طبعا إنك بتتسأل في معلومات عامة عن المجال ال أنت داخل فيه
◾لازم تتأكد مليون مره من نفسك قبل ما تدخل الكلية دي لأنها محتاجة صبر ومجهود وحب كمان عشان تقدر تكمل فيها
- في الآخر بنشكرك جداً على مجهودك الرائع ال هتبذله إذا قررت تدخل الكلية دي وبنشجعك
بالتوفيق👋
=====================
#كلية_سياسة_وإقتصاد
دايما من واحنا صغيرين بنبص للكلية دي ونفسنا ندخلها عشان نبقى سُفراء أو وزراء مش كده؟🤔
ماتيجوا نشوف الكلام دة صح فعلا ولا لا ؟
◾خرجين سياسة واقتصاد بيكونوا دارسين كل حاجه عن السياسة والاقتصاد والإحصاء يلا نشوف بالتفصيل🤓
"كلية سياسة واقتصاد"
 ممكن تدخلها من ادبي او علمي علوم او رياضه
◾في مصر موجوده في جامعات مختلفة في مصر زي  القاهرة واسكندرية وبني سويف والسويس اقدمهم طبعا هي القاهرة اول دفعه اتخرجت من كليه سياسة واقتصاد جامعة القاهرة كانت سنة ٦٣
◾نبدأ كده الاول بجامعه القاهرة :🏛
بتختار من قبل ما تدخل الكلية شعبة من تلت شعب 《عربي او انجليزي اوفرنساوي》ولو اختارت شعبه معينه فمعني كده انك هتدرس كل مواد الكليه بلغه الشعبه ديه
- ولو اخترت شعبة فرنساوي بيكون ليك امكانية انك تاخد باكلوريوس مزدوج من جامعه القاهرة وجامعة بانتيون سوريون بفرنسا 《بمصروفات 》💸
- وشعبة انجليزي بتعمتد على درجتك في الانجليزي في ثانويه عامه ده غير انك لازم تعمل امتحان قبل ما تدخل الشعبة 《بمصروفات》💸
◾والكلية في سنة اولي بتبقى من غير تخصص ولا حاجه  
- اما في تانيه بيكون في 3 اقسام رئيسية تختار واحد فيهم يااما سياسة او اقتصاد او احصاء وبتختار ال انت حابه منهم يعني مش بتدخل في حاجه منهم لا عشان التقدير في اولي ولا عشان الشكل ولا اللبس ولا اي حاجه خالص وده بيكون تخصصك ال بيتكتبلك في شهاده تخرجك 📄
◾ عندك في سنة تالته بقى بيكون فيها 5 اقسام فرعية بتختار واحد منهم مع التخصص الرئيسي بتاعك《إحصاء 》 وهما 《اداره - حاسب - سياسه - اقتصاد - احصاء 》
- يعني ال متخصص من سنة تانيه اقتصاد بياخد في سنه تالته تخصص فرعي اداره او حاسب او اقتصاد او احصاء أي واحد فيهم زي ما يحب يعني
◾وبشكل عام فانت هتدرس 5 مواد بس في الترم وبيكونوا مواد منهية يعني لو مخنوق من مادة ولا مش حاببها هتخلصها وترتاح في نهايه الترم ومش هتاخدها تاني
في سنة اولي زي ماقولنا هتدرس مواد في كل الجوانب ومداخل لكل علم عشان تساعدك تختار التخصص في سنه تانية  ✍
◾وعموما الكليه بتدرس فيها مواد زي قانون ومحاسبه ودراسات جدوي وتاريخ فكر سياسي واقتصادى وبتتعمق فى مواد السياسه والاقتصاد والاحصاء والادارة
◾جامعة بني سويف واسكندرية والسويس هي نفس الكلام واسلوب الدراسه والتخصص زي القاهرة بفرق واحد بس هو وحود شعبتي عربي وإنجليزي بس
◾واسكندرية بقى فيها حاجة حلوة هي اهتمام فعلا انهم يوصلوا بيها لمستوي القاهره بس في المقابل بيقي فيه مشاكل احيانا في هيئه التدريس عشان مفيش دكاتره كتير متخرجين من الكليه فبيجي اوقات دكاتره متخصصين في المواد الي بتتاخد من كليات تانيه زي تجاره وحقوق مثلا او دكاتره من سياسه واقتصاد في القاهره واوقات لما بيقي عندك مواد اختياريه مش بيخليك تختار وبتنزل ماده اجباري عشان مش موجود دكاتره يقدروا يغطوا كل المواد
وبالمناسبه يعني سياسه واقتصاد اسكندريه هيا ككليه جديده بس اقتصاد وسياسه كانوا اقسام في كليه تجاره وليهم خرجينها ودكاترتهم وهما دول الي الكليه بتستعين بيهم دلوقتي في التدريس 👩‍🏫👨‍🏫
◾بالنسبة بقى لكل قسم ودراسته ومجالات شغله وركز اوي في حكايه الشغل ديه عشان على حسب القسم الي بتدخله بتحدد بعد كده هيبقي كاريرك وطبيعة شغلك إيه  
◾نتكلم اول حاجه في قسم اقتصاد مثلا :💲
اكتر قسم ليه شعبية وبيدخله طلبة كتير بالرغم انه صعب شويه بس دراسته بتبقي عملية اكتر منها نظريه وفرص شغله كتير وواسعه مقارنة بغيره من الأقسام  واقتصاد كشعبة فيها نسبة فهم وفيها حفظ برده ورسومات ومنحنيات ومسائل مش زي اقتصاد ثانوي أكيد
- بالنسبة للشغل فممكن تشتغل في البنوك والبورصة والوزارات زي وزارة التجارة او وزارة المالية والتخطيط والصناعة او ممكن شركات استثمار او شركات متعدده الجنسيه او مراكز البحوث والصحافه والاعلام و في شركات البترول
◾اما بقى قسم سياسة :💼
فهو تاني قسم ليه شعبية ودراسته بتبقي نظري اكتر من العملي والمواد بتاعته دسمه شويه وببتعمق اكتر في نظريات وافكار سياسيه سواء القديمة اوالجديده
- وسياسة كشعبة أكيد فيها حفظ كتير لكن فيها متسع تكتب بفهمك ورأيك، مش بتصم الكلام زي نا هو وبيطلب منك في معظم الاوقات ابحاث في اغلب المواد الي بتاخدها
- وبالنسبة للشغل فعندك مراكز البحوث سواء الخاصة او ال بتبقي تبع الدولة او وزارة الخارجية طبعا والسلك الدبلوماسي زي ما هو معروف و السفارات أو أي مؤسسة سياسيه زي البرلمان أو المؤسسات التشريعيه أو التنفيذية ووسائل الإعلام والبرامج السياسية
◾قسم إحصاء :📉📈
 مش موجود غير في القاهره بس هو تقريبا اصعب قسم وعشان كده عدد الناس فيه بتبقي قليله بس ألطف حاجه فيه ان دراسته اغلبها عملية والنظري بيقي بسيط ولو انت اجتهدت فيه نسب التعين بتبقي اكبر عشان مفيهوش ناس كتير وبالنسبه للشغل فمفيش شركة كبيرة مش هتلاقي فيها خريج قسم احصاء
◾ والكلية عموما مش محتاجه كورسات في المواد متعتبرش صعبة بس محتاجة جهد فردي، وانك تشتغل على نفسك من حيث الثفافة، متابعة أخبار، كورسات أونلاين قراية  كتب، مقالات، مهارات تحليل ونقد وهكذا✅
◾الكلية لوحدها مش هتديك ولا هترفعك..لازم تشتغل على نفسك.. لأن اللي بتدرسه لوحده سهل يتنسى باعتباره نظري زائد إنه أكيد مش كفاية لو عايز تتميز
◾والكليه بشكل عام فيها جانب شغل عملي جنب النظري ال بتدرسه زي الأبحاث وكده وده كتير بس ممتع وبيديك مساحة تشتغل بجهدك وبنفسك كمان وده الجانب العملي 🔎
◾ وبالنسبه للناس الي كانت عايزه تدخل سياسه واقتصاد وملحقتش مجموعها او لو حد حابب المجال بس في نفس الوقت عايز يدخل كليه تانيه فانت عندك الدراسات الحرة وانك تشتغل على نفسك لوحدك وبالذات في كليه زي سياسه واقتصاد الموضوع هيبقي سهل لان الكليه مش عمليه اوي ومش محتاجه تطبيق كل الموضوع إنها محتاجة جهدك وشغفك وكتير من اللي بيقدموا ف الخارجية مش بيكونوا خريجين من الكلية أصلا فبيقي عندك مثلا دبلومات في كلية سياسة واقتصاد🏛
◾او عندك ممكن تلاقي قسم اقتصاد في بعض الجامعات في كلية تجارة  وعندك التعليم الحر مع نفسك زي الكتب وموجودة ع النت كتير، والوثائقيات، والكورسات على موقع كورسيرا مثلا، واللغات طبعا ده غير الstudent activists ونماذج المحاكاه ال بتبقي ماليه الكليات وال لو اشتركت فيها هتقدر تعوض دراسه الكليه وهيدوك خبره وعلم 😀
◾وبالنسبه للتوزيع الجغرافي فمينفعش انك تحول او تدخل فرع للكليه غير الي متحددلك يعني مثلا لو انت من كفر الشيخ وتوزيعك الجغرافي جه في جامعه اسكندريه وانت عايز تدخل جامعه القاهره فمينفعش تحول سواء من اول سنه او حتى بعد ما تقضي سنه او اتنين في الكلية 😣
◾ وحكايه ان دايما شغل سياسه واقتصاد بيحتاج واسطه  فخلينا في النقطه ديه بالذات نقول ان سواء سياسه واقتصاد او غيرها الموضوع مش هيفرق حاجه الواسطه ممكن تكون في كل مكان واي مجال واديك شفت مجال الشغل في سياسه واقتصاد مفتوح وواسع مش معتمد على السلك الدبلوماسي بس ولا وزاره الخارجية بس عندك اكتر من مكان وال عمرهم ما هيفكروا يرفضوا واحد مثقف ومطلع ومعاه اكتر من لغه واشتغل علي نفسه جدا
◾عموما الشغل ده رزق  وسعي منك  اعمل ال عليك وربنا مبيخذلش 👌
=======================
#كلية_ألسن
- طبعا كلنا عارفين جوجل ترانزليشن👀
- بنثق فيه؟
- لا😂
الكليه ال بتحل محل جوجل ترانزيليشن وال كان اسمها كلية
اللغات والترجمة وبعد كده بقت 《الألسن》
الكلية موجودة في كذا جامعة في مصر هما عين شمس والمنيا وكفر الشيخ وأسوان وسوهاج وبني سويف واسماعيلية و الاقصر《جنوب الوادي》 و من الخطط إنها تفتح في اسكندرية بس امتى تحديدا ؟
- مفيش خبر أكيد
الكلية بتقبل من أدبي وعلوم علمي ورياضة....  
الكلية دي هدفها الاساسي هو الترجمة يعني مش زي آداب .. مش مجرد بتدرس لغة بتعمق وخلاص .. يعني الجزء العملي فيها اكتر ومناهجها متطورة اكتر و متماشية مع متطلبات السوق في مجال اللغة .. هتعجبك جدا يعني ..
- الكلية اربع سنين وبعد الأربع سنين بتاخد ليسانس الألسن
◾نظامها إيه؟
- بعد ما بتدخل الكلية بيبقى في حاجة إسمها تنسيق داخلي ودي بتختلف من جامعة لجامعة ومن سنة للتانية فمنقدرش نحددها
◾إيه هو التنسيق الداخلي؟
- هو النظام ال بيحدد نسبة القبول في كل قسم من أقسام الكلية و بيختلف من سنة للتانية ومن جامعة للتانية مفيش مقدار ثابت فيه
◾هنتكلم بالتفصيل شوية عن ألسن عين شمس باعتبارها أكتر كلية فيها أقسام
◾اقسامها  ايه بقي..
بص يا سيدي ..عندك..
◾اول قسم قسم عربي وده بيتقسم لجزئين
جزء للعرب اللي اصلا بيتكلموا عربي
وجزء للأجانب اللي لسه بيتعلموا عربي وبيدرسوا ازاي يتقنوا اللغه ومتبقاش مكسره عندهم
◾تاني قسم وهو انجليزي ..غني عن التعريف بس يلا مش مشكله..  ده هتدرس فيه اكيد انجليزي .. اه سبحان الله يعني مش محتاجة اهو ..
◾بعد كده قسم فرنساوي .. نفس الكلام يا باشا مفيش جديد
◾وعندك بعد كده قسم ايطالي والماني واسباني
◾وفيه قسم اللغات السُلافية .. ال ايه؟ استني انا هفهمك ده عباره عن شعبتين
شعبة الروسي و الشعبة التشيكية
◾تامن قسم قسم الصيني
◾وفيه كمان قسم اللغات الأفريقية ودي برضه بتتقسم لحاجتين:
اللغة السواحيلية ولغة الهوسا
◾وفيه قسم اللغات السامية اللي هي العبرية
◾وقسم اللغات الشرقية الإسلامية الي هو فارسي وتركي
◾واخر قسمين قسم الياباني .
◾وقسم الكوري .
- والاقسام ديه كلها هتلاقيها في السن عين شمس أما باقي المحافظات فبتختلف في عدد الأقسام وأنواعهم
◾والاقسام دي كلها في منها الصعب والسهل ..وال اكيد ان الصعب عند حد سهل عند غيره .. فالموضوع نسبي جدا .. وبيختلف من قدرات شخص للتاني .. فما علينا من حكاية سهل وصعب ديه وخلينا نقول ان الاغلب والمتفق عليه ان قسم الكورى واليابانى هما الاحسن كمنهج تعليمي وكنظام ومبيخلوش حد مصري يدخل في نظام القسمين دول.. وهما بردو اعلى اقسام من ناحيه التنسيق الداخلي..
◾وبعدهم هتلاقي قسم انجليزي وروسي ودول اقسام حلوة برده .. وصيني هتلاقي معاك في الجامعه طلبه صينين فهتمارس اللغه معاهم وتحس كأنك في الصين .. فديه ميزه حلوة في القسم ده وتتضاف لصالحه.. وممكن يعني قسم انجليزي هو الي تلاقي مثلا الطلبة بتعوه بيتعبوا فيه شويه
◾الكلية بتبقي عامله تنسيق تاني داخلي عشان على اساسه تحدد الناس الي هيدخلوا كل قسم .. فانت بتكتب رغباتك وانت عايزه تدخل قسم ايه
والكلية بتختار القسم الي يناسب مجموعك
◾طيب نيجي بقي للتنسيق الداخلي بالتفصيل .. وايه الشروط عشان تتقبل في اي قسم ..
وخلينا نتفق ان الشروط الي هنقولها ديه بتتغير من سنة للتانية يعني ممكن تزيد او تقل درجه..
وعموما وقبل ما تقدم في الكلية هتلاقي الكلية بتعلن عن شروط كل قسم
◾فنبدأ بقسم فرنساوي وبيقبل ال كان بياخد فرنساوي من ابتدائي يعني بمعنى أصح خريج مدارس فرنسية
◾اما قسم ايطالي فبيقبل اللي واخدينه كلغة تانية من غير اي حد أدنى، وبرضه بيقبل اللي واخدين الفرنساوي كلغة تانية بس علي الاقل يكونوا مش جايبين فيه اقل من 40 درجة《وممكن تقدم ألتماس لو عدد الطلبة في القسم والسنة مش كبير 》
◾الإسباني يا سيدي بقي بيقبل اللي واخدينه كلغة تانية من غير حد أدنى وال واخدين الفرنساوي كلغة تانية بس ميكونوش جايبن اقل من 40 وبردو《 ممكن تقدم التماس 》
◾قسم برتغالي
هو قسم لسه فاتح جديد السنة الفاتت كانت أول سنة ليه كان موجود قبل كده بس كلغة تانية بس ولكن حاليا بقى متاح كلغة أولى وتانية
◾وقسم الالماني بياخد اللي درسوه كلغة تانية بس يكونوا جايبين علي الاقل فيه 39 .. او ال درسوه كلغه اولي .. ولو كان فيه ناس كتير متقدمين للقسم ده فبيفضلوا طبعا الي واخدينه كلغه اولي وبعدين الي جاييبين اعلي درجات فيه كلغه تانيه في ثانوي
◾وقسم اللغات السلافية .. فالشعبة الروسية بتقبل بس الي كانوا واخدين الانجليزي لغة اولى وجايبين فيه على الاقل ٤٦ .. بس في المقابل شعبة لغة تشيكية مفيهاش الشرط ده
◾نيجي لقسم اللغات السامية 《ال هو العبري يعني》
◾وقسم اللغات الشرقية الإسلامية شعبة التركي وده شرط فيه ان ال يدخله يكون دارس انجليزي كلغة اولى ومش جايب فيها اقل من    ٤٢.٥..  بس الشرط ده مثلا مش هتلاقي موجود في شعبة الفارسي
◾وقسم عربي هتلاقيه لطيف جدا وملوش اي شروط عشان تدخله
◾اما قسم الكوري بقي فبيقبل اللي درسوا انجليزي كلغة أولى وجايبين 50
◾وقسم الياباني بيقبل برده اللي واخدين الانجليزي كلغة أولى وجايبين 50
◾وقسم الصيني بيقبل برده اللي دارسين انجليزي كلغة أولى ومش جايبين اقل من 49
وعندك قسم انجليزي ال لازم تكون جايب 47 علي الاقل فى الانجليزي بتاع ثانوية عامة كلغة أولى
- وعموما برده زي ما قلنا ان الدرجات والشروط بتتغير من سنة للتانية ..  فانت تابع كويس وانت بتقدم .. وروح اسأل في الكلية او اتصل بيهم وهيقولولك علي كل التفاصيل
- وعموما مش معني ان قسم بياخد اعلي من التاني .. فمعني كده انه احسن او اوحش .. هو الموضوع بيبقي على حسب درجه استيعاب القسم ومحتاجين فيه عدد اد ايه
◾خلاص كده دخلنا الكلية واستقرينا فيها .. تعالوا نتكلم بقي الدنيا ماشية إزاي فيها
- فاولا انت بتختار لغتتين للدراسة .. لغه اساسية ولغه فرعية و معاهم العربي كلغة تالتة اساسية بتاخدها طبيعي ايا كان اللغتين التانين الي هتختارهم وانت بكتب الرغبات من اول ما تدخل
◾اللغة الاولي ال هيا الاساسية الي بتختارها.. بتدرسها بعمق و الهدف انك تتخرج وانت متققنها تماما وتأهلك للهدف الرئيسي من الكلية وهو انك تكون مترجم محترف فيها..
وبتدرس مبادأها الاساسية كلغة ..و بتدرس الترجمة بكل انواعها (سياسي، اقتصادي، قانونية.. الي اخره) وبتدرس ادب ونصوص واي حاجه ليها علاقة باللغة وثقافة اللغة والبلد اللي بتتكلمها
◾وبتاخد فيها مواد زي قصة وحضارة ودراما واستماع ومحادثه وماده قواعد.. ونصوص وترجمه لعربي وترجمه من عربي
◾اللغة التانية الفرعية فبتاخد نفس المواد بتاعت اللغه الاولي بس بكمية اقل فيها وفترة اقل.. يعني بتاخد محاضره واحده فيها في الاسبوع غالبا وبتاخد فيهم شويه vocabulary و grammar
◾واللغة العربية بتدرس كل سنة فيها منهج مختلف يعني بتدرس ادب ومقال ونصوص ونحو وهكذا يعني ..
◾والاهم  بالنسبالكم من كل ده هيا مجالات الشغل 👀
فعندك ما شاء الله المجال مفتوح وعندك اكتر من حاجة .. الي اولهم طبعا وعلي رأسهم وهو مترجم في اللغة الي انت متنقنها .. سواء ترجمة فورية او تحريرية في مكاتب الترجمه ..
واكييد قدامك شركات السياحة ومجال انك تكون مرشد سياحي سواء تبع شركه او غيره ..
وعندك المدراس عموما والمدراس الانترناشونال بالذات .. وشركات الكول سنتر ..
واي شركه عموما سواء حكوميه او خاصه وايا كان مجالها ايه ..فعمر ما حاجه فيهم هتقول لأ.. لواحد معاه لغة ومتقنها كويس جدا ..
◾الشغل كتير عموما .. والسن من الكليات الي مفيهاش بطالة .. بس ال يتخرج منها يبقي ذكي ويسعى ويدور .. وميضيعش سنين الكلية كده وخلاص .. لأ يتقن كويس اوي الي بيدرسه ويبقي فاهم اللغه الي بيدرسها وممارسها ويشتغل علي نفسه وياخد كورسات ويطور من نفسه .. ويتكلم مع ناس من اهل البلد ديه.. يعني من الاخر ميبقاش معتمد بس علي الكلية وعلي الكلام الي بيدرسه .. وميبقاش بيدرس المواد عشان يدخل يجيب تقدير او يعدي .. وبعدها يبقي كده خلص من المنهج الي كان بيدرسه .. فلو ديه نيتك من الاول فاسمع مني وبلاش تحاول تدخل الكليه عشان هتضيع نفسك ..
◾وبلاش الله يكرمكم .. فكره انهي قسم احسن من التاني في الشغل والدراسة لان كله تعب .. والشغل ده رزق واجتهاد منك .. بس عموما عشان تستريح فانجليزي والماني فرصهم اكتر شويه للشغل ..
وعبري كويس للولاد عشان ممكن يشتغلوا بيه في الجيش بس شغلها مش كتير اوي للبنات  
◾اخر حاجه ممكن اقولها..  الكلية دراستها ممتعة جداً ل ال بيحب اللغات ودايس فيها .. والكلية مش صعبة وادبية تماما بس مش كلها حفظ بتعتمد كمان علي الفهم والحضور الكتير عشان اعمال السنة .. يعني مش معتمده علي الصم وبس ..
ولو مش بتحب المجال الادبي و الثقافي فهي مش بتاعتك و متقلقش هيا ملهاش اي علاقة بالرياضة مثلا اوالمواد العلمية
فمن الاخر لو انت صاحب خيال وحابب تتعرف علي ثقافة جديدة بشكل متعمق فصدقني السن هي مكانك..

======================
#كلية_الإعلام
◾كلية البرستيج والإميدج😎
- هنتكلم عن كلية من أهم كليات مصر وهتعرف هي ليه مهمة لما تخلص البوست
- يلا بينا👀
◾ممكن نقول ان كليه اعلام من اكتر الكليات ال عليها إقبال شديد من الناس وده لأنك بتقدر تدخلها من ال 3 شعب أدبي 《وعلمي علوم وعلمي رياضة 》
◾بس قبل ما ندخل في تفاصيل اعلام لازم تبقى عارف إن إعلام موجوده في جامعة القاهرة وجامعة بني سويف وجامعة جنوب الوادي وجامعة السويس
يعني ليها اكتر من فرع مش فرع جامعة القاهرة بس 🏛
- إعلام القاهرة وبني سويف فيهم قسمين عربي و انجليزي
واعلام جنوب الوادي والسويس فيهم عربي بس
- أما الاقسام والتخصص في اعلام فهما واحد سواء انت اعلام عربي او انجليزي
◾ بيبقي عندك ٣ اقسام 《قسم اذاعة وتليفزيون وقسم صحافة وقسم وعلاقات عامة واعلان》 والتخصص فيهم بيبدأ من سنة تانيه ✅✅
- وعشان تدخل قسم اذاعه وتليفزيون او صحافه لازم تعمل انترفيو عشان تتقبل
بس علاقات عامة ملهوش انترفيو بتدخله عادي وعلفكرة حتى الانترفيو في إذاعة وتلفزيون أو صحافة مش بيبقى رخم زي ما ممكن يجي في دماغك 😀
◾وبالنسبة لإعلام جنوب الوادي ففيها ال3 اقسام دول بس زيادة عليهم فيه قسم اعلام الكتروني ال بتدرس فيه وسائل الاعلام بس ال موجوده من خلال النت زي الصحف الالكترونية مثلا 💻
- وبمناسبه اعلام جنوب الوادي فمقر الكليه نفسه موجود في قنا مش في الاقصر زي ما ناس كتير بتعتقد
◾من الحاجات اللطيفة جدا ال ممكن تختلف فيها إعلام عن  كليات كتير هي إنك مش بتحتاج فيها كورسات وبتفتحلك أفكار عن مجالات متعددة ومختلفة زي المونتاج والدوبلاج والفوتوشوب والجرافيكس والتصوير طبعا ولو حبيت تقوي نفسك فيهم فهتلاقي حواليك ورش وكورسات كتير هتساعدك جدا تطلع الفنان ال جواك 📽🎬
- بالرغم من الجوانب العملية دي فللاسف إعلام كلية نظرية بحتة ومحتاجة مجهود بالمناسبة 👋
◾بس مش معنى كده إنها معقدة ومش هتقدر تمشي فيها بالعكس زي ما في الوحش في الحلو والحلو في إعلام ال هيهون عليك دايما هو الجزء العملي يعني هتلاقي events كتير و assignments كتير عملي بردو هتحببك في الكلية😴
◾أول سنة بتاخد مواد عامة شوية يعني عربي وانجليزي ونبذه عن كل قسم
بعد كده من سنة تانية بتبدأ تاخد مواد اجباري كل الاقسام بتاخدها زي بعض ومواد تانية حسب القسم ال انت فيه المواد المشتركة مثلا بتبقى زي《 رأي عام واعلام ومجتمع》 والمواد التانية الي حسب القسم زي《 نشر صحفي اوالقاء وصوتيات اوادارة اعلان وتسويق》
◾إعلام ماشية بنظام الساعات المعتمدة ⏳
- بيبقي عندك 6 مواد كل ترم كل ماده ليها 3 ساعات في الاسبوع متقسمه علي محاضرتين طول الاسبوع او محاضرة واحدة بس زي الوضع في جنوب الوادي و بني سويف والسويس
وفي اعلام القاهره انت الي بتختار المواد ال بتاخدها كل الترم من وسط المواد المتاحة ليك ومع الدكتور ال تختاره  
◾اعلام من الحاجات الممتعه فيها وال اتطورت في اخر كام سنة  "التدريب"🗣
- وبالذات لو انت قسم اذاعه وتليفزيون هتلاقي بيتوفرلك استوديو متكامل وبتدرس بجد اساسيات الاخراج والتصوير والمونتاج وازاي تقف قدام الكاميرا وتعمل نشرة اخبار او برنامج من الالف للياء 📺
- وقسم صحافه بيقي تدريبهم عملي في جرنال صوت الجامعة، أو جرايد ليها إسمها ووزنها برا الجامعة كمان بيطبقوا فيها كل حاجه ليها علاقة بمجال الصحافة من نشر أخبار وكل حاجة📋✏
- وعلاقات عامه الي ممكن نقول عليه مظلوم شويه في حكايه التدريب بس بياخدوا بردو تدريبات من حيث تنظيم إيفنتات مهمة وغيرها من الأحداث ال بتتواجد إما خارج الجامعة أو داخلها📣
◾غالبية الناس الي خلاص بتقرر تدخل اعلام بتحتار في حاجه تانية اكبر وهيا انها تدخل عربي ولا انجليزي ؟🤔
- هو الموضوع بيرجع ليك انت في المقام الاول وانت حابب تدرس بأنه طريقة
- اعلام انجليزي هتطورلك لغتك اكيد وفيها كمان قسم genral ممكن تجمع فيه بين انك تدرس اكتر من تخصص سوا زي صحافة وعلاقات عامة مثلا سوا
بس في المقابل اعلام انجليزي مفيهاش تدريب ومبتتوفرش فيها الامكانيات الي بتتوفر لعربي واكيد بيبقي التعب اكتر في الاول لو دخلت انجليزي وانت متعود طول عمرك تدرس بالعربي😰
- وبالنسبة للمصاريف فاعلام انجليزي بتبقي متغيره من سنة لسنة ومن جامعة لجامعة وعربي
◾وعشان تدخل انجليزي لازم تبقى جايب درجة معينة في الانجليزي بتحددها الجامعة بس حسب السنين الفاتت فهي مش بتبقى أقل من 46 وعشان تتقبل في القسم بيتعملك امتحان عليه درجات بس بردو الموضوع مش صعب بيبقى أسهل مما في دماغك 🙏
◾من أكتر الأسئلة ال بتيجي في بال أي حد قبل ما يدخل الكلية هي فرص العمل 🤝
- الحقيقة إنه أي حد بيشتغل على نفسه وبيتعب وبيسعى لشيء وهدف معين بيقدر يحققه وبيلاقي فرصه بنفسه
- وعموما اعلام مجال الشغل فيها مفتوح ومش مرتبط بالقسم ال انت فيه او ال بتدرسه يعني ممكن تكون في قسم علاقات عامه واعلان وبتشتغل صحفي عادي وطبيعي جدا 😎
◾طيب خلاص أنا دلوقتي اتخرجت إيه المجالات ال أقدر أشتغل فيها؟
- كذا مجال حضرتك يعني صحفي ومخرج ومونتير ومصور
يعني قدامك 《جرايد وشبكات الكترونية او تليفزيون وراديو 》
- وممكن كمان تجمع بين الجزء النظري والعملي زي إنك تشتغل 《في بحوث الرأي العام مثلاً ال بتدرس اتجاهات الرأي العام لقضية معينة، او قدامك سكة الأفلام التعليمية والوثائقية
او ممكن تاخد مجال الاعلانات والماركتينج او تشتغل في جزء العلاقات العامة او قسم إدارة الأزمات لاي شركة كبيرة 》📷🎥
◾من اكتر الاسئلة ال اتسئلت عن إعلام كانت التنسيق والحقيقة إن التنسيق مش ثابت أبدا بس المعروف فيه دايما إن إعلام القاهرة بتبقى أعلى حاجة وحسب تنسيق السنة الفاتت فهي كانت في range يعني 96% وشوية كسور والحد الأدنى كان 95% ده لشعبتين هما أدبي وعلوم
أما رياضة فبيبق  أقل من كده يعني تقريبا 85% كحد أدنى وزي ما قولنا التنسيق متغير من سنة لسنة 👌
◾في النهاية أكتر حاجة بتميز إعلام مش إنها كلية سهل تتخرج منها بتقدير، ولا إن مجال شغلها واسع وتقدر تنجح فيه لو نميت مهاراتك ، الأهم من كل ده إن الإعلام أمانة ومسئولية عشان هو من المجالات القليلة جداً ال بتأثر على عقل الإنسان ومشاعره وسلوكه وبتأثر علينا كلنا بدرجات مختلفة فلازم تتعامل معاه على إنه رسالة وأمانة قبل ما تبصله إنه مجرد شغل كويس بيديك فلوس ومركز اجتماعي لأن في النهاية كل ده هيخلص ومش هيعيش غير العلم النافع والأثر الطيب ال بتسيبه وراك 😀
◾اقعد مع نفسك وفكر كويس وأحسبها شوف المميزات والعيوب ولو قررت خلاص إنك تدخل إعلام فأحنا بنتمنالك التوفيق والنجاح دايما 🌸
《متنساناش بقى لما تتشهر وال 💸 هي ال تجري وراك 》
==================
#كلية_الآثار
نجيبة  متولى الخولى طلعت الأولى على الثانوية العامة وجابت 101% بس 😃 وبعدين قررت تدخل كلية آثار .. لكن ليه ؟!
اصلها مكنتش تعرف حاجه عن الكليات وكانت داخلاها لمجرد ان مجموعها جايبها وخلاص
ودي اول نصيحة هنقولها ليك متدخلش اي كلية مجموعك جابها او "استخصار وخلاص" واعرف كل المعلومات عن كل الكليات وحدد
احنا دلوقت مش هنبقي زي نجيبة وهنعرف شوية عن الكلية علشان لما تيجى تدخلها تكون عارف انت داخلها ليه 😉
ورقة وقلم ومعايا يا شوية طلبة جامعيين🧘
📌الكلية بتقبل علمي علوم ورياضة وأدبى لكن كل شعبة بيكون ليها حد أدنى مختلف عن التانيه وموجودة في جامعة القاهرة، جامعة دمياط، جامعة الفيوم، جامعة جنوب الوادى و أسوان
📌بالنسبة لطبيعة الدراسة في الكلية فهي مختلفة شوية عن الكليات التانية ولذيذة بشكل عام للى حابب المجال
جنب المواد اللى بتاخدها بيكون عندك أكتر من رحلة علمية وميدانية.. أيوووة الفسحة عندك مذاكرة مع العلم أن فيه بعض الدكاترة بيسمحوا بقليل من الترفيه بس ف الأساس بتبقى رحلات علميه وبيبقى لازم عليك تحضر الرحلات وليها غياب
فكرة ان الكلية مذاكرتها قليلة ورحلاتها كتيرة يعني لعب وتنطيط دى افتكاسة لازم تشيلها من دماغك ولازم تذاكر كويس من اول سنة وتشتغل على نفسك كتير وتنزل تشوف بنفسك وتاخد خبرة فل؟
إن شاء الله فل.🤝
أول سنة بتبقى عامة مفيهاش تخصص في أغلب الجامعات ما عدا جامعه جنوب الوادي اللي التخصص فيها بيبدأ من أولى
في الترم الأول في سنة أولى بتنزل 6 زيارات بتروح فيها آثار اسلامية وقبطية زى منطقة الصليبة ، ومنطقة الأزهر والسلطان حسن وهكذا
اما الترم التانى بتنزل المتحف المصرى والأهرامات و سقارة والزيارات بتبقى إجباري لكل الطلبة.
بالنسبة لتانى سنة ف بتبدأ تتخصص في قسم من ال4 دول
🔹 قسم الآثار المصرية.
🔹 قسم الآثار الاسلامية.
🔹 قسم يونانى.
🔹 قسم ترميم الآثار.
واليكم التفاصيل عن كل قسم وطبيعة الدراسة ✅
🔹قسم الآثار المصرية بيركزوا فيه على درجة الانجلش ولازم تكون جايب أعلى الدرجات يعني السنة اللى فاتت كان واخده أكتر من 47.5
وبتنزل رحلات كتير برة القاهرة وبتكون مدعمة من الكلية الي حد  كبير فى نفس الوقت يعتبر أصعب قسم فى الكلية وبتدرس فيه حضارة مصرية قديمة
بتروح خلال ال3 سنين المنيا ، دهشور، الأقصر وأسوان ، والواحات البحرية ، واسكندرية ، وميت رهينة وبيبقى معاك في الرحلات دكاترة من الكلية ومبتكونش اجبارى انك تروحها وملهاش غياب لكن حضورك ليها بيفيدك بشكل كبير في الدراسة.
🔹قسم الآثار الإسلامية ودا يعتبر أسهل قسم فى الكلية لكن فيه تفاصيل كتيرة وحفظ كتير نسبيا وبالنسبة للرحلات ف بتنزل اسكندرية، رشيد، الأقصر، أسوان ونفس الكلام مفيش غياب على الحضور
هي كدا كلية الآثار مذاكرتها كتيرة وفسحها كتيرة برضو 😂
🔹القسم اليوناني شرطه زي قسم الآثار المصرية وهو انك تجيب درجات عالية في الانجلش بس اقل منه درجه أو اتنين والدرجه دى بتختلف من سنة لسنة كالعادة حسب متوسط الدرجات.
وبتدرس فيه لغات زى اللاتينى واطمن فيه رحلات بردو ومعظمها بيكون فى اسكندرية علشان الآثار الرومانية هناك.
🔹قسم ترميم الآثار فبتروح فيه اسكندرية، رشيد، الأقصر، أسوان
والقسم دا عشان تدخله لازم تعمل اختبار قدرات والاختبار ده بيتعمل في التيرم التاني في سنة أولى وبتكون الأولوية للي بيتقبلوا فيه لعلمي علشان هتلاقي دراسته محتاجه تكون درست كيميا ورياضة قبل كدة
وبينقسم 3 أقسام «معماري وعضوي وغير عضوي» وكل واحد ليه اختباراته
طيب معمارى ومفهومة شوية بس ايه عضوى وغير عضوي دى ؟
عضوي دي ماده بتدرس فيها ازاى تتعامل مع الآثار المصنوعة من مواد عضوية زى الخشب وايه اللى بيأثر عليها وايه اللى ممكن يخليها تبوظ وهكذا
غير عضوى نفس الكلام لكن على مواد غير عضوية زي الفخار والطين.
بعمل ايه علشان أقدر أدخل اختبار القدرات ده ؟
علشان تعمل الإختبار بتروح تدفع رسوم لخزنة الكلية وبعدين تروح شئون الطلبة تسجل اسمك علشان الإختبار
الإختبار ده عبارة عن إيه ؟
خلينا نتفق ان اللي هنتكلم عنه ده الشكل العام للاختبار لكن فيه تفاصيل صغيرة بتختلف على حسب التخصص اللى هتدخله جوا وكمان على حسب الجامعة الي انت فيها
ببساطة الاختبار بيتكون من 3 أجزء
1-اختبار رسم بالظل والنور وده بترسم فيه نموذج لأثر معين بالظل والنور ومش شرط تبقى توب في الرسم لا خالص بيكون فيه كورسات في الكلية بتساعدك على انك تتعلم ده والفكرة كلها بس ان يكون عندك احساس بالأبعاد كويس بس مش أكتر.
2-امتحان نظرى في مادة مبادىء الترميم ودى هتبقى اوريدي درستها في التيرم الأول
3-امتحان شفوي بيعملوا القسم _حاجه شبه الانترفيو كده_ الدكتور بيعرف منها انت ليه حابب تخش القسم ده وشغفك وبيسأل فيه كام سؤال نظرى من مادة الترميم اللى قولنا عليها فوق.
ومع ده كله بيعملك اختبار طبي بيسموه اختبار "عمى ألوان" علشان يشوف هتقدر تكمل في الدراسة ولا لا
🔥ملحوظات هامة🔥
1.زيادة عن الاقسام الاربعة الأساسية فيه ف كليه اثار فرع دمياط قسمين جداد ودول لسه فاتحين لاول مره ع الجمهوريه وهما عباره عن:-
🔹 قسم اداره المتاحف ودا بتدرس فيه يعني اي متحف واي وظيفته واصل تسميته والنشاه وبتعرف يعني اي علم متاحف وظهر امتا وتطور تعريف المتحف ويعني اي دراسات متحفيه وهكذا
🔹 قسم اداره المواقع الأثرية والتراثيه ودا عباره عن انه بيعلمك ازاي تبقى مسؤول عن موقع اداري ويعني اي موقع اثري وهل كل المواقع مسجله ف الايكموس "المؤسسه المهتمه بالآثار والمتاحف" ولو مش مسجلة ازاي اسجل اصلا ان المنطقه دي اثريه ودراسات من هذا القبيل
2.الكلية ممكن تتدخلها لو انت متخرج من مدرسة ترميم او لو كنت واخد دبلومة منها زي مدرسة الترميم اللي في مدينة نصر او معهد ترميم الأثار اللي في الأقصر.
📌نيجي بقا لأخر وأهم نقطة وهي فرص العمل ..
سامعك ياللي بتضحك ضحكة من تحت لتحت وبتقول
هه هو بتاع آثار دا بيعمل ايه؟!
بص يا سيدي بداية كدا خلينا متفقين ع كام نقطة كدا
🔸انت دولة بتغني بحضارتها ٧٠٠٠ الاف سنة ومهتمه جدا بالتاريخ وفيها أهم الآثار الموجودة في العالم كله ودا كلام الدكتور زاهي حواس وزير السياحه الأسبق
🔸علم المصريات وعلم الآثار وعلوم التاريخ دي كلها مجالات كل دول العالم بتهتم بيها جدا وبتعمل منح للطلبة الدارسين للعلوم دي زي لندن وألمانيا ودا لانها علوم تقيله ومش اي حد يقدر يتعامل معاها
لو جينا لفرص العمل بقا ف عد ورايا كدا انت بيبقى ليك فرصه تشتغل:
- مفتش آثار في المتاحف والمناطق الأثرية.
- أخصائي ترميم فى المتاحف أو فى المواقع الأثرية.
- شركات المقاولات المتخصصة فى ترميم الآثار.
- مرشد سياحي ودي لازملها دبلومة إرشاد سياحى من كلية سياحة وفنادق والفترة دي عليها اقبال بشكل كبير لان أواخر السنين بدأ يبقى فيه افتتاحيات كتير لمتاحف كتيره على مستوى الجمهورية والاحتياج للمرشد بيبقى عالي.
- ممكن تحضر ماجستير وتكمل في السكة الأكاديمية.
- ولو معرفتش تسلك ف الطريق الأكاديمي ف ليك فرصه تدوس في الاتحاد الأثريين المصريين ودا بيقدم برامج للتنمية او المتاحف زي المتحف المصري واللي بيقدم برامج إرشاد وترميم ودروس في اللغة والحضارة
- او ممكن تكمل باحث وبعدها عالم ودي متوفرة جدا وليها منح جامعات برا بشكل كبير زي منحة تشيبلينج من الحكومة البريطانية
ها لسه برضو بتسأل هو طالب كلية الآثار ممكن يشتغل ايه؟ 🤔
=====================
#معهد_فني_صناعي
الطريق التاني لكلية هندسة ✌
لو انت عندك إصرار انك عايز هندسة  او لو انت شايف ان ده مجالك ومينفعش تدخل حاجه تانية
لو انت بتحلم ب هندسة وشايف انها الطريق المناسب ليك أكيد الكلام ده ليك 😉
معهد فني صناعي بيقبل علمي علوم او علمي رياضة وبياخد من حوالي ٦٠% او ٦٥% فأعلى وبيقبل الثانوي الصناعي
وموجود في اماكن كتير على مستوى الجمهورية زي اسكندرية والقاهرة في جمال عبد الناصر والمطرية وشبرا وموجود في قويسنا وبنها
والأقسام بتختلف من معهد للتاني بس في الأغلب بتبقى ( حاسبات، تبريد، سيارات، كيميا...الخ)
بعد م بتتخصص في قسم من دول بتدرس مواد مختلفة عن الباقي تماما بس دا لا يمنع ان فيه مواد مشابهه كتير
لو انت خريج الثانوي العام بتدخل على قسم حاسبات مباشرة -الا لو حد عايز يحول بيكون متاح ليه التحويل عادي- بس غالبا محدش بيحول لانه افضل قسم ولو هتدخل فرع شبرا ف متاح ليك قسم واحد بس وهو كيميا
اما باقي الاقسام مخصصة ل طلبة الثانوية الصناعية
نيجي بقا لطبيعة الدراسة في المعهد
-بتدرس في المعهد مواد زي ثانوي بس جزء بسيط جدا وسهل جدا مع زيادات بسيطة سواء رياضة او فيزيا او انجليزي
-كمان بتاخد رسم هندسي وبرمجه وبتدرس مواد فيها وورد واكسل وباور بوينت يعني ممكن نعتبره كورس icdl كامل وهتمتحن فيه 😂
-كمان البرمجه اللي بتاخدها عبارة عن كورس اسمه CCNA مشهور جدا ومهم جدا لاي حد في مجال البرمجه
يعني الدراسة في المعهد معظمها كورسات الناس بتاخدها من بره بفلوس
ف لو انت بتحب الكمبيوتر ف الموضوع بالنسبة لك هيكون لعبة وهتستمتع جدا وهتحس ان دول اول سنتين تعليم ليك في حياتك وهتحس بمعنى انك تدرس الحاجه اللي بتحبها فعلا
ولو انت مش بتحب الكمبيوتر هتكون فرصة ليك تتعلم اساسيات الكمبيوتر وزيادات كتيرة كمان وفي كلا الحالتين الموضوع مش هيكون صعب اطلاقا بل سهل وممتع
المذاكرة مش كتير قد تكون ٤٠% من مذاكرتك في الثانوية العامة ونظام الدرجات عبارة عن ٦٠% اعمال سنة و٤٠% فاينال يعني لو ضمنت اعمال السنة فانت بشكل كبير بتضمن هندسة يعني لازم تركز فيها كويس و بتضمنها عن طريق انك بتاخد كورسات وتسلم شيتات وتعمل زي ما المهندسين يقلولك
دخولك ل هندسة بيعتمد علي مجموعك في سنة ٢ يعني ١ ما هي إلا سنة نقل فقط ومهم فيها تعرف الدكاتره ويعرفوك وتتعامل معاهم وتحضرلهم وتعرف نظام كل دكتور وياريت لو تسال الدفعات الأكبر منك عن نظام المعهد وطبيعة الاقسام وهكذا
نيجي بقا للتنسيق ودي اهم نقطة
ف عشان تدخل هندسه لازم تجيب مجموع ف تانيه حوالي ٩٤٪ مع العلم ان ١% = ١٦ درجة وده رقم سهل جدا تجيبه لو عملت اللي قلت عليه فوق ☝️وبيكون قدامك جميع اقسام هندسة زي اي طالب ثانوية عامة.
مش معني كده ان الدنيا هتكون لذيذة وماشية زي العسل كده 😂
اكيد فيه تحديات كتير وعوائق هتقابلكم وهتختلف من شخص لاخر خصوصا الضغوطات اللي بتتمثل ف انك مينفعش تضحي بسنتين على الفاضي ومقدمكش غير انك تدخل هندسة
اللي مش بيوفق ويجيب تقدير هندسة بيكون قدامه فرصه انه يعمل معادلة ويدخل هندسة من تاني بس ده وضعها بيكون صعب شوية ونسبة نجاحها اقل بكتير من المعهد نفسه
كمان بيكون فيه كليات تاني في التنسيق زي كلية تعليم صناعي وكلية تربية نوعية
وف الآخر جينا للسؤال الشائع بقا هل ده يستحق اني اضيع سنتين؟
لو انت قريت المقدمة هتكون مقتنع تماما ان ده يستحق انك تضحي بسنتين وصدقني مش هيضيعو
انا كواحد خلصت المعهد وف هندسة حاليا بعتبر السنتين دول افضل سنتين في حياتي من جميع الاتجاهات سواء دراسيا اني اتعلمت حاجات بحبها جدا او من ناحية الاصدقاء اتعرفت على افضل اصدقاء ليا او من الناحية الشخصية وتحمل المسؤولية وان دي بتكون اول خطوة ليك بتاخد فيها قراراتك وتتحمل فيها نتيجة افعالك وكل حاجه يعني 😁
تجربة تستحق ومغامرة ممتعة جدا والأهم من ده كله هتوصلك لحلمك ومن بعدها أثق ان مفيش حاجه هتقف قدامك لان اللي يضحي بسنتين عشان يوصل لحلمه ويكون عنده اصرار عمر ما فيه حاجه هتقدر تقف قدامه تاني💪😎
===================
#كلية_آداب
◾كلية من أهم كليات مصر لأنها شامله كل كليات مصر 😎
 - ازاي الكلام ده؟
- تعالى واحنا هنقولك ازاي🤓
  《كلية الآداب والعلوم الإنسانية 》
◾بتجمع بين حاجات كتير عندك مثلا  لغات، وبين مواد تانية ادبية زي《 تاريخ وجغرافيا 》والفن زي 《الدراما المسرح وغيرهم كتير》 باختلاف الجامعات
- وغالباً بيكون تنسيقها مش عالي، عشان كده بترضي طلبة كتير وبيحبوا دراستها🤝
◾كلية آداب للعلمي بشعبتيه، و للأدبي طبعا
◾الكلية ٤ سنين، من أول سنة بتحدد قسمك ال عايز تتخصص فيه بعد التقديم على طول وهنشرحلك بيكون ازاي، بس الأول نتكلم عن الأقسام المتاحة👌
◾ عندك أقسام لغات زي:
《 عربي، انجليزي، فرنساوي، الماني، اسباني، ايطالي، صيني، ياباني ،فارسي، عبري، تركي، أردو *الاربع اقسام ال في الآخر دول اسمهم لغات شرقية*》
◾كمان عندك أقسام زي:
《علم نفس، علم اجتماع، فلسفة، تاريخ، جغرافيا، اعلام، آثار، ارشاد، دراما ونقد مسرحي ، مكتبات ومعلومات 》
- بتختلف الأقسام من جامعة لجامعة، بس دي غالباً كل الأقسام المتاحة في اغلب جامعات مصر الحكوميه.🏛
◾بعد تنسيق الجامعات ما بيظهر وتترشح لكلية آداب وتقدم، بيكون عليك انك تكتب رغبات للأقسام ال نفسك تدخلها حسب أولوياتك. مثلاً تكتب أول رغبة آداب انجليزي، لو مجاتلكش تكون تاني رغبة فرنساوي، التالتة علم نفس وهكذا، حسب التنسيق الداخلي للكلية وحسب رغبتك🤞
◾قبل كتابة الرغبات بينزل في الكلية شروط دخول كل قسم، بمعني مثلاً ييعملوا حد أدني لكل قسم بالنسبة لدرجات ثانوية عامة اللي هو مثلاً انجليزي بيعملوا شرط القبول ان درجتك في انجليزي ثانوي تكون أعلى من  48 《وده مجرد مثال》😀
- وفيه أقسام تانية بتعتمد على مجموع درجات اللغات زي اعلام  مثلاً
- وفيه أقسام بتعتمد على المجموع الكلي في ثانوي
- وأقسام بتعتمد على المجموع الكلي بالاضافة لمجموع مواد معينة في ثانوي 《فيما يعرف بالمجموع الإعتباري》✍
◾الشروط بتختلف من قسم لقسم ومن سنة لسنة طبعا  وبعد التقديم إن شاء الله هتقدر تعرف ايه الاقسام اللي تناسبك وتختار منها.
◾طيب نتكلم عن الدراسه ذات نفسها
🚩《في أقسام اللغات》 :
بتدرس لغة، ومواد أدبية، وتاريخ، ومواد فرعية.
- نتكلم عن المواد الفرعية:
بتكون لغة جانبية من اللغات الاوروبية، لاتيني او فرنساوي او الماني بالاختيار *في بعض الجامعات* وعربي وحقوق إنسان.
- بعض المواد بيكمل معاك للآخر ومواد بتفضل معاك لحد سنة تانية بس زي اللغة الأوروبية✈
- التاريخ: على حسب لغتك بتدرس تاريخ اللغة وتاريخ الدولة بتاعتها، وحضارتها. مبيكونش جزء كبير، ومش في كل سنين الدراسة.
- المواد الأدبية: أدب، دراما، ورواية ومسرحية و مفاهيم الأدب وتاريخ الأدب《 بعض المواد دي بتفضل معاك برضو لحد الآخر》✔
- اللغة:
بتدرس فيها اللغة في حد ذاتها من حيث:
الصوتيات ☢الفوناتكس☢
واللغويات
 والترجمة
والحاجات اللي تعلّي مستوى اللغة كلغة متعارف عليها زي المقال مثلاً 📄
🚩دي كل المواد الدراسية تقريباً، أول سنة بتدرس فيها الاساسيات اللي قولنا عليها دي كلها، بعد كده في مواد بتستمر معاك ومواد بتنتهي في سنة1 أو 2 أو غيرها
🚩الدراسة في أقسام تانية زي علم نفس وفلسفة وتاريخ وجغرافيا وكل الاقسام الباقية بيكون فيهم برضو مواد فرعية زي لغة بالاضافة لمواد عامة بيدرسوها عن القسم ومواد متخصصة في القسم نفسه..
◾ من الحاجات الحلوة في الدراسة في الكلية دي انها مبتقفش على الحفظ والصم زي ما معروف عنها، بالعكس، الدراسة فيها بتكون زي معلومات عامة انت حابب تعرفها عن القسم اللي حبيت تدخله، وبيتطلب منك أبحاث ونشاطات تزوّد من ثقافتك ومعلوماتك ودرجاتك طبعا😎
◾الدراسة مش صعبة ولا سهلة هي علي حسب القسم، بس عموما هي ممتعة جداً لو انت حابب المجال وده هيهوّن عليك اوي😫
◾نظام دراسة الأقسام صعب نشرحها كلها لأنها بتختلف من جامعة للتاني بس ممكن تدخل علي موقع الجامعه اللي انت حابب تدخلها وتشوف تفاصيل القسم  ال أنت عايزه🙏
◾نيجي بقي الكلام اللي مستنيينه🤓
☢  مستقبلك وشغلك☢
- هطلع من الجامعه اقعد فالبيت؟
ان شاء الله لأ 🙏
◾نبدأ بقسم الانجليزي
يعتبر قسم اللغة الانجليزية من الأقسام ذات الأهمية الكبيره و ده لارتباطه الكبير بسوق العمل👌
 -  لو انت ناوي تدخله تعرف انه لازم يكون عن حُب!  
 اصل انت هتدرس تاريخ اللغه نفسها ف انت فعلا لو داخله وانت حابه وشاطر فيه تقدر تضمن مستقبل باهر 🤞
 ولو دخلت وحبيته بعدين مش مشكله تقدر تضمن بردو ان شاء الله لو اجتهدت علي نفسك حبتين  .
- لازم تشتغل على نفسك وتحسن نطقك والجرامر بتاعك عشان تضمن شغل كويس فيما بعد و الكورسيز كتير وفي كل مكان وهتلاقي كتير على مواقع زي كورسيرا ويوديمي💻
◾الشغل :
- خريج آداب انجليزى ممكن يشتغل 《مترجم》  
- ممكن مترجم ف مؤسسات صحفيه واعلاميه ودي مفيش اكتر منها ف مصر والشركات ال تعاملها مع اجانب هتحتاجك
- كمان التدريس ممكن تعمل دبلومة تربوي عشان تبقى معادل لخريج كلية تربية👨‍🏫👩‍🏫
◾ السفر لبلد اجنبيه هيبقي سهل عشان معاك اللغه وتقدر تلاقي منحه كويسه ان شاء الله لو دورت كويس 🛩
🚩 الدراسه في قسم انجليزي لغويه وادبيه
-  يعني ايه؟
-  اللغوية يعني الاهتمام  بالقواعد و صوتيات
- الأدبية  بيهتم بكل جوانب الأدب من شعر و قصة و دراما و أدب عالمي
《 عشان كده بنقولك ادخله احسن عن حُب》
🚩نيجي لباقي أقسام اللغات ودي ليها أكتر من مجال:
- تقدر بعد التخرج تشتغل مدرس في أي مادة فيهم حسب قسمك لو عايز تدرِّس
- التعيين في أغلب الأحيان بيحتاج دبلومة تربوي بعد الكلية لو حكومي، لكن لو خاص مش شرط.
- ممكن تتشغل في الترجمة، أو الترجمة الصحفية، أو الارشاد بعد دبلومة.
- تقدر تحترف تدريس اللغات للخريجين في مراكز الكورسات وده شغل كويس جداً 💸💸
◾قسم علم النفس:
- تقدر تختار مجال شغلك كلينيكال وتشتغل في مستشفيات ومراكز 《للاسف قسم كلينيكال مش موجود غير في جامعتين بس وبمصروفات》
- تقدر تكمل دراستك في تخصص انت حابه بره مصر، وممكن تبدأ تقرأ وتسأل فين من اول سنة كلية، عشان علم النفس عموماً تخصصاته وشغله بره أكتر وأحسن ومتقدر كتير عن مصر، وساعتها تقدر تكون معالج نفسي هناك برضو بس مجالك أكتر تخصصاً عن هنا. لأنك هتتخصص في مجال واحد من مجالات علم النفس المتعددة💡
- تقدر تكمل دراسة زي طِب وتشتغل على نفسك وتجتهد وتعمل برّه مصر أو جواها master في counseling psychology، وتكون محلل واستشاري نفسي
- مجالات علم النفس محتاجة صبر عشان توصل، ومحتاجة إنك تجتهد من أول سنة في الكلية ومتكتفيش بدراستك في الكلية، تحاول تقرأ معلومات عامة وتزوّد من معرفتك بالمجال ده🤓
- قسم زي آثار بيشتغل في الارشاد وشغل سياحة  
- قسم جغرافيا بقي أ كتر قسم في اداب بيقي فيه عملي شويه
🚩الدراسة فيه بتبقي علي مجموعات من المواد اللي بتخدم تخصص علم الجغرافيا 🌏 زي :
- مجموعة الجغرافيا الطبيعية
- مجموعة الجغرافيا البشرية و المواد البيئية  
- مجموعة المواد التطبيقية والخرايط والمساحة .
🚩ومجالات الشغل كويسه وبتكون زي :
- ادارت التخطيط في المحافظات
- شركات التعدين والمقاولات العامة
- هيئات الموارد المائية والبيئية
- مصلحة الارصاد الجوية
- هيئات النقل والمواصلات
- الجهاز المركزي للتعبئة العامة والاحصا
- والتدريس طبعا
◾بالنسبه لقسم اعلام ف هو مش محتاج شرح حاجة غني عن التعريف😎 :
- في آداب نقدر نقول كويس وخصوصا اداب عين شمس وفي كلام انه هيبقي قسم لوحده زي اعلام القاهره كده
- بتتخصص ف تالت سنه صحافه او اذاعه وتلفزيون او علاقات عامه مفيش فرق كبير بين قسم اعلام  وإعلام ككلية غير إن جزء النظري شوية في آداب كتير وبيحاولوا يحسنوا مستواه ويقدر خريجه ياخد كورسات ويجتهد ويشتغل في الصحافة والاعلام عموماً🙏
◾ممكن خريج أي قسم يشتغل في أي مجال بعد الكلية حتى لو بره القسم والتخصص ال درس فيه، لكن دراسته مثلاً لو لغة، هتفيده في الشغل وفرص السفر اكتر بكتير جداً من لما يكون درس في قسم تاني
🚩وحط قدامك دايما انك لو مشتغلتش على نفسك كويس في سنين الكلية واخدت كورسات وتطورت من نفسك في مجالك هتندم كتير بعد ما تتخرج وتلاقي نفسك مطلعتش غير بشويه كلام نظري 🙆‍♂️🙆‍♀️
◾باقي أقسام الكلية كتيرة، وكذلك مجالات شغلها احنا حصرنا بس المجالات المنتشرة والمعروفة ما بيننا، لكن ال يدوّر هيلاقي أكتر من كده
 
=====================
#كلية_دار_العلوم
طبعا اول ما بنسمع دار علوم بيحصل لبس بينها وبين كلية العلوم ودراستها عبارة عن فيزياء وكيمياء وهكذا 😂
وطبعا دا خطأ جدا علوم حاجه ودار علوم حاجه تانيه خالص ودا اللي هنعرفه في البوست دا بإذن الله تابع معانا
الكلية بتقبل ال ٣ شعب علمي علوم ورياضه وأدبي ومجموعها كل سنة بتبقى متفاوته عن اللي قبلها لكن المتوسط تقريباً في العلمي من ٧٨٪ وانتساب من ٦٩٪ وفي الادبي ٧٧٪ و الانتساب ٧٥٪
الكلية دراستها ٤ سنين وبتتخرج منها معاك ليسانس في اللغة العربية وأدابها
وموجوده في أربع جامعات فقط
«جامعه القاهره _ جامعه الفيوم _ جامعه المنيا _ جامعه أسوان»
طيب ايه طبيعة الدراسة في الكلية دي؟!
اول حاجه الكلية مفيهاش تخصصات وبتدرس كل حاجه هنذكرها بعد شوية ع الأربع سنين لوكشه كدا😂💜
١- قسم النحو والصرف والعروض
٢- قسم الدراسات الأدبية زي الشعر والادب والنثريات وبتدرس فيه عصور الأدب العربي من الجاهلي للحديث
٣- قسم البلاغة والنقد الأدبي والأدب المقارن وبتدرس علم البيان وعلم البديع وكل الكلام دا
٤- قسم علم اللغة والدراسات السامية زي اللغة العبرية والشرقية زي اللغة الفارسية وبيبقى فيه مواد أساسية زي الانجلش
٥- قسم الشريعة الإسلامية وبتدرس فيه الفقة وعلم المواريث والتفسير والحديث وسامعك ياللي كنت بتغني وبتقول ياريتني كنت أزهر عشان ادرس المواد الشرعية واهي فرصه وجتلك لحد عندك 😉
٦- قسم الفلسفة (العقيدة ) الإسلامية وبتدرس فيه علم الكلام والمنطق والتصوف الإسلامي
٧- قسم التاريخ الإسلامي والحضارة الإسلامية ابتداءا من النبي صلى الله عليه وسلم إلى سقوط الدولة الإسلامية وما بينهما
طب اي هيا مجالات الشغل بقى ؟!😌
١- صحافة وإذاعة
٢- تصحيح وتدقيق لغوي
٣- تصحيح وتحقيق كتب ومخططات
٤- التدريس
٥- الترجمة (عبري وفارسي )
٦- وزارة الثقافة
٧- العمل الحر أو الفري لانسر ودا ممكن ندخل فيه التدقيق اللغوي او ممكن تدرس اللغة العربية لغير النطاقين بيها
هتقولي انا سمعت كلمه التدريس كتير طيب إي اللي يفرقني كطالب دار العلوم عن طالب كلية آداب أو تربية ؟!
طالب دار العلوم مش بيدرس قسم واحد وبتخصص فيه لأ هو بيدرس كل اللي ذكرتهم فوق دول بجانب التعمق الشديد في اللغة العربية واللي بيفتقره طالب التربية أو الآداب ف بالتالي الأولوية للتدريس بتبقى لخريجي دار علوم.
اخيرا
اكيد كلنا سمعنا إن الكلية صعبة وكله بيسقط فيها ودا مظبوط ومش مظبوط
الكلية مش سهلة ودي تخضك؟
ابدا
اي كلية في الدنيا صعبة وكل مجال وليه صعوبته ومحتاجه شخص بيذاكر وبيحضر المحاضرات دايما ومجتهد وحابب المجال ف لو انت مش حابب المجال وداخلها بس كدا ف للأسف هتبقى صعبه عليك أما لو انت داخلها عن اقتناع ونتمنى ذلك هيبقى الموضوع سهل وبسيط وهتمشي فيها كويس.
====================
#كلية_تربية
السلام عليكم
عارفين الكلية اللي ناويين نتكلم عنها النهارده ممكن نسميها ايه .. 👀 ممكن نسميها كلية التعويض عن تحقيق الاحلام ♥️
ايه الكلام الكبير دا .. تعالوا نتكلم أبسط من كدة عشان نفهم الموضوع.
كلامنا النهاردة عن كلية تربية .. طب ليه بقى بنقول انها كلية التعويض عن أحلامنا؟ 🤔
◾مثلا لو حد عاوز يدخل هندسة لانه بيحب الرياضة والشغل مع الأرقام والحسابات بس للأسف مجموعه مجبش الكلية فهو ممكن يدخل كلية تربية قسم عام رياضة📊
◾ولو حد كان علمي علوم وللأسف ما لحقش الكلية اللي نفسه فيها فهو هيدخل تربية بيولوجي أو كميا وهيتعامل بردو مع المعادلات والحاجات اللي متعود عليها👌
ودا طبعًا غير اللي نفسه يبقي مدرس اد الدنيا وبيحب مجال التدريس فاكيد دة مكانك الطبيعي. 😌
◾مبدأيا الكلية أربع سنين .. ممكن تدخلها من علمي أو أدبي .. وبالنسبة للتنسيق فتربية من أدبي بتبقي رابع كلية ليك بعد سياسة واقتصاد وإعلام والحاجات دي .. وبتبقى بعد كليات الطب والعلوم، لو كنت علمي علوم أو لو كنت علمي رياضة فهي بتكون بعد هندسة وعلوم .. وعموما كليه تربية تعتبر أول كلية بعد كليات المجموعة الطبية والهندسية
◾والمدهش إن فيه ناس كتييير بيحولوا من كلية ألسن لتربية .. لو ملحقوش أو معرفوش يدخلوا الأقسام اللي هما عاوزينها .. يعني لو ملحقتش ألسن انجليزي أو فرنساوي .. عشان شروطهم مكنتش ماشية مع مجموعك في مواد اللغات .. فممكن تدخل تربية عام انجليزي أو فرنساوي👩‍🏫👨‍🏫
تعالوا نتكلم أكتر عن الكلية ونوضح عنها أكتر 🏃🏼‍♂️
كلية تربية بشكل عام بتتكون من 3 أقسام رئيسية اللي هما:
تربية عام
وتربية أساسي
🔶️وبتخصص في أي قسم منهم من سنة أولى
🚩الفرق بين عام وأساسي إنك لما تتخرج ان شاء الله لو كنت تربية عام فانت هتشتغل مدرس إعدادي وثانوي، لكن لو كنت تربية أساسي فانت هتكون مدرس ابتدائي أو إعدادي.
◾نتكلم عن تربية عام شوية 😌
زي ماقولنا إنك بتشتغل مدرس إعدادي وثانوي
والقسم دة أعلى قسم في الكلية من ناحية المجموع .. بمعني إنه بياخد اللي الناس اللي جايبة مجاميع أعلى في الثانوية العامة
🔶️والقسم بيتكون من كذا شعبة حسب انت عاوز تتخصص في ايه بيبقى فيه أقسام ليها تنسيق داخلي أو شروط بمعنى أصح عشان تقدر تدخلها 👌
◾والأقسام عموما بتبقي زي قسم لغة عربية .. قسم انجليزي .. وقسم رياضة .. وفرنساوي .. وقسم فلسفة .. وقسم جغرفيا .. وقسم الماني .. وقسم علم نفس .. قسم بيولوجي .. قسم كميا .. قسم فيزيا .. وقسم تاريخ وعيش بقى😀
◾وانت بتختار انت حابب تكون مدرس ايه أو هتدخل أنهي قسم منهم .. خلي بالك إن دول كلهم ليهم تنسيق داخلي يعني على حسب مجموعك في المادة بتاعتها .. يعني مثلا لو عاوز تدخل قسم لغة عربية لازم تكون جايب درجة حلوة في العربي بتاع ثانوية عامة وهكذا. 🤓
⚠️بس فيه ملحوظة مهمة لو انت كنت علمي علوم فانت قدامك بس أقسام أحياء وكميا وفيزيا .. لو كنت علمي رياضة فانت قدامك قسم رياضة بس
- أما بقى لو كنت أدبي فعيش بقى في أي قسم من بتوع أدبي.🌍
◾نيجي لقسم أساسي ودا القسم التاني بعد قسم عام من ناحية مجموعك في الثانوي برده
وبتتطلع منه عشان تبقي مدرس ابتدائي وبعد ماتترقي بتبقى مدرس إعدادي
- أقسام أساسي بتبقي زي لغة عربية بردو ورياضة و مواد اجتماعية وعلوم
- وخلي بالك بردو وانت بتختار القسم اللي انت عاوزه من مجموعك في المادة الخاصة بيه
وهنا هتلاقي نفس الملحوظة👆 .. لو كنت علمي علوم فانت ممكن تدخل تربية أساسي علوم .. ولو كنت علمي رياضة فانت ليك قسم رياضة وهكذا
◾من ناحية الشغل العملي فبيبقى في المدارس .. و بيكون من سنة 3 و4 وبيبقي ليك يوم في الأسبوع محدد ليك .. ومتحدد ليك مدرسة وفصل .. وتعيش بقي مع الواقع والطلبة
⚠️وخلي بالك انك في سنة تالتة بتنزل مدارس إعدادي ورابعة بتنزل مدارس ثانوي لو انت عام
أما لو أساسي بتنزل في تالتة مدارس ابتدائي ورابعة مدارس إعدادي.
◾فيه حاجة لطيفة هتلاقيها في تربية .. وهي إن فيه ناس بتتخرج بشهادة ليسانس وفيه ناس بتتخرج بشهادة بكالريوس 👩‍🎓👨‍🎓
- بمعنى انه اللي بيتخرج من الأقسام الأدبي في الكلية وبيكون دارس مواد نظرية فبيبقى معاه ليسانس.. والي بيقي داخل قسم علمي والمواد بتاعته نظري شوية .. فالشهادة بتاعته بتبقي بكالريوس العلوم والتربية. 🙏
◾بالنسبة بقى يا أستاذنا للشغل .. فهو متوفر جدا بس لازم تتعب في الأول .. لكن هترتاح بعدين
وممكن تشتغل مدرس في مدرسة خاصة مثلا .. وعندك الدروس الخصوصية .. أو لو مش حابب لا ده ولا ده
فممكن تاخد كورسات وتطور من نفسك وتشتغل في مدارس لغات أو انترناشونال .. وديه فلوسها بتبقى كويسة، ده غير إنك ممكن تسافر برة💸
◾ولو كنت في قسم من أقسام اللغات فممكن تشتغل في الترجمة أو أي مجال عموما بعيد عن التدريس.
◾وقسم كيما ممكن بعد ما يخلص يعمل معادلة ويدرس آخر سنتين في علوم وبيتكتبله في الشهادة بكالريوس علوم وبالتالي ممكن يفتح معمل أو يبقى قدامه شغل علوم.
◾ولو كنت قسم فيزيا ففرصة شغله حلوة لان عدده دايما قليل لإنه مالوش تنسيق داخلي ..🤞
- وعموما يعني .. انت ممكن من أول سنة أو اتنين تنزل تشتغل أو تتدرب كمساعد لأي مدرس عشان تاخد خبرة كويسة
◾آخر حاجة حابين نقولها 👀
- إن الكلية فعلا مهمة لإن مهنة المدرس دي أهم مهنة في أي مجتع واعي .. عشان في الآخر هو اللي بيطلع اللي بيدخلوا طب وهندسة وتجارة .. فلو كان المدرس دا مش دارس ومتأسس صح عمره ما هيعرف يوصل المعلومة للطلبة ولا هيقدر يأسس جيال صح👌.
◾الكلية فعلا سهلة وكويسة وهتحقق أحلام ناس كتير إن شاء الله وابسط ياسيدي تقريبا مش هتحتاج تاخد كورسات في الكلية فهتكون مرتاح إن شاء الله

====================
#كلية_تربية_رياضية
كلية تربية رياضية 🚴
 الكلية مدة الدراسة فيها 4 سنين و الكلية  بتهتم بتخريج مدرسين و مدربين تربية رياضية سواء في المدارس أو النوادي .. بيتخصص الطالب في لعبة واحدة بس في سنة تالتة بعد ما يكون درس كل الألعاب في سنة أولى وسنة تانية.
علشان تقدم لكلية تربية رياضية و تتقبل فيها هيكون لازم انك تعدي و تنجح في اختبارات الكلية اللي بتتكون من اختبارات القوام اللي هي الطول و الوزن و اللياقة البدنية، واختبارات المهارة ودي بتكون اختبارات في اللعبة اللي انت بتحبها أو بتلعبها 💫
وكمان اختبار الهيئة ودا عبارة عن انترفيو مع دكتور من الجامعة تتكلم فيه عن نفسك
و اخر حاجة الاختبار الطبي و دا بيكون عبارة عن فحص كااامل للجسم ..
في كلية تربية رياضية فيه أكتر من قسم منهم:
◾قسم التدريب: طبعا واضح من اسم القسم ان الطالب بيدرس فيه علم التدريب وطريقة تدريب الفرق و المنتخبات. و كمان بندرس فيه علوم الحركة و علوم النفس و البايو ميكانك+ المواد العملية وهي الألعاب الرياضية زي كرة القدم و غيرها.
◾تاني قسم هو قسم التدريس: قسم التدريس بقاا بيعتمد علي الدروس النظرية بندرس فيه كيفية تدريس مجموعة طلبة في المدارس و المعسكرات التدريبية + المواد العملية في القسم دا .
◾تالت قسم و هو قسم الادارة : و في القسم دا بيدرس الطالب ازاي يدير المؤسسات الرياضية بمختلف انواعها
كلية تربية رياضية موجودة في 14محافظة من محافظات مصر و هم : أسيوط - الفيوم- بني سويف - بنها - حلوان بنين - حلوان بنات - كفر الشيخ - المنصورة - طنطا - اسكندرية بنين، اسكندرية بنات- بورسعيد - السادات - المنيا - جنوب الوادي - سوهاج - اسوان .
أما عن مجالات الشغل بعد التخرج من الكلية:
- فانت ممكن تتوظف في مدرسة حكومية كمدرس تربية رياضية أو مدرب في نادي ..
- أو اخصائي تأهيل حركي و اصابات ملاعب و دي بتكون حاجة زي دكتور العلاج الطبيعي كدا ..
- كمان ممكن تدخل اي كلية عسكرية و بتدرس مدة معينة مش طويلة و بعد كدا تكون ظابط تخصص و كمان ممكن تكون اداري في اي نادي رياضي.
- كمان ممكن تشتغل أخصائي تغذية.
-  أو في جيم مدرب أو كوتش.
-  كمان الدول دلوقتي بتهتم بالصالات الرياضية والبطولات فهيبقى ليك فرصة كويسة في السفر.
*الكلية جميلة ومستقبلها كويس جداً و مش مقتصر على مدرسين الالعاب بس ومجموعها مش كبير مش لازم تستني التخرج عشان تشتغل ممكن ببساطة وانت في سنة أولى تاخد دورات وتشتغل بيها في مجالك وبمقابل مادي كويس جداً يكاد يكون مغري وانصح اي حد يخشها ميفوتش محاضرة عشان النجاح فيها يكاد يكون متوقف علي الحضور بس 💫
بالتوفيق ليكم و ايامكم اللى جايه حلوة ان شاء الله  ❤
لو شايف ان البوست مفيد متنساش تعمل منشن و شير لاى حد عايز يدخل كلية تربية رياضية 😉❤️
===================
#كلية_تربية_نوعية
أهلًا أهلًا، بوست النهارده ليه تاريخ عظيم مع كل واحد فينا.. طبعا كلنا لينا ذكريات مع حصة الرسم بتاعه المدرسة وقد ايه الواحد كان مبدع .. مبدع جدا 😅 ولا حصة الموسيقى اللي بتقلب لموسيقى من اللي هي 😅 ولا حصة الاقتصاد المنزلي ولا ولا..  كانت أيام والله ..
دلوقتي جه اليوم اللي نعرفك لو حابب تبقى مسئول عن الحصص دى تعمل ايه وتدخل كلية ايه؟ عرفتوا الكلية؟
 أييووة بالظبط.. تربية نوعية تمام 😌..
هي كلية كولكشن كده فيها كذا قسم وهتلاقي نفسك فيها إن شاء الله وعشان نبقى صُرحا مع بعض هي كلية معتمدة ع الشغل العملي و المشاريع بالإضافة للنظري طبعا، و التخصص بيكون من أول سنة ليك فيها ..
الكلية في أغلب الجامعات بتتقسم 6 أقسام، وهم:
◾التربية الفنية
◾الموسيقى
◾تكنولوجيا التعليم
◾الإعلام التربوي
◾الاقتصاد المنزلي
◾والعلوم التربوية والنفسية
وبعض أقسامها بيحتاج امتحان قدرات قبل دخوله زي فنية وموسيقى .. والقدرات السنة دي آخرها 20 أغسطس ..
نتكلم عن قسم قسم .. 🌸
◾أول حاجة التاني التربية الفنية:
- وده ببيحتاج دخول امتحان قدرات بردو .. بالمناسبة مش شرط تكون بتعرف ترسم لإن القسم مش معتمد على كده بس.. واللي مبيرسمش هينبهر بنفسه خلال الاربع سنين وهيطلع شغل حلو، وامتحان القدرات بيبقى رسم قريب من امتحانات ثانوي.
- قسم فنون بقى فمحتاج حد حابب المجال جدا لانه مجهد جدا وأكتر قسم عملي في الكلية دا غير إنه محتاج إبداع علشان تطلع شغل حلو وجديد وده مش هيحصل إلا إذا كنت حابب المجال 🎨
ده غير الحضور اليومي .. وأوقات الشغل بيطول في الكلية وممكن الطلبه تتأخر وترجع بالليل ..  ماشي يا بنات؟ بنقولكوا أهو 😅
والدراسة في القسم معتمدة على الأعمال الفنية بأشكالها المختلفة .. ومواد سنه أولى وسنة تالتة زي بعض ومواد تانية ورابعه زي بعض.
ازاي ؟ هقولك..
📌 مثلا أولى و تالته المواد العملي بتبقى:
نحت وده شغل بالطين وتشكيله
طباعه وليها انواع زي بصمة
رسم و ده رسم لوحات بالرصاص أو الوان
تصميم و ده شغل زخارف بالالوان
📌 وفي سنة تانيه ورابعه فيه مواد زي:
خزف ده شغل طين بس مجسم و تشكيله و تعمل فازات وكده
معادن وده شغل بشرائح نحاس او اي معدن لعمل اكسسوار او اي حاجه
تصوير وده رسم لوحات زيت او عمل لوحات بخامات من البيئه
خشب وده اعمال فنيه ومنتجات باستخدام الخشب زي استخدام قشرة الخشب وعمل اركيت وغيره
ده مثال لبعض المواد عشان تبقو فاهمين ومعانا على الخط 🤓
وفيه مادة كده مستمره معاك طول السنين ما عدا سنه رابعه هي مادة أشغال فنية ودي عمل منتج من أي خامة ممكن ورق او بلاستيك او زجاج او حبال حسب ما بينطلب المشروع وبيتقدم للدكتور
في الاغلب بيبقى عدد المشاريع كتيرة كل سنه وقليل جدا اما الدكتور يرجع المشروع للطالب .. القسم مُكلف عشان الخامات وعمل المشاريع دي .. بس لطيف وحلو وعاوز حد حابه بجد .. وهتشتغل مدرس تربيه فنية أو تبقى معيد في الكلية أو تعمل مشغولات يدوية وخزف وتعرضهم في المعارض أو تفتح معرضك الخاص .. 💫
◾ثاني قسم هو قسم اقتصاد منزلي:
📌 وده بتدرس فيه مواد عن التغذية والأكل والملابس والتفصيل والتطريز وتصميم الملابس، كمان بتدرس كيماء وفيزياء ورياضة ومواد إدارة.
وبتشتغل مدرس اقتصاد منزلي أو أخصائي تغذية أو مصمم ملابس .. وممكن شركات لو كان فيه تركيز على مواد الإدارة.
◾دلوقتي عندنا فضائية عندنا فضائية ..  أيوة هو قسم إعلام:
والقسم ده فيه شعبتين: صحافة ومسرح
فى سنة أولى وتانية بتدرس مواد خاصة بالإعلام والمسرح وفي سنه تالته بتختار إما:
- صحافة فتتخصص فى دراسة الصحافة.
- او مسرح وده بتدرس الإخراج والإضاءة والتأليف والنقد والتحليل والتصوير. 📷
📌 مجال شغلهم ايه؟
- الصحافة ممكن تشتغل فى الإعلام زى ما تحب.
- المسرح بردو كذلك، إلى جانب إن المسرح ممكن تكمل وتختار حاجه زى الإخراج وتدرسها وتشتغل بيها ..  
نيجي للحاجة اللي احنا عايشين ف عصرها
◾وهو قسم التكنولوجيا:
القسم ده فيه شعبتين شعبة عامة وشعبة حاسب💻
بتدرس في أولى وتانية كل المواد المتخصصة بالكمبيوتر زى البرمجة والمونتاج والتصميم وصيانة الكمبيوتر والمصغرات الفيلمية وتكنولوجيا التعليم واستخدامها فى التدريس.
📌وفي تالتة بتختار إما:  
-شعبه عامة: ودي بعد ما بتتخرج بتشتغل أخصائية غرفة الكمبيوتر فى المدرسة مثلاً وفيها بتدرس اجهزة العرض وخلافه.
-شعبة حاسب: ودى بتبقى مدرس حاسب وبتدرس كل المواد المتخصصة بالكمبيوتر و التكنولوجيا.
وممكن لو مش عايز تشتغل مدرس ممكن مثلا تشتغل فى شركات وغيره.
📌 التشعيب لعام وحاسب مش بيبقى في كل الجامعات، بتدرس كمان مواد حرة شوية زي الفهرسة والتصوير الفوتوغرافي والإذاعة، بالإضافة لمواد التربوي، القسم عملي جدا، وبيحتاج لاب.
◾فيه كمان قسم التربية الموسيقية:
وده بيحتاج امتحان قدرات زي ما قلنا .. حاجة بسيطة بس بيعرفوا منها إذا كنت بتعرف تميز الالات عن بعضها والنغمات نفسها..
وبتبقى عبارة عن تعليم موسيقى وعزف على الات حسب ما الدكتور بيحدد وبتختار آلة واحدة تتخصص عليها بجانب إنك بتدرس بقية الآلات التانية.
هتخلص وتشتغل مدرس موسيقى مثلا أو لو دربت نفسك ممكن تلاقي وظايف لنفس المجال
◾آخر حاجة بقى العلوم التربوية والنفسية: وركز معايا وفتح مخك عشان الجزئية دي ملعبكة شوية..
 هو عبارة عن مجموعتين:
📌 المجموعة الأولى بيسموها المقررات التربوية النوعية التخصصية زي:
- تاريخ التربية الفنية ونظرياتها
- مبادئ تدريس التربية الفنية
- طرق تدريس التربية الفنية
- طرق تدريس التربية الموسيقية
- علم نفس التربية الفنية
- علم نفس التربية الموسيقية
- فنون أطفال وبالغين وفنون الفئات الخاصة.
📌 والمجموعة التانية بيسموها مجموعة المقررات التربوية العامة زي:
- مدخل العلوم التربوية
- مدخل إلي العلوم النفسية
- المناهج وطرق التدريس
- علم نفس النمو وعلم نفس التعليم
- تاريخ التربية ونظام التعليم بمصر
- تكنولوجيا التعليم
- القياس والتقويم
- الأصول الفلسفية للتربية والأصول الاجتماعية للتربية
- التربية المقارنة والتربية الصحية
- الإرشاد النفسية والتربية الميدانية.
📍نقطة مهمة هنا .. 👀
قبل ما تقرر هتدخل ايه من دول شوف الجامعة اللى هتدخلها  الأول فيها القسم ده ولا لأ لان الاقسام دي مش متوفرة فى كل الجامعات .. هى موجودة فى جامعة عين شمس، و4 أقسام موجودين فى جامعة القاهرة وهما *الموسيقي والفنية والعلوم التربوية والنفسية والإعلام*..  ف ركز قبل ما تكتب الجامعة واعرف القسم اللي عايزه فيها ولا لا 💫
◾سنة ثالثة و رابعة بينزلوا تربية عملي ف المدارس أيا كان القسم ايه ..حتى إعلام ..آه حتى إعلام
◾كمان فيه مشروع بيتسلم ف آخر سنة ف معظم الأقسام اسمه مشروع تخرج بيكون فردي أو جماعي.
غير إن كل الأقسام في الكليه أربع سنين
أما بالنسبة لمجال العمل فهي بتخرج معلمين ف مدارس
أو ممكن شغل خاص
دروس تعليم و كورسات
أو عمل منتجات و يتعاقد مع محل عشان يبيع
أو يعرض منتجات ع النت و يدخل ف أي أوبن داي مثلا..
والشغل هيبقى أكبر .. كل ما كان ابداعك أكبر 🙂 ❤
===================
#كلية_سياحه_وفنادق
◾كلنا نفسنا نلف العالم ونزور أماكن مختلفة ونتعرف على ثقافة بلاد مختلفة نشوف الرموز السياحية ال بتميز البلاد دي وندوق أكلهم كمان😋
◾سؤال بقى ألاقي فين الحاجات دي غير جروب travel experiences ؟ 😣
- هتلاقيه هنا في كلية 《سياحة وفنادق 》😎
◾اولا كده كلية سياحة وفنادق الدراسة فيها 4 سنين
◾موجودة في مصر في 8 جامعات هما :
1. جامعة المنصورة.
2. جامعة  إسكندرية.
3. جامعة حلوان.
4. جامعة المنيا.
5. جامعة الفيوم.
6. جامعة قناة السويس فرع الإسماعيلية.
7. جامعة المنوفية (في مدينة السادات).
8. جامعة جنوب الوادى فرع الأقصر.
◾الكليه ممكن تدخلها من علمي او ادبي
 - تنسيقها اكيد بيتغير من سنة ل التانية 🙌
◾علشان تدخل كلية سياحة وفنادق لازم غير انك تكون جايب مجموعها فلازم كمان تكون جايب 70% كحد أدني في مادة انجليزي في ثانوية عامة
- يعني تكون جايب في حدود من 35 ل 50 📈
- بعد كدا بتسحب ورق التقديم وبتروح تقدم في الكلية
◾وبعد ما تقدم ورقك خلاص في الكلية بيتعمل ليك انترفيو مع دكتور من دكاترة الكلية والإنترفيو دا غالباً بيتقسم لـ3 حاجات بتتقيم على اساسهم وهما:
《1》. Introduce Yourself :
وهنا هيكون مطلوب منك تقدم نفسك بالانجليزي، يعني اسمك وسنك وساكن فين واتولدت امتي وفين وايه هواياتك واهتماماتك وحاول على أد ما تقدر متقفش في أي سؤال👌
《2》. General question :
اسئلة عامة زي مثلاً دولة كذا في قارة ايه او عاصمة دولة كذا ايه وهكذا
《3》. Your Appearance :
مظهرك وشكلك : يعني خلي شكلك حلو لبسك يكوون نضيف مش لازم تكوون بدلة وفورمال أوي ، بس أهم حاجة مظهرك يليق بطالب كلية.😎
◾خلاص دخلت الكلية واتقبلت ، بعد كده إيه ؟🤔
- انت بتختار القسم من اول سنة او تاني سنة  يعني حسب الجامعة ال انت فيها
- يعني عندك مثلاً 《جامعة اسكندرية》 التخصص فيها بيكون من سنة 2 انما الجامعات التانية بيكون التخصص من سنة 1 ✔
◾بالنسبة لأقسام الكلية نفسها هما 3 أقسام :
《1》- قسم الارشاد 《 ومقسوم لانجليزي او فرنساوي أو ألماني يعني بتدرس مواد القسم ده بلغة من التلاته 》 :
- والقسم دا بيأهلك تكون مرشد سياحي 🏯🗽🌉
 《 بتدرس فيه تاريخ مصر وآثار مصر والمعالم السياحية المشهورة والحضارات المصرية وهكذا.》
◾بالنسبة لسوق العمل :
- في شركات السياحة كمرشد سياحي
بس لازم تاخد دبلومة إرشاد سياحي مدتها سنتين
كمان بتاخد رخصة إرشاد سياحي أول ما بتتخرج علطول 👩‍🎓👨‍🎓
- وبالنسبة لمرتباتهم فبتبقي على حسب اللغات اللى معاك وكل ما يبقى معاك لغة نادرة بتاخد فلوس اكتر💰💰
- كمان مجالات الشغل ممكن تكون في مجال الضيافة في - 1- المطارات
2- او العلاقات العامة
3- او في مجال التسويق والمبيعات
4- وخدمة العملاء
5- او مدرسين لاي لغة 😀
《2》- قسم الدراسات السياحية 《ومقسوم لعربى وأنجليزي》 :
- والقسم دا بقا بيأهلك تشتغل في كل اقسام الشركات السياحية وشركات الطيران والمطارات🛫
- وكمان وظايف عامة زي التسويق وخدمة العملاء والعلاقات العامة 🤓
- وفي فترة دراستك بيبقي في تدريب صيفي كل سنة من سنين الدراسة في شركة سياحة او طيران.✈
- والقسم دا أكتر قسم مطلوب في مجال الشغل في مصر والوطن العربي عموما
《3》- قسم الفنادق و الادراة الفندقية 《 ومقسوم لعربى وانجليزي》 :
- والقسم دا بيأهلك انك تشتغل في أي شغل ليه علاقة بالفنادق السياحية وبيكون في بردو تدريب صيفي كل سنة في فندق.🏤
◾المواد ال بتدرسها في الكلية بشكل عام بتكون :  
《تاريخ - واثار- وهيروغليفي - وقانون - وارشاد تطبيقي - تسويق فندقي - والتجهيزات الفندقيه - وصناعية الضيافة - وانجليزي ولغة تانية وشوية مواد فرعية زي حقوق انسان مثلا》
◾هل معنى الكلام ده إن الكلية سهلة ؟
- أي مكان في الدنيا فيه الصعب والسهل والكويس والوحش بس ال بيميز حاجة عن حاجة وحد عن حد هو السعي والاجتهاد والمجهود ال بتبذله عشان تشتغل على نفسك وتحقق أكبر قدر ممكن من الاستفادة👌

===================
#كلية_رياض_أطفال
كلية النهاردة ليها علاقة بـأحباب الله 😇😂
بس اختلفت مسميات الكلية دي وتخصصاتها من جامعة لجامعة 🤷‍♀️
ما بين رياض أطفال وطفولة مبكرة وتربية طفولة.
⚠️طب إيه سبب الخلاف ؟
إن زمان كان في كلية رياض الأطفال لوحدها، وكان في كلية طفولة لوحدها، من حوالي 3 سنين بدأت بعض الجامعات تغير ف السيستم دا وجمعتهم ف كلية واحدة، ودا بقي الموجود ف معظم الجامعات دلوقتي، بقت كلية تربوية مستقلة واسمها كلية ... #تربية_طفولة_مبكرة ..
فيلا بيننا نعرف عنها أكتر 🚶‍♂️
أولا الكلية موجودة ف 11جامعة حكومية وهم: جامعة المنيا، جامعة الفيوم، جامعة الإسكندرية، جامعة الإسكندرية فرع مطروح، جامعة أسيوط، جامعة بني سويف، جامعة المنصورة، جامعة بورسعيد، جامعة دمنهور، جامعة الزقازيق ، جامعة السويس ، جامعة القاهرة.
⚠️بنات بس.
وإنتي بتقدمي للكلية بيكون في اختبار شخصية بسيط جدا، وبيكون في ورقة تملي فيها رغباتك للاقسام، ف أنتي بتتخصصي من أول سنة.
📍الكلية فيها 4 أقسام وهم:
1️⃣ رياض أطفال:
-من سن 4 لـ 6 سنين ( من الkg للمدرسة).
-بتدرسي فيها معلومات عن الأطفال عامة (لكن التركيز كله ع السن دا).
2️⃣ رياض أطفال English:
-هي رياض أطفال بس الدراسة English.
-شغلك أكتر في المدارس اللغات.
-تكوني درجتك ف الEnglish كويسة.
-بتكون بمصروفات زيادة.
3️⃣ حضانة:
-السن الل قبل 4 سنين
-الدراسة عن كل حاجة تخص السن دا.
4️⃣ تربية خاصة:
-الدراسة عن ذوي احتياجات والتربية الخاصة.
-السن مش مهم هنا لأن هتتعاملي مع إعاقة عقلية أو توحد (يعني ممكن الدراسة تكون ل15 سنة عادي الموضوع بيتقسم هنا ليفلز مش سن).
📍المواد:
⬅️ مواد سايكولوجي(نفسية): وبتدرسي فيها تخصصات ف علم النفس زي علم نفس النمو مثلا، وكمان نظريات علم النفس وملاحظة الطفل ونفسيته وتحركاته وكدا، وكمان بتتعلم طريقة تعديل جوانب السلوك للطفل، وطرق تنمية قدراته ومهاراته.
⬅️ مواد تربوية: بيكون فيها استراتيجيات تربوية، وأصول تربية الطفل، التربية ونظرياتها، التعليم والتكنولوجيا، إزاي المنهج بيتعمل ونعمل اختبارات لهم وهكذا.
⬅️ مواد عامة بتاخدي فيها أساسيات زي العلوم والعربي(بيكون خاص بحتة اللغات، وازاي نعلم او نتعلم لغة مثلا) والرياضة والانجلش(خاص أكتر بالترجمة)
⬅️ مواد تانية زي الفن والموسيقى و الرياضة وهيبقى عندك سيكشن جيم🏃🏻‍♀️ وفيها عزف ع الاورج وغُنى
وتعملوا لعب ولوح ووسايل وكتب وقصص بأنواعها وبرامج ع اللاب وتصوير ومسرحيات والمسرح نفسه حتى 😂💔
ومجسمات كبيرة أكبر منك أساسا 😂
📍قسم التربية الخاصة:
ده بيبقى فيه مواد زيادة عن بقية الأقسام شوية
وبتدرس فيه الطفل العادي وطفل ذوي إحتياجات في نفس المادة ونفس الكتاب عادي.
بتعرفي فيه فئات ذوي احتياجات، تعليمهم، المشاكل الل بيقابلوها، تعملي مناهج واختبارات ليهم وهكذا.
وكمان تربية خاصة بيكون فيها تخصص تاني من سنة 3 كلية.
⚠️نقطة مهمة ف الكلية إنها بتحب المرمطة شويتين🙊، ف عادي جدا تبقي ماشية كل يوم الصبح بماكيتات ومجسمات ومشاريع وشغل اد كدا وتخلي بالك منها أكتر من نفسك ليتكسر 🤦‍♀️
⚠️كمان هي من الكليات المكلفة، والعملي بتاعها كتير. ف بتحتاج فلوس ف الخامات ال بتشتريها وطاقة ف تنفيذ المشاريع بتاعتها.
⚠️الامتحانات بتفرق من جامعة لجامعة، لكن غالبا بتبقى كويسة.
📍المذاكرة:
عادي جدا إنك تذاكري المادة قبل الامتحان باسبوع مثلا، وتفهمي الكلام وتحلي بفهمك، مش لازم تحفظي خالص.
لكن الكتب في كتير منها كويس جدا كثقافة ف التربية ليك أنتي، وهيفرق معاك لو استوعبتيه كويس.
📍التربية العملي:
-بتكون ف سنة 3و 4.
- عبارة عن يوم ف الأسبوع، بتنزلي فيه مدرسة بتكوني مسئولة عن اليوم ومعاك المديرة والمعيدة بتتابعك، وممكن الدكتور مرة أو اتنين، وبعدين بتتقيمي ف آخر السنة.
⚠️الكلية مش بتكون بنفس التفاصيل ف كل الجامعات، لانها بتفرق ع حسب قدرة وميزانية كل جامعة ف توفير المساحة والاقسام والدكاترة وهكذا، ف مهم جدا إنك تدخلي ع الويب سايت بتاع الجامعة وتشوفي الأقسام أو ظروف الدراسة ف الجامعة ال انتي تابعة ليها.
⚠️بردو المساحة ممكن متبقاش كويسة ف بعض الجامعات ف مش هيكون متوفر قاعات أو اماكن كتيير ليكم.
📍 الشغل غالبا بيكون ف حضانات او مدارس (خاصة او حكومي)، وبيختلف المرتب من مكان لمكان، لكن الكلية بتعلمك مهارات كتييير جدا ممكن تفتح لك أبواب مختلفة كتيير تقدري تشتغلي فيها.
ف المهم تكوني حباها وحابة الفكرة وشغلها عشان تقدري تفتحي لنفسك فيها ابواب شغل، وكمان تستحملي مرمطتها 😇🙊
⬅️ مجالات شغل (قسم تربية خاصة) بتكون مفتوحة شوية زيادة، مش مقتصرة ع الحضانة او المدرسة بس.
لكن ممكن ف مراكز ذوي الاحتياجات الخاصة، او الرعاية الخاصة ليهم وهكذا.
وبس كدا 😁
دي كل المعلومات ال هتفيدكم عشان تقرروا إذا كانت الكلية مناسبة ليك ولميولك ولا لأ.
بالتوفيق 😇.
===================
كلية الذكاء الإصطناعي
_جامعة القاهرة..جامعة سوهاج.. جامعة كفر الشيخ 👇
-ايه هي كلية الذكاء الاصطناعي جامعة كفر الشيخ؟  ⁦⚠️⁩
= هي كلية تهتم بدراسة علوم الذكاء الاصطناعي وتعتبر الاولي في الشرق الاوسط لدراسة الذكاء الاصطناعي
تم انشائها بناء علي قرار السيد رئيس مجلس الوزراء قرار 871 لعام 2019
مدة الدراسة فالكلية اربع سنوات بنظام الساعات المعتمدة ثم يحصل الطالب علي درجة البكالوريوس في علوم الذكاء الاصطناعي
- هدرس اية فالكلية واية الاقسام الفيها ؟ ⁦⚠️⁩
=هتدرس فالكلية جميع المجالات و التكنيكات الخاصة بالذكاء الاصطناعي ذي ال machine learning , deep learning , computer vision , NLP , Robotics
والاقسام الموجودة فالكلية هي ⁦⚠️⁩
1. برمجة الالة واسترجاع المعلومات learning Machine and information retrieval
2. الروبوتات والالات الذكية and Robotics The Intelligent Machines
3. تكنولوجيا انظمة الشبكات المدمجة Network Embedded Systems Technology
4. علوم البيانات Science Data
-فرصة العمل بعد التخرج من الكلية ؟ ⁦⚠️⁩
= اولا ودا شئ لازم يذكر ان الارزاق بيد الله وحده ومش الكلية هي الهتحدد عملك بشكل مباشر ومش هي الهتوديك للشركة الهتوظفك خاصة ان العالم بقي بيتجه لتوظيف المبدعين في مجال معين بغض النظر عن الشهادة الجامعية
تب نتكلم بالارقام شوية بقي 🤔
العاملين في مجالات تخص الذكاء الاصطناعي هم الاعلي طلبا فالعالم
وفقا لموقع CIO فان الذكاء الاصطناعي هم الاكثر طلبا علي مستوي العالم لعام 2020 بمتوسط راتب بلغ 150 الف دولار فالسنه
متستألش بالرقم عزيزي القارئ انت بتتكلم ف200 الف جنية فالشهر 🥳😅
المصدر - https://bit.ly/3CwNBey…
طبعا هتقولي دا برا احنا عوزين فمصر هقولك اقراء عن حجتين 😉
الاولي خطة مصر للتحول الرقمي ودي كانت من اسباب انشاء الكلية فالاساس
الثانية ادخل علي موقع LinkedIn وابحث عن الوظائف الخاصة بالاقسام المكتوبة فوق وصدقني هتتفاجئ من كمية الطلبات علي الموظفين في الشركات الانترناشونال .
- تنسيق الكلية كام ؟ ⁦⚠️⁩
=تنسيق اول سنة كان 92.3 علمي رياضة لكن بما ان دي كانت اول سنه متوقع ذياة كبيره في التنسيق ومتنساش ان التنسيق البيحددة مكتب التنسيق والكلية ملهاش دخل فيه مثل باقي الكليات 🙄
-الكلية بتقبل من شعبة ايه ؟ ⁦⚠️⁩
=الكلية بتقبل شعبة علمي رياضة لكن المفاجئة ان في قسم جديد ولأول مرة السنادي لعلمي علوم قسم Bio Artificial Intelligence program او برنامج الذكاء الاصطناعي الحيوي 🥳🥳❤ القسم هيبقي بمصاريف لم يتم الاعلان عنها بعد لأن القسم ماذال في مرحلة الموافقة
-الكلية فيها كام طالب ؟
= عدد طلاب الفرقة الاولي 211 طالب , والسنة الجديدة مش هتزيد عن كدا
فالحق عزيزي القارئ واحجز مقعدك فالكلية 😅😉
-اية الفرق بين كلية الذكاء الاصطناعي وبين كليات الحاسبات والذكاء الاصطناعي ؟  ⁦⚠️⁩
= في كلية الحاسبات بتبداء تدرس علوم الذكاء الاصطناعي في الفرقة الثالثه ومش بتتخصص فيها جدا غير في مرحلة الدراسات العليا اما كلية الذكاء الاصطناعي بتتيح لك دراسة العلم من السنة الاولي لك فالكلية ودا طبعا شئ نادر جدا بالاضافه انها من الكليات النادرة البتعطي لخريجيها بكالوريوس في علوم الذكاء الاصطناعي بخلاف باقي الكليات لان الدرجة العلمية دي نادرة علي المستوي العالمي ومفيش جامعات كتير بتعطيها . ودي ميزة تجعل ليك الأولوية فالقبول لدراسة الماجستير الخاص باحد مجالات العلم عن خريخ حاسبات او هندسة
وكمان المواد مختلفة تماما عن حاسبات بخلاف المواد الاساسية ال طالب حاسبات او هندسة بيدرسها
- ايه الفرق بين كلية الذكاء الاصطناعي وقسم ميكاترونكس ؟ 🤔
=الميكاترونكس مجال يجمع ما بين الهندسة الالكترونية والمكانيكية يعني ما بين تصميم الدوائر الالكترونية وتصميم الهيكل المكانيكي.
الذكاء الصناعي هو مجموعة برامج تمكن الآلة أو الروبوت من عمل مهمة بطريقة دقيقة
يمكن ان تجتمع الميكاترونكس والذكاء الصناعي في تطبيقات عملية مثل عمل روبوت طبي او روبوت زراعي او هندسي. فإنه سيتكون من 3 اشياء : تصميم دوائر الكترونية، تصميم هيكل ميكانيكي وتصميم برنامج يمكنه من فهم البيئة من حوله.
فلو اعتبرنا أن المثال إنسان فالميكاترونكس هي العضلات والمخ هو الذكاء الاصطناعي
والمشترك عندنا هو القسم الخاص بالروبوتات 🦾🦿
-لية اسيب هندسة واخش كلية الذكاء الاصطناعي ؟🤔🤔
= لان المجال يجمع فية علوم كثيره بين هندسة وبرمجه ورياضيات ...... , وهو اكثر مجال مطلوب عالميا و كمان المسمي بتاعك علي حسب التخصص النهائي الحضرتك هتختارة مثلا لو اختارت مجال الmachine learning "احد مجالات علوم الذكاء الاصطناعي " فالمسمي الوظيفي بتاعك هو machine learning engineering تب اخترت مجال الdata science فالمسمي الوظيفي هو data scientist
بالاضافة الي انك مش هتضيع سنة من عمرك فاعدادي
وافضل الاسباب هو انك لو بتحب العلم وانت فهندسة للاسف مش هتعرف تتعلمو غير بعد التخرج معظم الدكاترة داخل الكلية خريجي هندسة متخصصوش فالمجال غير بعد التخرج في مراحل الدراسات العليا
فخدها من قصرها ولو بتحب العلم توكل علي الله مش انت لوحدك الجبت 99.5 ودخل كلية الذكاء الاصطناعي بدل هندسة وهندسة بترول لا عندنا منك كتير 😉😉😏
بالتوفيق للجميع